ନୂଆଦିଲ୍ଲୀ: ବଲିଉଡ ଷ୍ଟାର ସୈଫ ଅଲ୍ଲୀ ଖାନଙ୍କୁ ଆକ୍ରମଣ କରିଥିବା ଅଭିଯୁକ୍ତ ଜଣକର ଏକ ସଦ୍ୟ ପ୍ରକାଶିତ ଫଟୋ ଏବେ ସୋଶିଆଲ ମିଡିଆରେ ଭାଇରାଲ ହେବାରେ ଲାଗିଛି। ବାନ୍ଦ୍ରାରେ ସୈଫଙ୍କ ଘରେ ପଶି ତାଙ୍କୁ ଆକ୍ରମଣ କରିବାର ଗୋଟିଏ ଦିନ ପରର ଏହି ଫଟୋରେ ଅଭିଯୁକ୍ତ ଜଣକ ବାନ୍ଦ୍ରାରେ ହିଁ ଥିବା ନେଇ ଖବର ସାମ୍ନାକୁ ଆସିଛି। ତେବେ ଅଭିଯୁକ୍ତ ଜଣଙ୍କ ସୈଫଙ୍କ ଘରେ ପଶିଥିବା ବେଳର ସିସିଟିଭି ଫୁଟେଜରେ ଏକ କଳା ଟି-ସାର୍ଟ ପିନ୍ଧିଥିବା ବେଳେ ମିଳିଥିବା ନୂଆ ଫଟୋରେ ଏକ ନୀଳ ଶାର୍ଟ ପିନ୍ଧି ବାନ୍ଦ୍ରା ଷ୍ଟେସନ ଅଭିମୁଖେ ଯାଉଥିବା ରାସ୍ତାରେ ଚାଲିଚାଲି ରାସ୍ତାରେ ଜାଉଥିବାର ନଜରକୁ ଆସିଛି।
ସୈଫ ଅଲ୍ଲୀ ଖାନଙ୍କ ଘର ଓ ବନ୍ଦ୍ରାର ଏକ ହୋଟେଲରେ ଲାଗିଥିବା ସିସିଟିଭି ଫୁଟେଜରେ ଆକ୍ରମଣକାରୀ ଜଣଙ୍କ ଏକ ନୀଳ ସାର୍ଟ ପିନ୍ଧି, କାନ୍ଧରେ ଏକ ବ୍ୟାଗ ପକେଇ ରାସ୍ତାରେ ଚାଲିଚାଲି ଯାଉଥିବାର ଦୃଶ୍ୟ ଦେଖିବାକୁ ମିଳିଛି। ଏହି ଫୁଟେଜଟି ସୈଫଙ୍କୁ ଆକ୍ରମଣ କରିବା ପରଦିନ ସକାଳ ଅର୍ଥାତ ଶନିବାର ସକାଳର ବୋଲି ସୂଚନା ମିଳିଛି। ତେବେ ଅଭିଯୁକ୍ତ ଜଣଙ୍କ ପୋଲିସ ଆଖିରେ ଧୁଳି ଦେଇ ସକାଳ ୮ଟା ଯାଏ ବାନ୍ଦ୍ରାରେ ରହିଥିଲା ବୋଲି ସୂଚନା ମିଳିଛି।
ସୂଚନା ମୁତାବକ, ବଲିଉଡର ଏହି ୫୪ ବର୍ଷିୟ ଅଭିନେତାଙ୍କୁ ଗତ ବୁଧବାର ରାତିରେ ଅଭିଯୁକ୍ତ ଜଣକ ତାଙ୍କ ଘରେ ପଶି ୬ ଥର ଛୁରାମାଡ କରିଥିଲା। ଏହି ଆକ୍ରମଣରେ ସୈଫଙ୍କ ବେକ, ପିଠି ଓ ପାକସ୍ଥଳିରେ ଗୁରୁତର ଆଘାତ ଲାଗିଥିଲା। ତେବେ ସେ ମୁମ୍ବାଇର ଲିଳାବତୀ ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ ସେ ବର୍ତ୍ତମାନ ସୁରକ୍ଷିତ ଅଛନ୍ତି ବୋଲି ଡାକ୍ତରମାନେ ପ୍ରକାଶ କରିଛନ୍ତି।
ଆକ୍ରମଣକାରୀକୁ ନେଇ ମିଳିଥିବା ପ୍ରଥମ ଭିଡିଓରେ ସେ ବାନ୍ଦ୍ରା ସ୍ଥିତ ସୈଫଙ୍କ ବାସଭବନକୁ ଧସେଇ ପଶୁଥିବାର ନଜରକୁ ଆସିଛନ୍ତି। ଶିଡି ଦେଇ ସୈଫଙ୍କ ଘରକୁ ପ୍ରବେଶ କରୁଥିବା ସମୟରେ ସେଠାରେ ଲାଗିଥିବା ସିସିଟିଭିକୁ କିଛି ସମୟ ପାଇଁ ଅନାଇ ଫୁଣି ଉପରକୁ ଯାଉଥିବାର ଦୃଶ୍ୟ ସିସିଟିଭିରେ କଏଦ ହୋଇଥିଲା। ନୂତନ ଭିଡିଓରେ ଆକ୍ରମଣକାରୀ ଜଣଙ୍କ ହାତରେ ହାତ ଛନ୍ଦି ଆରମରେ ରାସ୍ତାରେ ଯାଉତିବାର ଦୃଶ୍ୟ ଦେଖିବାକୁ ମିଳିଥିଲା।
ଏହି ଘଟଣାରେ ଅଭିଯୁକ୍ତକୁ ଧରିବା ପାଇଁ ମୁମ୍ବାଇ ପୋଲିସର ଏକ ୩୫ ଜଣିଆ ଦଳ ଘଟଣାର ଛାନଭିନ୍ ଆରମ୍ଭ କରିଛି। ଏହି ଘଟଣାରେ ସମ୍ପୃକ୍ତ ଥିବା ସନ୍ଦେହରେ ଅନେକ ଲୋକଙ୍କୁ ପଚରାଉଚରା କରାଯାଉଥିବା ବେଳେ ଖବର ଲେଖାହେବାଯାଏ କାହାକୁ ଗିରଫ କରାଯାଇ ନଥିବା ସୂଚନା ମିଳିଛି।
