ନୀଳଗିରି,୨୧/୬ : ଗାଁରେ ଚାଲିଛି ମନ୍ତ୍ରପାଠ ଓ ହୋମଯଜ୍ଞ । ହରିବୋଲ, ହୁଳହୁଳି ଓ ଶଙ୍ଖ ଧ୍ବନିରେ ଗାଁରେ ଭକ୍ତିମୟ ପରିବେଶ ସୃଷ୍ଟି ହୋଇଛି । ମନ୍ତ୍ରତନ୍ତ୍ରରେ ବିବାହ ବନ୍ଧନରେ ବାନ୍ଧି ହୋଇଛନ୍ତି ବର କନ୍ୟା। ବରକନ୍ୟା ବେଶରେ ସଜେଇ ହୋଇଛି ଗ୍ରାମରେ ଥିବା ବର ଓ ଅଶ୍ୱସ୍ତ ଗଛ । ପରମ୍ପରା, ବିଶ୍ବାସ ଓ ପରିବେଶ ସନ୍ତୁଳନ ସାଙ୍ଗକୁ ରୀତିନୀତିରେ ବାହାଘର ହୋଇଛନ୍ତି ଏହି ଦୁଇ ଗଛ । ଏଭଳି ନିଆରା ପରମ୍ପରା ନୀଳଗିରି ଉପଖଣ୍ଡ ଔପଦା ବ୍ଲକ ଗାଙ୍ଗପୁରା ଗାଁରେ ଦେଖିବାକୁ ମିଳିଛି ।
ସୂଚନାଯୋଗ୍ୟ ଯେ, ଗାଙ୍ଗପୁରା ଗାଁର ପରମାନନ୍ଦ ମହାଳିକ ଓ ତାଙ୍କ ସ୍ତ୍ରୀ ପାଞ୍ଚାଳୀ ଗ୍ରାମରେ ବର ଓ ଅଶ୍ୱସ୍ତ ଗଛ ଲଗାଇଥିଲେ । ଆଜି ଏହି ଗଛ ଦୁଇଟି ବଡ଼ ହୋଇଥିବାବେଳେ ପରମ୍ପରା ଅନୁସାରେ ସେମାନଙ୍କ ବାହାଘର ନେଇ ମାନସିକ କରିଥିଲେ। ସମ୍ପୂର୍ଣ୍ଣ ବୈଦିକ ରୀତିନୀତିରେ ବାହାଘର ସମ୍ପନ୍ନ ଆଜି ହୋଇଛି । ହୋମଯଜ୍ଞରେ ପୂଜା ପାଠ ହୋଇ ଏହି ନୀତି ପୂଜା ସମାପନ କରିଛନ୍ତି ପୂଜକ । ପରେ ଗ୍ରାମବାସୀଙ୍କ ପାଇଁ ବିବାହ ଭୋଜି ଆୟୋଜନ କରାଯାଇଥିବାବେଳେ ଗ୍ରାମବାସୀ ଏହି ଉତ୍ସବରେ ଯୋଗଦେଇ ଆଶିଷ ନେବା ସହ ଭୋଜି ଖାଇଛନ୍ତି।
