କଟକ,୨୪/୧୧: ଚଳିତବର୍ଷ  ବାଲିଯାତ୍ରାରେ ଏକାଧିକ ଅଭାବନୀୟ ଘଟଣା ଦେଖିବାକୁ ମିଳିଛି । ଯାତ୍ରାର ୮ ଦିନ ଭିତରେ  ପଡ଼ିଆ ଭିତରେ ବିଭିନ୍ନ କାରଣରୁ ୫ ଜଣଙ୍କ  ଜୀବନ ଯାଇଛି । ଜଣେ ଛାତ୍ର ବିଦ୍ୟୁତ୍‌  ସଂସ୍ପର୍ଶରେ ଆସି ପ୍ରାଣ ହରାଇଥିବା ବେଳେ  ଅନ୍ୟ ୪ ଜଣଙ୍କର ହୃଦ୍‌ଘାତରେ ମୃତ୍ୟୁ  ଘଟିଥିବା ଅଭିଯୋଗ ହୋଇଛି । 

ବାଲିଯାତ୍ରା  ଇତିହାସରେ ଏହା ପ୍ରଥମ ବୋଲି କୁହାଯାଉଛି । ବାଲିଯାତ୍ରା ବୁଲିବାକୁ ଆସିଥିବା ଜଣେ  ଯୁବକଙ୍କର ଶୁକ୍ରବାର ଅକାଳ ମୃତ୍ୟୁ ଘଟିଥିଲା ।  ମୃତ ଯୁବକ ହେଲେ ଗଞ୍ଜାମ ଜିଲ୍ଲା ଭଞ୍ଜନଗର  ବ୍ଲକ ତାରା ସିଂ ଥାନା ଅଧୀନ ଗାଲେରୀ ଗ୍ରାମର  ପ୍ରମୋଦ ନାଥ ସାହୁ (୧୮) । ସେ ବି.ଟେକ୍‌  ଛାତ୍ର । ହୃଦ୍‌ଘାତରେ ତାଙ୍କର ମୃତ୍ୟୁ ଘଟିଥିବା  ଜଣାପଡ଼ିଛି । ଶୁକ୍ରବାର ମଧ୍ୟାହ୍ନରେ ପ୍ରମୋଦ  ତାଙ୍କର ୪ ଜଣ ସାଙ୍ଗଙ୍କ ସହ ବାଲିଯାତ୍ରା  ପଡ଼ିଆକୁ ଆସି ବୁଲାବୁଲି କରିଥିଲେ ।  ସାଙ୍ଗମାନେ ଏକାଠି ହୋଇ ବୋଇତ  ଗେଟ୍‌ ସମ୍ମୁଖରେ ସେଲ୍‌ଫି ନେଉଥିଲେ । ଏତିକିବେଳେ ପ୍ରମୋଦ ହଠାତ ଅସୁସ୍ଥ  ହୋଇ ତଳେ ପଡ଼ିଗଲେ । ସାଙ୍ଗମାନେ  ମୁହଁରେ ପାଣି ଛିଞ୍ଚିଲା ପରେ ବି ସେ ଉଠି ନ  ଥିଲେ । ଏହା ଦେଖି ନିକଟସ୍ଥ ଏଡ୍‌ପୋଷ୍ଟରୁ  ପୁଲିସ କର୍ମଚାରୀ ଆସି ତୁରନ୍ତ ଏସ୍‌ସିବି  ନେଇଯାଇଥିଲେ । ଡାକ୍ତର ସେଠାରେ ତାଙ୍କୁ  ମୃତ ଘୋଷଣା କରିଥିଲେ । ହୃଦ୍‌ଘାତରେ  ପ୍ରମୋଦଙ୍କର ମୃତ୍ୟୁ ହୋଇଥିବା ଡାକ୍ତରମାନେ  ଆଶଙ୍କା କରୁଛନ୍ତି । ବ୍ୟବଚ୍ଛେଦ ପରେ  ପରିବାରକୁ ମୃତଦେହ ହସ୍ତାନ୍ତର କରାଯାଇଛି ।  

ଏହା ପୂର୍ବରୁ ଗୁରୁବାର ରାତିରେ ଓର୍‌ମାସ୍‌  ଷ୍ଟଲ୍‌ରେ ପୁରୀ ଗୋପ ବ୍ଲକ ଅନ୍ତର୍ଗତ ଇଚ୍ଛାପୁର  ଗାଁର ୭୬ ବର୍ଷୀୟ ଘନଶ୍ୟାମ ବାରିକଙ୍କର ମୃତ୍ୟୁ ହୋଇଥିଲା । ଷ୍ଟଲ୍‌ ନମ୍ୱର ୨୦୬ରେ କାମ  କରୁଥିବା ବେଳେ ରାତି ପ୍ରାୟ ସାଢ଼େ ୧୦ଟାରେ  ସେ ତଳେ ପଡ଼ିଗଲେ । ଡାକ୍ତରଖାନାରେ ତାଙ୍କୁ  ମୃତ ଘୋଷଣା କରାଗଲା । ସେହିପରି ଶୁକ୍ରବାର  ସକାଳେ ବାଲିଯାତ୍ରା ପଡ଼ିଆର ବୋଇତ ଗେଟ  ନିକଟରେ ରିଂବନ୍ଧ କଡ଼ରୁ ଜଣେ ଦିବ୍ୟାଙ୍ଗ  ବୃଦ୍ଧ ବ୍ୟକ୍ତିଙ୍କ ମୃତଦେହ ମିଳିଥିଲା । ପାଖରେ  ଏକ ଟ୍ରାଇସାଇକେଲ ରହିଥିଲା । ତାଙ୍କ  ପରିଚୟ ମିଳିନି । 

ସେହିପରି ମଙ୍ଗଳବାର  ସନ୍ଧ୍ୟାରେ ଛତିଆ ସୋଲର ସ୍ଥିତ ଉଦାସ  ଆଶ୍ରମର ପ୍ରତିଷ୍ଠାତା ସ୍ୱାମୀ ଯଜେ୍ଞଶ୍ୱରାନନ୍ଦ  ତଳ ପଡ଼ିଆରେ ଯଜ୍ଞାନୁଷ୍ଠାନ ଓ ମହାନଦୀ  ମହାଆଳତି ସାରିବା ପରେ କିଛି ଶିଷ୍ୟଙ୍କ  ସହ ଓରମାସ୍‌ ଷ୍ଟଲ୍‌ ବୁଲିବାକୁ ଯାଇଥିଲେ ।  ପରେ ଶିଶୁ ସୁରକ୍ଷା ଷ୍ଟଲ୍‌ରେ ବାଲ୍ୟ ବିବାହ  ବନ୍ଦ ସହ ଶିଶୁ ଶ୍ରମିକ ଉଚ୍ଛେଦ ପାଇଁ  ସଚେତନ କରିଥିଲେ । ପରେ ଛାତିରେ ଯନ୍ତ୍ରଣା  ହେବାରୁ ତାଙ୍କୁ ସିଡିଏ ସ୍ଥିତ ଏକ ହସ୍ପିଟାଲ୍‌କୁ  ନିଆଯାଇଥିଲା । ଡାକ୍ତର ତାଙ୍କୁ ମୃତ ଘୋଷଣା  କରିଥିଲେ । ଯାତ୍ରା ଆରମ୍ଭ ହେବାର ମାତ୍ର ଦୁଇ  ଦିନ ପରେ ଅର୍ଥାତ୍‌ ରବିବାର ରାତିରେ ଜଣେ  ଛାତ୍ର ବିଦ୍ୟୁତ୍‌ ସଂସ୍ପର୍ଶରେ ଆସି ମୃତ୍ୟୁ ମୁଖରେ  ପଡ଼ିଥିଲେ । ଜଗତସିଂହପୁର ଜିଲ୍ଲା ଜୟବଡ଼ର  ପ୍ରଭାକର ମନ୍ଥନଙ୍କ ପୁଅ ବିଶ୍ୱପ୍ରକାଶ ମନ୍ଥନ  କଟକର ଏକ ବେସରକାରୀ ଶିକ୍ଷାନୁଷ୍ଠାନରେ  ଯୁକ୍ତ ଦୁଇ ପଢୁଥିଲେ । ବିଶ୍ୱପ୍ରକାଶ କିଛି  ସାଙ୍ଗଙ୍କ ସହିତ ବାଲିଯାତ୍ରା ବୁଲିବାକୁ  ଆସିଥିଲେ । ରାତି ପ୍ରାୟ ସାଢ଼େ ୯ଟାରେ  ବିଶ୍ୱପ୍ରକାଶ ରିଂ ବନ୍ଧର ମଝି ବାଡ଼କୁ ଅତିକ୍ରମ  କଲା ବେଳେ ବିଜୁଳି ଲିଚୁ ତାର ସଂସ୍ପର୍ଶରେ  ଆସିବାରୁ ତାଙ୍କର ମୃତ୍ୟୁ ହୋଇଥିଲା।