ଭୁବନେଶ୍ଵର, ୨୪/୧୦ : ଓଡ଼ିଶା ଉପକୂଳ ମୁହାଁ ଭୀଷଣ ବାତ୍ୟା । ସୃଷ୍ଟି ହୋଇନି ବାତ୍ୟା 'ଦାନା'ର ଆଖି । ଏନେଇ ସୂଚନା ଦେଲେ ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର । ସେ କହିଛନ୍ତି ଯେ, ବାତ୍ୟା 'ଦାନା'ର ଆଖି ସୃଷ୍ଟି ହୋଇନି କି ହେବନି । ବାତ୍ୟା ଭୀଷଣ ବାତ୍ୟାରେ ସୀମିତ ଥିବାରୁ ଆଖି ହୋଇନି। ବହୁତ ବଡ଼ ବାତ୍ୟା ହେଲେ ଆଖି ସୃଷ୍ଟି ହୋଇଥାଏ । ପୂର୍ବାନୁମାନ ଅନୁସାରେ ବାତ୍ୟାର ତୀବ୍ରତା ରହିବ, ଆଉ ବଢିବନି ।
ଆଇଏମଡି ଡିଜି କହିଛନ୍ତି ଯେ, ଲ୍ୟାଣ୍ଡଫଲ ପରେ ବାତ୍ୟା ସାମାନ୍ୟ ରିକର୍ଭ କରିପାରେ । ବାତ୍ୟା 'ଦାନା' ଆଭ୍ୟନ୍ତରୀଣ ଓ ଦକ୍ଷିଣ ଓଡ଼ିଶା ମୁହାଁଇବା ସମ୍ଭାବନା ରହିଛି । ବାତ୍ୟା ପାରାଦୀପ ଠାରୁ ୨୦୦ କିମି ଦୂରରେ କେନ୍ଦ୍ରୀଭୂତ ହୋଇଛି । ପାରାଦୀପରେ ପବନର ବେଗ ୯୫ରୁ ୧୦୫ କିମି ରହିଛି । ସେହିପରି ବାତ୍ୟା ଧାମରା ଠାରୁ ୨୪୦ କିମି ଦୂରରେ କେନ୍ଦ୍ରୀଭୂତ ହୋଇଛି । ଘଣ୍ଟାପ୍ରତି ୧୨ କିମି ବେଗରେ ଉପକୂଳ ଆଡ଼କୁ ମାଡ଼ି ଆସୁଛି । କେନ୍ଦ୍ରାପଡ଼ା, ଭଦ୍ରକ, ବାଲେଶ୍ଵରରେ ୧୦୦ ରୁ ୧୨୦ କିମି ବେଗରେ ପବନ ହେବ । ଲ୍ୟାଣ୍ଡଫଲ୍ ବେଳେ କେନ୍ଦ୍ରାପଡ଼ା, ବାଲେଶ୍ଵର, ଭଦ୍ରକ ଉପକୂଳରେ ୨ ମିଟର ପର୍ଯ୍ୟନ୍ତ ଜୁଆର ଆସିବ । ଲ୍ୟାଣ୍ଡଫଲ୍ ବେଳେ କେନ୍ଦ୍ରାପଡ଼ା, ବାଲେଶ୍ବର, ଭଦ୍ରକ ଉପକୂଳରେ ୨ ମିଟର ପର୍ଯ୍ୟନ୍ତ ଜୁଆର ଆସିବ । ଖୋର୍ଦ୍ଧା, ପୁରୀ, ମୟୂରଭଞ୍ଜରେ ୬୦ ରୁ ୮୦ କିମି ବେଗରେ ପବନ ବହିବ ।
