ନୂଆଦିଲ୍ଲୀ,୩୧/୦୭: ଡୋନାଲ୍ଡ ଟ୍ରମ୍ପଙ୍କ ଟାରିଫ୍ ଘୋଷଣା ପରେ ଖସିଲା ସେୟାର ମାର୍କେଟ । ସେନସେକ୍ସ ୬ ଶହ ପଏଣ୍ଟରୁ ଅଧିକ ଓ ନିଫଟି ୧୫୦ ପଏଣ୍ଟରୁ ଅଧିକ ହ୍ରାସ ପାଇଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଭାରତରୁ ଆମଦାନି ହେଉଥିବା ସମସ୍ତ ଉତ୍ପାଦ ଉପରେ ୨୫% ଟିକସ ଲାଗୁ ନେଇ ଘୋଷଣା କରିବା ପରେ ଏହାର ସିଧାସଳଖ ପ୍ରଭାବ ଭାରତୀୟ ସେୟାର ବଜାର ଉପରେ ପଡ଼ିଛି। ଅଗଷ୍ଟ ପହିଲାରୁ ନୂଆ ଟାରିଫ୍ ଲାଗୁ ହେବ। ରୁଷରୁ ଭାରତର ତୈଳ ଆମଦାନି ଏବଂ ଦୀର୍ଘ ଦିନ ଧରି ରହିଥିବା ବାଣିଜ୍ୟିକ ପ୍ରତିବନ୍ଧକକୁ ଦୃଷ୍ଟିରେ ରଖି ଏହି ପଦକ୍ଷେପ ନେଇଛନ୍ତି ଟ୍ରମ୍ପ। । ସେପଟେ ଟିକସକୁ ନେଇ ନିବେଶକଙ୍କ ମଧ୍ୟରେ ଚିନ୍ତା ବଢିଯାଇଛି ।
ମାର୍କେଟ ଖୋଲିବା ବେଳକୁ ବିଏସଇ ସେନସେକ୍ସ ୬ ଶହ ହ୍ରାସ ପାଇ ୮୧,୦୦୬.୬୫ ରେ ଏବଂ ନିଫଟି ୧୫୦ ପଏଣ୍ଟ ହ୍ରାସ ପାଇ ୨୪୬୮୮ରେ କାରବାର କରୁଥିଲା। ବିଏସଇର ଶ୍ରେଷ୍ଠ ୩୦ଟି କମ୍ପାନି ମଧ୍ୟରୁ ୨୬ଟି ସେୟାରରେ ବଡ଼ ହ୍ରାସ ଘଟିଥିଲା, ଯେଉଁଥିରେ ଟାଟା ମୋଟର୍ସ, ଆରଆଇଏଲ, ଏମ ଆଣ୍ଡ ଏମ ଏବଂ ଭାରତୀ ଏୟାରଟେଲ ଭଳି କମ୍ପାନିର ସେୟାରରେ ପ୍ରାୟ ୨ ପ୍ରତିଶତ ସର୍ବାଧିକ ହ୍ରାସ ପରିଲକ୍ଷିତ ହୋଇଥିଲା। ସେହି ସମୟରେ, ୪ଟି କମ୍ପାନିର ସେୟାରରେ ବୃଦ୍ଧି ଘଟିଥିଲା, ଯେଉଁଥିରେ ଜୋମାଟୋର ସେୟାରରେ ଅଧିକ ବୃଦ୍ଧି ଘଟିଥିବା ଜଣାଯାଇଛି। ସୋସିଆଲରେ ଟ୍ରମ୍ପ କହିଛନ୍ତି, ଭାରତକୁ ଆମେରିକାର ବନ୍ଧୁ ରାଷ୍ଟ୍ର ଭାବେ ଗ୍ରହଣ କରାଯାଉଥିଲେ ସୁଦ୍ଧା ଦୁଇ ଦେଶ ମଧ୍ୟରେ ବାଣିଜ୍ୟ ସମ୍ପର୍କ ସୀମିତ ରହିଛି। ଭାରତ ଏକ ବନ୍ଧୁ ରାଷ୍ଟ୍ର ହୋଇଥିଲେ ବି ଭାରତ ସହ ଆମେରିକା କମ ବାଣିଜ୍ୟ କରିଛି। କାରଣ ଭାରତର ଟାରିଫ୍ ଅଧିକ ରହିଆସିଛି। ଏହା ସହ ରୁଷ ସହିତ ଭାରତର ପ୍ରତିରକ୍ଷା ଓ ଶକ୍ତି ସମ୍ପର୍କ ବି ଏହି ଟାରିଫ ବୃଦ୍ଧିର ଅନ୍ୟ ଏକ କାରଣ ହୋଇଛି।
