ଭୁବନେଶ୍ୱର, ୯।୮:ରବିବାରଠୁ ଆରମ୍ଭ ହେଉଛି ଖୁଦୁରୁକୁଣୀ ଓଷାର ପ୍ରଥମ ପାଳି । ରାଜଧାନୀର ପ୍ରତ୍ୟେକ ପୂଜା ଦୋକାନରେ ଶୋଭା ପାଉଛନ୍ତି ମା’ ଭାଲୁକୁଣୀଙ୍କ ମାଟି ମୂର୍ତ୍ତି । ଭାଦ୍ରବ ମାସର ପ୍ରତି ରବିବାର ଖୁଦୁରୁକୁଣୀ ଓଷାରେ ଭାଲୁକୁଣୀ ମୂର୍ତ୍ତି ରଖି ପୂଜା କରାଯାଏ । ମୁଖ୍ୟତଃ ଗାଁ ଗହଳିରେ ଝିଅମାନେ ଏକାଠି ହୋଇ ଗେଷ୍ଠୀଗତ ଭାବେ ଏହି ପୂଜା କରିଥାନ୍ତି । ହେଲେ ସହରରେ ସମସ୍ତେ ପ୍ରାୟ ନିଜ ନିଜ ଘରେ ଅଲଗା ପୂଜା କରନ୍ତି । ବିଶେଷକରି ଭଉଣୀମାନେ ଭାଇଙ୍କ ମଙ୍ଗଳ କାମନା କରି ଏହି ଓଷା ଭାଦ୍ରବ ମାସର ପ୍ରତି ରବିବାର କରନ୍ତି । ଝିଅ ଓ ମହିଳାମାନେ ଉପବାସ ରହି ସନ୍ଧ୍ୟାରେ ଏକାଠି ହୋଇ ମା’ ଭାଲୁକୁଣୀଙ୍କ ପୂଜା କରି ବହି ବୋଲା ହୋଇଥାଏ । ଏକ ନିଆରା ପରିବେଶରେ ପୂଜାଟି ହୋଇଥାଏ ।
ରାଜଧାନୀରେ ଝିଅମାନେ ମେଳି ହୋଇ ପୂଜା କରୁନଥିଲେ ମଧ୍ୟ ପୂଜାକୁ ନେଇ ସେମାନଙ୍କ ଭିତରେ ଉତ୍ସାହ ରହିଛି । ଭାଲୁକୁଣୀ ଛୋଟ ମୂର୍ତ୍ତିଗୁଡ଼ିକ ଶହେ ଟଙ୍କାରୁ ଆରମ୍ଭ ହୋଇ ୩ ଶହ ଟଙ୍କାରେ ବିକ୍ରି ହେଉଥିବା ବେଳେ ବଡ଼ ମୂର୍ତ୍ତିଗୁଡ଼ିକ ୫ଶହରୁ ୧୫ଶହ ଟଙ୍କା ପର୍ଯ୍ୟନ୍ତ ରହୁଛି । ମୂର୍ତ୍ତି ବିକ୍ରି କରୁଥିବା ପ୍ରଦୀପ କୁହନ୍ତି, ଆସନ୍ତା ରବିବାର ପ୍ରଥମ ପାଳି ପଡ଼ୁଥିବାରୁ ଝିଅମାନେ ମୂର୍ତ୍ତି କିଣି ନେଉଛନ୍ତି । ଏହି ମୂର୍ତ୍ତିଗୁଡ଼ିକୁ ଆମେ ମୁଖ୍ୟତଃ ବାରଙ୍ଗ ଓ ବାଳକାଟିରୁ ଆଣିଥାଉ ।
