ନୂଆଦିଲ୍ଲୀ, ୨୮/୦୪ : ଆତଙ୍କବାଦକୁ ନେଇ ଏବେ ଟେନସନ୍ରେ ବିଶ୍ଵ। ଏଥିରୁ ବର୍ତ୍ତିନି ଭାରତ। ଆତଙ୍କବାଦୀଙ୍କ ଆଢୁଆଳରେ ବାରମ୍ଵାର ଭାରତ ଉପରେ ଆକ୍ରମଣ କରୁଛି ପାକିସ୍ତାନ। ନିଜ ଦେଶରେ ଆତଙ୍କୀଙ୍କୁ ଦେଇଛି ଶରଣ। ଭାରତ ବିରୋଧରେ ରଚୁଛି ଷଡ଼ଜନ୍ତ୍ର। ଅକାରଣରେ ଚାଲିଯାଉଛି ନୀରିହ ଜୀବନ। ଗତ ୩୨ ବର୍ଷରେ ୫୬ ହଜାରରୁ ଅଧିକ ଥର ଆଟାକ୍ କରିଛନ୍ତି ଆତଙ୍କବାଦୀ। ଏହାର ଦୃଢ ଜବାବ ଦେଇଛି ଭାରତୀୟ ସେନା। ଯବାନଙ୍କ ଗୁଳିରେ ନିପାତ ହୋଇଛନ୍ତି ୨୩ ହଜାରରୁ ଉର୍ଦ୍ଧ୍ଵ ଆତଙ୍କୀ। ନୂଆଦିଲ୍ଲୀ ସ୍ଥିତ ଇନଷ୍ଟିଚ୍ୟୁଟ୍ ଫର୍ କନଫ୍ଲିକ୍ଟ ମ୍ୟାନେଜମେଣ୍ଟର ଅଧ୍ୟୟନରୁ ଖୁଲାସା।
ରିପୋର୍ଟ ଅନୁଯାୟୀ, ଆତଙ୍କବାଦୀ ଏବଂ ଉଗ୍ରବାଦୀଙ୍କ ପାଇଁ ଅତ୍ୟନ୍ତ ସମ୍ଵେଦନଶୀଳ ଭାରତର ୯ଟି ରାଜ୍ୟ। ଏଥି ମଧ୍ୟରୁ ଅତ୍ୟଧିକ ପ୍ରଭାବିତ ଜାମ୍ମୁ କାଶ୍ମୀର। ୧୯୮୮ ରୁ ୨୦୧୯ ମଧ୍ୟରେ ୫୬ ହଜାର ଥର ଆଟାକ୍ କରିଛନ୍ତି ଆତଙ୍କବାଦୀ। ଏହାର ଦୃଢ ଜବାବ ଦେଇଛି ଭାରତୀୟ ସେନା। ଯବାନଙ୍କ ଅପରେସନରେ ନିପାତ ହୋଇଛନ୍ତି ୨୩ ହଜାର ୩୮୬ ଆତଙ୍କୀ। ହେଲେ ଏହାର ପ୍ରତିବଦଳରେ ଭାରତ ହରାଇଛି ୬ ହଜାର ୪୧୩ ବୀରପୁତ୍ର। ସେହିପରି ଅକାଳରେ ଯାଇଛି ୧୪ ହଜାର ୯୩୦ ନୀରିହଙ୍କ ଜୀବନ। ଗତ ୨୫ ବର୍ଷର ରିପୋର୍ଟ ଦେଖିଲେ, ୨୦୦୦ ମାର୍ଚ୍ଚ ୬ ରୁ ୨୦୨୫ ଏପ୍ରିଲ ୨୨ ମଧ୍ୟରେ ଜାମ୍ମୁ କାଶ୍ମୀରରେ ହୋଇଛି ୧୨ ହଜାର ୩୭ ଥର ଆକ୍ରମଣ। ଏଥିରେ ବଳି ପଡ଼ିଛନ୍ତି ୪ ହଜାର ୯୮୦ ସାଧାରଣ ଲୋକ।
ଜାମ୍ମୁ କାଶ୍ମୀର ପରି ପ୍ରତିବର୍ଷ ଅରୁଣାଚଳ ପ୍ରଦେଶ, ଆସାମ, ମଣିପୁର, ମେଘାଳୟ, ମିଜୋରାମ, ନାଗାଲାଣ୍ଡ, ପଞ୍ଜାବ ଏବଂ ତ୍ରିପୁରାରେ ଦେଖିବାକୁ ମିଳିଛି ସମାନ ଚିତ୍ର। ଏହି ସବୁ ରାଜ୍ୟ ଗୁଡ଼ିକରେ ବି ଆତଙ୍କ ଖେଳାଇଛନ୍ତି ଆତଙ୍କବାଦୀ। କେନ୍ଦ୍ର ଗୃହ ମନ୍ତ୍ରାଳୟର ରିପୋର୍ଟ କହୁଛି, ଜାମ୍ମୁ କାଶ୍ମୀରରୁ ଧାରା ୩୭୦ ଉଚ୍ଛେଦ ପରେ ଘାଟୀରେ ସକ୍ରିୟ ହୋଇଥିଲା ଆତଙ୍କୀ ସଙ୍ଗଠନ ଟିଆରଏଫ୍। ସେବେଠାରୁ ଏହାର ଏକମାତ୍ର ଟାର୍ଗେଟ୍ ସାଧାରଣ ନାଗରିକ। ୨୦୨୦ରୁ ପହଲଗାମ୍ ଆଟାକ୍ ଯାଏଁ ୩୨ ଥର ଆକ୍ରମଣ କରିଛି ଟିଆରଏଫ୍। ଯେଉଁଥିରେ ଯାଇଛି ୪୮ ସାଧାରଣ ଲୋକଙ୍କ ଜୀବନ। ଗତ ୪ ବର୍ଷରେ ଏହି ସଙ୍ଗଠନର ୪୧ ଆତଙ୍କୀଙ୍କୁ ମାରିଛି ଭାରତୀୟ ସେନା।
ଦକ୍ଷିଣ ଏଶିୟା ଆତଙ୍କବାଦ ପୋର୍ଟାଲ ଅନୁଯାୟୀ, ୧୯୮୮ରୁ ଏପର୍ଯ୍ୟନ୍ତ ହୋଇଥିବା ଆକ୍ରମଣରେ ମରିଛନ୍ତି ୪୭ ପ୍ରତିଶତ ଆତଙ୍କୀ। ଯେଉଁମାନଙ୍କୁ ଭିନ୍ନ ଭିନ୍ନ ଅପରେସନ କରି ମାରିଛନ୍ତି ଯବାନ। ହେଲେ ଏଥିରେ ବଳି ପଡ଼ିଛନ୍ତି ୪୦ ପ୍ରତିଶତ ସାଧାରଣ ନାଗରିକ। ଅକାରଣରେ ଚାଲିଯାଇଛି ଏମାନଙ୍କ ଜୀବନ। କେବଳ ସେତିକି ନୁହେଁ, ୧୬ ବର୍ଷରେ ୯ ହଜାର ୧୪ ଥର ଅସ୍ତ୍ରବିରତି ଉଲ୍ଲଙ୍ଘନ କରିଛି ପାକିସ୍ତାନ। ଏହି ଆକ୍ରମଣରେ ଶହୀଦ ହୋଇଛନ୍ତି ସେନାର ୫୭ ଏବଂ ଅର୍ଦ୍ଧ ସାମରିକ ବାହିନୀର ୪୨ ଯବାନ। ପ୍ରାଣ ହରାଇଛନ୍ତି ୫୯ ଭାରତୀୟ। ସେହିଭଳି ୨୦୦୧ ରୁ ୨୦୧୯ ମଧ୍ୟରେ ଜାମ୍ମୁ କାଶ୍ମୀରରେ ୧୧ ହଜାର ଥର ଅନୁପ୍ରବେଶ କରି ୧୨ ହଜାର ଥର ବର୍ବରକାଣ୍ଡ ଘଟାଇଛି ପାକିସ୍ତାନ। ଭାରତର ଆତ୍ମାକୁ ବାରମ୍ବାର ଆଘାତ କରି ଭୁଲ୍ କରି ଦେଇଛି ପାକ୍। ଏବେ ସମୟ ଆସିଛି, ଜବାବ ଦେବାକୁ। ଲୁହ ଲହୁର ହିସାବ ନେବ ଭାରତ।
