ଉତ୍ତରପ୍ରଦେଶ ୧୯/୧୦: ଉତ୍ତରପ୍ରଦେଶର ନୋଏଡାରେ ଜଣେ ବ୍ୟକ୍ତି ବ୍ୟାଙ୍କ୍ ଲକରରେ ରଖିଥିବା ୫ ଲକ୍ଷ ଟଙ୍କାର ନୋଟ୍କୁ ଉଈ ଖାଇଦେଇଛନ୍ତି । ବ୍ୟକ୍ତିଜଣକ ଏ ନେଇ ବ୍ୟାଙ୍କ୍ ପ୍ରବନ୍ଧନ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ । ଲକରରେ ଟଙ୍କା ରଖିବା ଅନୁଚିତ୍ । ସେଥିଲାଗି ଆକାଉଣ୍ଟ ରହିଛି ବୋଲି ତାଙ୍କୁ ବ୍ୟାଙ୍କ୍ ପକ୍ଷରୁ କୁହାଯାଇଛି । ଏହାପରେ ସେ ବ୍ୟାଙ୍କ୍ର ବରିଷ୍ଠ ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି ।
ମାମଲାଟି ନୋଏଡା ସେକ୍ଟର-୫୧ରେ ଥିବା ସିଟିଜେନ୍ କୋଅପରେଟିଭ୍ ବ୍ୟାଙ୍କ୍ର । ସେଠାରେ ଜଣେ ବ୍ୟକ୍ତି ନିଜ ଲକରରେ ୫ ଲକ୍ଷ ଟଙ୍କା ଓ ଗହଣା ରଖିଥିଲେ । ୩ ମାସ ପରେ ଲକର ଚେକ୍ କରିବାରୁ ତାଙ୍କର ହୋସ୍ ଉଡି଼ଯାଇଥିଲା । ପୀଡି଼ତଙ୍କ ମୁତାବକ, ବ୍ୟାଙ୍କ୍ ଲକରର ଦେୟ ବାବଦରେ ୨-୧୨ ହଜାର ଟଙ୍କା ନେଇଥାଏ । ଏଭଳିସ୍ଥିତିରେ ଲକରରେ ରଖାଯାଇଥିବା ଜିନିଷର ସୁରକ୍ଷା ବ୍ୟାଙ୍କ୍ ପ୍ରବନ୍ଧନର । ଅତି କମ୍ରେ ବର୍ଷକୁ ୨ ଥର ଉଈ ପ୍ରତିରୋଧୀ ବ୍ୟବସ୍ଥା କରାଯିବା ଆବଶ୍ୟକ । ବ୍ୟାଙ୍କ୍ କିନ୍ତୁ ଏହା କରିନାହିଁ । ସେଥିଯୋଗୁ ମୋର ୨ ଲକ୍ଷ ଟଙ୍କାର ନୋଟ୍କୁ ଉଈ ପୂରା ଖାଇଯାଇଛନ୍ତି । ଆଉ ୩ ଲକ୍ଷ ଟଙ୍କା ମୂଲ୍ୟର ନୋଟ୍ର ଏଭଳି ଅବସ୍ଥା କରିଦେଇଛନ୍ତି ଯେ ତାହା ବଜାରରେ ଚଳିପାରିବ ନାହିଁ । ଏଭଳିସ୍ଥିତିରେ ମୁଁ ବ୍ୟାଙ୍କ୍ କର୍ତ୍ତୃପକ୍ଷଙ୍କ ସାମ୍ନାରେ ଉଈ ଖାଇଯାଇଥିବା ୨ ଲକ୍ଷ ଟଙ୍କା ଦେବା ଲାଗି ଦାବି କରିଛି । ଏଥିସହ ନଷ୍ଟ କରିଦେଇଥିବା ୩ ଲକ୍ଷ ଟଙ୍କାକୁ ବଦଳ କରିବା କଥା କହିଛି ।
ଇତିମଧ୍ୟରେ ବ୍ୟାଙ୍କ୍ ମ୍ୟାନେଜର ଆଲୋକ କୁମାର ବ୍ୟାଙ୍କ୍ର କାନ୍ଥ ଫିମ୍ପି ମାରିଥିବା କଥାକୁ ସ୍ୱୀକାର କରିଛନ୍ତି । ତାଙ୍କ କହିବା କଥା ହେଲା, କାନ୍ଥ ଫିମ୍ପି ମାରିବା ଯୋଗୁ ଉଈ ହୋଇଛନ୍ତି । ସୌଭାଗ୍ୟକୁ ଅନ୍ୟ ଲକର ଏଥିଯୋଗୁ ପ୍ରଭାବିତ ହୋଇନାହିଁ । ସେପଟେ ଲକରରେ ଉଈ ଲାଗିଥିବା ଜଣା ପଡି଼ବା ପରେ ସେ ସମସ୍ତ ଲକରଧାରୀଙ୍କୁ ଯୋଗାଯୋଗ କରିଛନ୍ତି । ନିଜ ନିଜର ଲକର ଯାଞ୍ଚ କରିବାକୁ କହିଛନ୍ତି । ଏହାପରେ ବ୍ୟାଙ୍କ୍ରେ ଲକର ଯାଞ୍ଚ କରିବା ଲାଗି ଲୋକଙ୍କ ଭିଡ଼ ଦେଖିବାକୁ ମିଳୁଛି । ଏ ସଂପର୍କରେ ବ୍ୟାଙ୍କ୍ର ବରିଷ୍ଠ ମ୍ୟାନେଜର ଇନ୍ଦୁ ଜୈସୱାଲ କହିଛନ୍ତି, ଲକରର ବ୍ୟବସ୍ଥା ଗ୍ରାହକଙ୍କ ସୁବିଧା ଲାଗି ହୋଇଥାଏ । ସେଥିରେ ଜରୁରି ଦସ୍ତାବିଜ, ସମ୍ପତ୍ତିର କାଗଜପତ୍ର, ମୂଲ୍ୟବାନ ଆଭୂଷଣ ସମେତ ଅନ୍ୟ ଆଇଟମ୍ ରଖିହେବ । କିନ୍ତୁ ଟଙ୍କା ରଖିହେବ ନାହିଁ । ଲକରରେ ନୋଟ୍ ରଖିବା ଆରବିଆଇ ଗାଇଡ୍ଲାଇନ୍ର ଉଲ୍ଲଂଘନ । ଯଦି କେହି ଲକରରେ ଟଙ୍କା ରଖନ୍ତି ତେବେ ତାହା ତାଙ୍କର ବୈଧ ରୋଜଗାର ବୋଲି ତାଙ୍କୁ ପ୍ରମାଣ କରିବାକୁ ପଡି଼ବ ।
