ୱାଶିଂଟନ,୧୨/୦୬: ଆମେରିକା ଏବଂ ଚୀନ୍ ମଧ୍ୟରେ ବାଣିଜ୍ୟ ଚୁକ୍ତି ଘୋଷଣା ହୋଇଛି । ନିଜେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ଘୋଷଣା କରିଛନ୍ତି । ଏହି ବୁଝାମଣା ଅନ୍ତର୍ଗତ ଚୀନ୍ ଏବେ ଆମେରିକାକୁ ରେୟାର୍ ଆର୍ଥ ଉପାଦାନ ଯୋଗାଇବ । ରେୟାର୍ ଆର୍ଥ ଉପାଦାନ ପ୍ରଯୁକ୍ତି ଉପକରଣ, ସ୍ମାର୍ଟଫୋନ୍ ଏବଂ ଇଲେକ୍ଟ୍ରିକ୍ କାର ଭଳି କ୍ଷେତ୍ରରେ ବହୁଳ ବ୍ୟବହାର ହୋଇଥାଏ । ତେବେ ରେୟାର୍ ଆର୍ଥ ବଦଳରେ ଚୀନ୍ ଛାତ୍ରଛାତ୍ରୀଙ୍କୁ ଆମେରିକା ଏହାର କଲେଜ୍ ଏବଂ ବିଶ୍ୱବିଦ୍ୟାଳୟଗୁଡ଼ିକରେ ପଢ଼ିବା ପାଇଁ ଅନୁମତି ଦେବ ।
ଟ୍ରମ୍ପ ଏହା ମଧ୍ୟ କହିଛନ୍ତି ଯେ, ନୂଆ ଡିଲ୍ ଦ୍ୱାରା ଟାରିଫ୍ ଅର୍ଥାତ୍ ଆମଦାନି ଶୁଳ୍କକୁ ନେଇ ଆମେରିକାକୁ ୫୫% ଲାଭ ମିଳୁଛି । ଅନ୍ୟପକ୍ଷରେ, ଚୀନ୍କୁ ମାତ୍ର ୧୦% ଲାଭ ମିଳିବ । ତେବେ ଏହା ସ୍ପଷ୍ଟ ହୋଇନାହିଁ ଯେ, ଉକ୍ତ ଟାରିଫ୍ ବ୍ୟବସ୍ଥାର ସମ୍ପୂର୍ଣ୍ଣ ଅର୍ଥ କ’ଣ ଏବଂ ଏହା କିଭଳି କାର୍ଯ୍ୟ କରିବ ।
ପ୍ରକାଶଯୋଗ୍ୟ, ରେୟାର୍ ଆର୍ଥ ଉପାଦାନ ମୋଟ ୧୭ଟି ରହିଛି । ସେଗୁଡ଼ିକ ମଧ୍ୟରେ ଲାନ୍ଥନମ୍, ନିୟୋଡିୟମ, ପ୍ରାସିୟୋଡିୟମ ଭଳି ଖଣିଜ ପଦାର୍ଥ ଅନ୍ତର୍ଭୁକ୍ତ । ଏହା ଦେଖିବାକୁ ସାଧାରଣ ଖଣିଜ ଭଳି କିନ୍ତୁ ଏଥିରେ ବିଶେଷ ମ୍ୟାଗ୍ନେଟିକ୍ ଏବଂ ଇଲେକ୍ଟ୍ରୋନିକ୍ ଗୁଣ ଥାଏ, ଯାହା ଏହାକୁ ପ୍ରଯୁକ୍ତି ଉପକରଣଗୁଡ଼ିକ ପାଇଁ ଜରୁରୀ ବନାଇଥାଏ । ଏହାକୁ ରେୟାର ବା ଦୁର୍ଲଭ କୁହାଯାଇଥାଏ କାରଣ ଏହା ପୃଥିବୀର ବହୁ ତଳେ ରହିଥାଏ । ଏହାର ଉତ୍ତୋଳନ ଏବଂ ବିଶୋଧନ ପ୍ରକ୍ରିୟା ଅତ୍ୟନ୍ତ ଜଟିଳ ଓ ମହଙ୍ଗା ହୋଇଥାଏ ।
ରେୟାର୍ ଆର୍ଥ ଖଣିଜ ପଦାର୍ଥର ବ୍ୟବହାର କେତେକ ଆଧୁନିକ ପ୍ରଯୁକ୍ତି ଏବଂ ଶିଳ୍ପରେ ହୋଇଥାଏ । ଏଥିମଧ୍ୟରେ ରହିଛି ସ୍ମାର୍ଟଫୋନ୍, ଲାପ୍ଟପ୍ ଏବଂ ଟିଭି ଭଳି ଇଲେକ୍ଟ୍ରୋନିକ୍ସ ଉପକରଣ, ଇଲେକ୍ଟ୍ରିକ୍ ଯାନ, ପବନ ଟର୍ବାଇନ୍, ସୌର ପ୍ୟାନେଲ ଏବଂ ବ୍ୟାଟେରି । ଚୀନ୍ ରେୟାର୍ ଆର୍ଥ ଖଣିଜ କ୍ଷେତ୍ରରେ ବିଶ୍ୱର ସର୍ବବୃହତ୍ ଉତ୍ପାଦକ । ଏହା ବିଶ୍ୱର ୬୦ରୁ ୭୦% ଚାହିଦା ପୂରଣ କରିଥାଏ । ୨୦୨୩ ସୁଦ୍ଧା ଚୀନ୍ ଏହାର ଖନନ ଏବଂ ବିଶୋଧନ ପ୍ରକ୍ରିୟାରେ ବଡ଼ ମାତ୍ରାରେ ନିବେଶ କରିଛି । ଟ୍ରମ୍ପ ଚୁକ୍ତିରେ ମୋହର ଲଗାଇଥିବାବେଳେ ଏବେ ଏହାକୁ ଅନ୍ତିମ ରୂପ ଦେବା ପାଇଁ ଚୀନ୍ ରାଷ୍ଟ୍ରପତି ସି. ଜିନ୍ପିଙ୍ଗ୍ଙ୍କ ମଞ୍ଜୁରି ଲାଗି ଅପେକ୍ଷା ରହିଛି ।
ଏହାପୂର୍ବରୁ ଆମେରିକାର ବାଣିଜ୍ୟ ସଚିବ ହାୱାର୍ଡ ଲୁଟ୍ନିକ୍ କହିଥିଲେ ଯେ, ଉଭୟ ଦେଶ ଜେନେଭାରେ ପୂର୍ବରୁ ହୋଇଥିବା ବୁଝାମଣାକୁ ଚୂଡ଼ାନ୍ତ ରୂପ ଦେବା ପାଇଁ ପ୍ରସ୍ତୁତ ଅଛନ୍ତି । ଚୀନ୍ର ବ୍ୟାପାର ମାମଲାର ବରିଷ୍ଠ ଅଧିକାରୀ ଲି. ଚେଙ୍ଗ୍ଗାଙ୍ଗ୍ ମଧ୍ୟ ସମାନ କଥା କହିଥିଲେ।
