ଭୁବନେଶ୍ୱର, ୨୬।୩: ବ୍ୟାଙ୍କ୍ରେ କ୍ୟାସିୟର୍ ଥିଲେ । ଏସି କ୍ୟାବିନ୍ରେ ବସୁଥିଲେ । ଦରମା କିଛି କମ୍ ନଥିଲା । ଭଲ ଦରମା ବି ମିଳୁଥିଲା । ହେଲେ ଏସବୁ ତାଙ୍କୁ ସନ୍ତୁଷ୍ଟ କରିପାରିଲାନି । ତାଙ୍କର ଲକ୍ଷ୍ୟ କିଛି ଅଲଗା ଥିଲା । ନିଜର ସ୍ୱତନ୍ତ୍ର ବ୍ୟବସାୟ ଛିଡ଼ା କରିବାର ଇଚ୍ଛା ଥିଲା । ସେଥିପାଇଁ ଚାକିରି ଛାଡ଼ି ବାହାରିପଡ଼ିଥିଲେ ରାସ୍ତାକଡ଼କୁ । ଆରମ୍ଭ କଲେ ବ୍ୟବସାୟ । ଏହି ସଫଳ ଯୁବକ ହେଉଛନ୍ତି କୃଷ୍ଣ କେଶବ ସାହୁ । ବୟସ ମାତ୍ର ୨୫ ବର୍ଷ । ତାଙ୍କ ଘର ବ୍ରହ୍ମପୁରରେ ହୋଇଥିବା ବେଳେ ସେ ବର୍ତ୍ତମାନ ଡମଣାରେ ରହୁଛନ୍ତି । ଗ୍ରାଜୁଏସନ୍ ପରେ ବ୍ୟବସାୟ କରିବା ଉଦ୍ଦେଶ୍ୟରେ ଏମ୍ବିଏ କରିଥିଲେ । ଏହାରି ଭିତରେ ବ୍ୟାଙ୍କ କ୍ୟାସିୟର ଚାକିରି ପାଇଥିଲେ । ଚାକିରି କରୁଥିଲେ ସତ, ହେଲେ ତିଳେ ହେଲେ ଇଚ୍ଛା ନ ଥିଲା ବ୍ୟାଙ୍କରେ କାମ କରିବାକୁ । ଘରଲୋକ ବାଧ୍ୟ କରିବାରୁ ଚାକିରି ଛାଡ଼ିନଥିଲେ ।
ବ୍ୟାଙ୍କ କ୍ୟାସିୟର ଭାବେ କୃଷ୍ଣଙ୍କୁ ମାସକୁ ୩୦ ହଜାରରୁ ଅଧିକ ଦରମା ମିଳୁଥିଲା । ହେଲେ ଚାକିରିରେ ମନ ଲାଗୁନଥିଲା । ପ୍ରାୟ ଦେଢ଼ ବର୍ଷ ପରେ ଚାକିରି ଛାଡ଼ିଦେଇଥିଲେ । ବ୍ୟାଙ୍କ ଦରମାରେ ପରିବାର ଗୁଜରାଣ ମେଣ୍ଟୁଥିବାରୁ ତାଙ୍କର ବଡ଼ ସଞ୍ଚୟ ନଥିଲା । ତେଣୁ ସେ ଚାକିରି ଛାଡ଼ିବା ପୂର୍ବରୁ ୪ ଲକ୍ଷ ଟଙ୍କାର ବ୍ୟାଙ୍କ ଋଣ କରିଥିଲେ । ଏହି ଟଙ୍କାରେ କିଟ୍ ଛକ ନିକଟରେ ଚିକେନ୍ ରୋଲ୍ ବ୍ୟବସାୟ ଆରମ୍ଭ କରିଥିଲେ । ତାଙ୍କ ଦୋକାନର ନାଁ ଦେଇଥିଲେ ‘ବ୍ୟାଙ୍କର୍ ରୋଲ୍ବାଲା’ । ବ୍ୟବସାୟର ପ୍ରଥମ ପର୍ଯ୍ୟାୟରେ କିଛି ଲାଭ ହୋଇନଥିଲା । ଏକ ଭଲ ଚାକିରି ଛାଡ଼ି ଷ୍ଟିଟ୍ ଫୁଡ୍ ଆରମ୍ଭ କରିଥିବାରୁ ଲୋକଙ୍କ ଟାହିଟାପରା ଶୁଣିବାକୁ ମିଳୁଥିଲା । ହେଲେ ଏହା ତାଙ୍କୁ ବିଶେଷ ପ୍ରଭାବିତ କରିପାରିନଥିଲା, ବରଂ ତାଙ୍କୁ ଆହୁରି ଆଗକୁ ବଢ଼ିବାକୁ ପ୍ରେରିତ କରୁଥିଲା । ଜାଣି ଆଶ୍ଚର୍ଯ୍ୟ ହେବେ, ଯେଉଁଠି ସେ ବ୍ୟାଙ୍କରେ ଚାକିରି କରି ୩୦ ହଜାର ଦରମା ପାଉଥିଲେ, ଏବେ ସେ ଏହି ବ୍ୟବସାୟରୁ ମାସକୁ ତା’ର ୩ଗୁଣା ରୋଜଗାର କରୁଛନ୍ତି । କୃଷ୍ଣ ପ୍ରାୟ ୧୪ ପ୍ରକାରର ରୋଲ୍ ବିକୁଛନ୍ତି, ଯାହାର ମୂଲ୍ୟ ୫୦ ଟଙ୍କାରୁ ୧୬୦ ଟଙ୍କା ପର୍ଯ୍ୟନ୍ତ ରହିଛି ।
କୃଷ୍ଣଙ୍କ କହିବା କଥା, ‘ମୁଁ ଏମ୍ବିଏ କରିବାବେଳେ ଫାଷ୍ଟ୍ଫୁଡ୍ ପାଇଁ ଲୋକଙ୍କ ଆଗ୍ରହ ଲକ୍ଷ୍ୟ କରିଥିଲି । ସେବେଠୁ ରୋଲ୍ ବ୍ୟବସାୟ କରିବାର ଇଚ୍ଛା ସୃଷ୍ଟି ହୋଇଥିଲା । ବ୍ୟବସାୟ ଆରମ୍ଭ କରିବାବେଳେ ଝାଡ଼ୁ ଦେବାଠାରୁ ବାସନ ମଜା ପର୍ଯ୍ୟନ୍ତ ସବୁ କାମ କରୁଥିଲି । କାରଣ ଲୋକ ରଖିବାକୁ ପାଖରେ ଟଙ୍କା ନଥିଲା । ସେ ସମୟରେ ଲୋକ ମୋ ଉପରେ ହସୁଥିଲେ, କହୁଥିଲେ ‘ଦେଖ ବ୍ୟାଙ୍କ ଚାକିରି ଛାଡ଼ି ବାସନ ମାଜୁଛି, ଝାଡ଼ୁ ଓଳଉଛି, ରୋଷେଇ କରୁଛି’ । ଆଉ ଆଜି ମୁଁ ମାସକୁ ପାଖାପାଖି ୮୦ ହଜାରରୁ ଟଙ୍କାରୁ ବି ଅଧିକ ରୋଜଗାର କରୁଛି ।‘ ବ୍ୟାଙ୍କର୍ ରୋଲ୍ବାଲା ରୋଲ୍ ଖାଇବା ପାଇଁ ସନ୍ଧ୍ୟାରେ ଲାଗୁଛି ଗ୍ରାହକଙ୍କର ଲମ୍ବା ଲାଇନ । ଆଗକୁ ସେ ସାରା ଓଡ଼ିଶାରେ ନିଜ ଷ୍ଟୋର୍ ଖୋଲିବା ପାଇଁ ଲକ୍ଷ୍ୟ ରଖିଛନ୍ତି । ଏହାବାଦ୍ ସେ ନିଜର ଫ୍ରାଞ୍ଚାଇଜ୍ ଖୋଲିବା ପାଇଁ ମଧ୍ୟ ଯୋଜନା କରିଛନ୍ତି । ଯାହାଦ୍ୱାରା ତାଙ୍କ ଭଳି ନୂଆ ବ୍ୟବସାୟ କରିବାକୁ ଯାଉଥିବା ଯୁବ ବ୍ୟବସାୟୀ ତାଙ୍କ ଲୋଗୋ ଓ ରେସିପି ବ୍ୟବହାର କରି ବ୍ୟବସାୟ ଆରମ୍ଭ କରିପାରିବେ ବୋଲି ସେ କହିଛନ୍ତି ।
