ପାଣିନାଳରୁ ମହିଳାଙ୍କ ମୃତଦେହ ଉଦ୍ଧାର, ହତ୍ୟା ନା ଆତ୍ମହତ୍ୟା ?
ଭବାନୀପାଟଣା/କୋକସରା, ୨୩/୦୫: କଳାହାଣ୍ଡି ଜିଲ୍ଲା ଜୟପାଟଣା ଥାନା ପ୍ରତାପପୁର ଗ୍ରାମପଞ୍ଚାୟତ କଲୋନୀ ପଡ଼ାର ୩୧ ବର୍ଷୀୟ ବିବାହିତ ମହିଳା ସ୍ୱାଗତି ରାଉତଙ୍କ ମୃତଦେହ ଉଦ୍ଧାର ହୋଇଛି । ଏକ ପାଣିନଳାରୁ ତାଙ୍କ ମୃତଦେହ ଉଦ୍ଧାର ହୋଇଥିବା ସୂଚନା । ତେବେ ତାଙ୍କ ମୃତ୍ୟୁ ସନ୍ଦେହ ଘେରରେ ।
ସୂଚନାନୁଯାୟୀ, ସ୍ୱାଗତି ଓ ତାଙ୍କ ସ୍ୱାମୀ ବିରେନ୍ଦ୍ର ଗତକାଲି ଦିନ ୧୦ଟା ସମୟରେ ମାଛ ଧରିବା ପାଇଁ ଏକ ନଳାକୁ ଯାଇଥିଲେ । କିନ୍ତୁ, ସନ୍ଧ୍ୟା ହୋଇଯାଇଥିଲେ ମଧ୍ୟ ସ୍ୱାଗତି ଘରକୁ ଫେରି ନଥିବା ବେଳେ ବିରେନ୍ଦ୍ରଙ୍କୁ ସନ୍ଧ୍ୟାରେ ଜୟପାଟଣା ମଦ ଭାଟିରେ ମଦ ପିଉଥିବା ଲୋକେ ଦେଖିଥିବା ଜଣାପଡ଼ିଛି । ଏପଟେ ସ୍ୱାଗତି ସନ୍ଧ୍ୟା ପର୍ଯ୍ୟନ୍ତ ନ ଫେରିବାରୁ ଖୋଜାଖୋଜି କରିଥିଲେ ମଧ୍ୟ ତାଙ୍କର କୋଣସି ଖବର ମିଳିନଥିବା ତାଙ୍କ ଶାଶୁ ଲକ୍ଷ୍ମୀ କହିଛନ୍ତି । ଆଜି ସକାଳେ ଉକ୍ତ ନାଳରେ ସ୍ୱାଗତିଙ୍କ ଶବ ଭାସୁଥିବା ଦେଖିବାକୁ ମିଳିଥିଲା । ଗାଁ ଲୋକେ ଶବ ଉଦ୍ଧାର କରିବା ସହ ପୋଲିସକୁ ଖବର ଦେଇଥିଲେ । ତେବେ ସ୍ୱାଗତି ଓ ବିରେନ୍ଦ୍ର ଗତ ୧୦ ବର୍ଷ ତଳେ ବିବାହ କରିଥିବା ବେଳେ ତାଙ୍କର ୧୧ବର୍ଷୀୟ ପୁଅଟିଏ ଅଛି । ଏହା ହତ୍ୟା ନା ଆତ୍ମହତ୍ୟା ତାହା ସନ୍ଦେହ ଘେରରେ ରହିଛି । ଘଟଣାସ୍ଥଳରେ ଜୟପାଟଣା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
