ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନୂଆ ଟାରିଫ୍ ନୀତି ବିଶ୍ୱ ଅର୍ଥନୀତିକୁ ଏକ ନୂଆ ସଙ୍କଟ ଆଡ଼କୁ ନେଇଯାଇଛି। ଟ୍ରମ୍ପଙ୍କ ଘୋଷଣା ଅନୁସାରେ ଚୀନ୍ରୁ ଆମଦାନି ହେଉଥିବା ସାମଗ୍ରୀ ଉପରେ ଅତିରିକ୍ତ ୩୪ ପ୍ରତିଶତ ଶୁଳ୍କ ଲାଗୁ କରାଯାଇଛି। ଯାହା ଫଳରେ ଚୀନ୍ ଉପରେ ମୋଟ ଶୁଳ୍କ ୫୪ ପ୍ରତିଶତକୁ ପହଞ୍ଚିଛି। ଏହାର ଜବାବରେ ଚୀନ୍ ମଧ୍ୟ ଆମେରିକୀୟ ସାମଗ୍ରୀ ଉପରେ ୩୪ ପ୍ରତିଶତ ଅତିରିକ୍ତ ଶୁଳ୍କ ଲଗାଇ ପାଲଟା ଜବାବ ଦେଇଛି। ଆସନ୍ତା ଏପ୍ରିଲ୍ ୧୦ତାରିଖରୁ ଚୀନ ଏହି ନୂଆ ଶୁଳ୍କ ଆମେରିକା ଉପରେ ଲାଗୁ କରିବାକୁ ଯାଉଛି। ଏହି ଘଟଣାକ୍ରମ ବିଶ୍ୱ ବଜାରରେ ଏକ ବଡ଼ ଧରଣର ଅସ୍ଥିରତା ସୃଷ୍ଟି କରିଛି ଏବଂ ଅର୍ଥନୀତିବିତ୍ମାନେ ଏକ ବିଶ୍ୱବ୍ୟାପୀ ମାନ୍ଦାବସ୍ଥାର ଆଶଙ୍କା ପ୍ରକାଶ କରିଛନ୍ତି।
ବିଶ୍ୱ ବଜାରରେ ପ୍ରଭାବ
ଟ୍ରମ୍ପଙ୍କ ଏହି ନୀତି ଘୋଷଣା ପରେ ଆମେରିକାର ଷ୍ଟକ୍ ବଜାରରେ ବଡ଼ ଧରଣର ପତନ ଦେଖିବାକୁ ମିଳିଛି। ଡାଓ ଜୋନ୍ସ ଇଣ୍ଡଷ୍ଟ୍ରିଆଲ୍ ଆଭରେଜ୍ ୪ ପ୍ରତିଶତ ଏବଂ ଏସ୍ଆଣ୍ଡପି ୫୦୦ ପ୍ରାୟ ୫ ପ୍ରତିଶତ ହ୍ରାସ ପାଇଛି। ଏହା ସହିତ ନାସଡାକ୍ରେ ମଧ୍ୟ ୬ ପ୍ରତିଶତ ପତନ ହୋଇଛି, ଯାହା ୨୦୨୦ ମହାମାରୀ ସମୟ ପରେ ସବୁଠାରୁ ବଡ଼ ଏକଦିନିଆ ହ୍ରାସ। ଏହି ପତନ କେବଳ ଆମେରିକାରେ ସୀମିତ ନାହିଁ; ୟୁରୋପ ଏବଂ ଏସିଆର ବଜାରଗୁଡ଼ିକରେ ମଧ୍ୟ ଏହାର ପ୍ରଭାବ ଦେଖାଦେଇଛି। ବିଶ୍ୱବ୍ୟାପୀ ନିବେଶକମାନେ ଆଉ ଏକ ମାନ୍ଦାବସ୍ଥାର ସମ୍ଭାବନାକୁ ନେଇ ଆତଙ୍କିତ ହୋଇପଡିଛନ୍ତି।
ଚୀନ୍ର ପ୍ରତିକ୍ରିୟା
ଚୀନ୍ ଏହି ଟାରିଫ୍କୁ "ଅନ୍ୟାୟ" ବୋଲି କହିବା ସହ ବାଣିଜ୍ୟକୁ ଅସ୍ତ୍ର ରୂପେ ବ୍ୟବହାର କରିବା ବିରୁଦ୍ଧରେ ଆମେରିକାକୁ ଚେତାବନୀ ଦେଇଛି। ଚୀନ୍ର ବାଣିଜ୍ୟ ମନ୍ତ୍ରଣାଳୟ କହିଛି ଯେ, ଚାଇନା ନିଜର ଅଧିକାର ଏବଂ ସ୍ୱାର୍ଥକୁ ରକ୍ଷା କରିବା ପାଇଁ ଦୃଢ଼ ପଦକ୍ଷେପ ନେବ। ଏହି ପାଲଟା ଶୁଳ୍କ ଆମେରିକୀୟ କୃଷି ଉତ୍ପାଦ, ତୈଳ ଏବଂ ଅନ୍ୟାନ୍ୟ ଶିଳ୍ପ ଉପରେ ପ୍ରଭାବ ପକାଇବ ବୋଲି ଆଶା କରାଯାଉଛି।
ଟ୍ରମ୍ପଙ୍କ ବୟାନ
ଟ୍ରମ୍ପ ଏହି ଟାରିଫ୍କୁ ସମର୍ଥନ କରିଛନ୍ତି। ଏହା ଫଳରେ ଆମେରିକାର ଅନ୍ୟ ଦେଶ ଗୁଡିକ ସହ ଥିବା ବାଣିଜ୍ୟ ଅଭାବ ଶେଷ କରିବ ଏବଂ ଦେଶରେ ଉତ୍ପାଦନ କ୍ଷେତ୍ରରେ ଚାକିରିର ସମ୍ଭାବନାକୁ ବଢାଇବ। ସେ ନିଜର ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲ୍ରେ ଲେଖିଛନ୍ତି, "ଏହା ଏକ ବଡ଼ ଓ ସୁନ୍ଦର ଡିଲ୍, ଯାହା ଆମ ଅର୍ଥନୀତିକୁ ସୁପରଚାର୍ଜ କରିବ।" ସେ ଚୀନ୍ର ପ୍ରତିକ୍ରିୟାକୁ "ଭୁଲ୍ ଖେଳ" ବୋଲି କହି ଏହାର କଡା ସମାଲୋଚନା କରିଛନ୍ତି।
ଭାରତ ଉପରେ ପ୍ରଭାବ
ଟ୍ରମ୍ପଙ୍କ ଟାରିଫ୍ ତାଲିକାରେ ଭାରତ ଉପରେ ମୋଟ୍ ୨୭ ପ୍ରତିଶତ ଶୁଳ୍କ ଲାଗୁ କରାଯାଇଛି। ଯାହା ଚୀନ୍ ଓ ଭିଏତନାମ (୪୬%) ତୁଳନାରେ କମ୍। ତେବେ ଅର୍ଥନୀତିବିତ୍ମାନେ ଚେତାବନୀ ଦେଇଛନ୍ତି ଯେ, ବିଶ୍ୱବ୍ୟାପୀ ବାଣିଜ୍ୟ ଯୁଦ୍ଧ ଭାରତୀୟ ଅର୍ଥନୀତିକୁ ମଧ୍ୟ ପ୍ରଭାବିତ କରିପାରେ। ଭାରତ ସରକାର ଏହି ପରିସ୍ଥିତିର ମୂଲ୍ୟାଙ୍କନ ପାଇଁ ଉଚ୍ଚସ୍ତରୀୟ ବୈଠକ ଡାକିଛନ୍ତି।
ଅର୍ଥନୀତିବିତ୍ଙ୍କ ଆଶଙ୍କା
ଅନେକ ଅର୍ଥନୀତିବିତ୍ ଆଶଙ୍କା କରିଛନ୍ତି ଯେ, ଏହି ଟାରିଫ୍ ଯୁଦ୍ଧ ୧୯୩୦ ସ୍ମୁଟ୍-ହାଓ୍ଵଲେ ଟାରିଫ୍ ଆକ୍ଟ ପରି ଏକ ବିଶ୍ୱବ୍ୟାପୀ ମାନ୍ଦାବସ୍ଥାର କାରଣ ହୋଇପାରେ। ଆମେରିକାର କେନ୍ଦ୍ରୀୟ ବ୍ୟାଙ୍କ ମୁଖ୍ୟ ଜେରୋମ୍ ପାଓ୍ଵେଲ୍ କହିଛନ୍ତି, "ଏହା ଉଚ୍ଚ ମୂଲ୍ୟବୃଦ୍ଧି ଏବଂ କମ୍ ଅର୍ଥନୈତିକ ଅଭିବୃଦ୍ଧିର କାରଣ ହୋଇପାରେ।"
ଏହି ଘଟଣାକ୍ରମ ବିଶ୍ୱ ଅର୍ଥନୀତି ପାଇଁ ଏକ ନିର୍ଣ୍ଣାୟକ ମୋଡ଼ ହୋଇପାରେ, ଏବଂ ଆଗାମୀ ଦିନରେ ଏହାର ପ୍ରଭାବ କିପରି ପଡ଼ିବ, ତାହା ଉପରେ ସମସ୍ତଙ୍କ ନଜର ରହିଛି।
