ଯୁବତୀଙ୍କ ଝୁଲନ୍ତା ମୃତଦେହ ଉଦ୍ଧାର, ଆତ୍ମହତ୍ୟା ସନ୍ଦେହ !
ମନମୁଣ୍ଡା, ୩୧।୩: ମନମୁଣ୍ଡା ଥାନା ଶିମିଳିପଦର ପଞ୍ଚାୟତ ପଥର୍ଲା ଗ୍ରାମର ଏକ ଘରୁ ଆଜି ଜଣେ ଯୁବତୀଙ୍କ ଝୁଲାନ୍ତ ମୃତଦେହ ଉଦ୍ଧାର କରାଯାଇଛି । ମୃତକା ଉକ୍ତ ଗ୍ରାମର ଜଗବନ୍ଧୁ ବାଘଙ୍କ ୨୦ ବର୍ଷୀୟ ଝିଅ ମାମି ବାଘ ବୋଲି ଜଣାପଡ଼ିଛି । ପରିବାରବର୍ଗ ଆଜି ଅପରାହ୍ନ ସମୟରେ କାମାଧାମରୁ ଫେରି ଘଟଣା ଦେଖି ପୁଲିସକୁ ସୂଚନା ଦେଇଥିଲେ ।
ପୁଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇ ଦେଇଥିବାବେଳେ ତାହାର ତଦନ୍ତ ଚଲାଇଛି । ସୂଚନା ଅନୁସାରେ, ଆଜି ମଧ୍ୟାହ୍ନ ସମୟରେ ମାମି ବାଘଙ୍କ ବ୍ୟତୀତ ଘରେ ଅନ୍ୟ କେହି ନ ଥିଲେ । ଏହାର ସୁଯୋଗ ନେଇ ସେ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି । ମାମି କିଛି ଦିନ ହେବ ମାନସିକ ବିକୃତ ଥିଲେ । ତାଙ୍କ ବାପା ମାଆ ଓ ଦୁଇ ଭାଇ କୌଣସି କାମରେ ବାହାରକୁ ଯାଇଥିବା ସମୟରେ ଘରେ ଏକୁଟିଆ ଥିବା ସୁଯୋଗ ନେଇ ଘର ଛାତରେ ଥିବା ଲୁହା ହୁକରେ ରସି ଲଗାଇ ଆତ୍ମହତ୍ୟା କରିଥିବା ପରିବାର ବର୍ଗ କହିଛନ୍ତି ।
