ଜହ୍ନ।ପଙ୍କ, ୨୮/୭: ସ୍ୱାଧୀନତାର ସାତ ଦଶନ୍ଧି ପରେ ମଧ୍ୟ ଗାଁ ରାସ୍ତାରେ ମୁଠାଏ ମାଟି କି ମୋରମ ପଡି ପାରୁନି। ଫଳରେ ଗ୍ରାମବାସି ବର୍ଷା ଚାରି ମାସ ଯମ ଯନ୍ତ୍ରଣା ଭୋଗୁଛନ୍ତି। ଏ ହେଉଛି ବୌଦ୍ଧ ବ୍ଲକ ଆଦିବାସୀ ଅନୁନ୍ନତ ଟିକରପଡା ପଂଚାୟତ ଅନ୍ତର୍ଗତ ତୁତୁମ ସିଂ ଗାଁର ଦୃଶ୍ୟ।
ସାମାନ୍ୟ ବର୍ଷା ହେଲେ ଗ୍ରାମବାସୀ ସାଇକେଲରେ ଯିବା ତ ଦୂରର କଥା ଚାଲିକି ଯିବା ଅସମ୍ଭବ ହୋଇପଡେ। କାହାର ଦେହ ଖରାପ ହେଲେ ଆମ୍ବୁଲାନ୍ସ ଯାଇ ପାରୁନଥିବାରୁ ଲୋକେ ଖଟରେ ଦୋଳା କରି ବଘିଆପଡା-ଟିକରପଡା ମୁଖ୍ୟ ରାସ୍ତାକୁ ଆଣନ୍ତି। ସେଠାରୁ ଆମ୍ବୁଲାନ୍ସ ଯୋଗେ ଡାକ୍ତରଖାନା ନେବାକୁ ପଡେ। ବେଳେ ବେଳେ ଗୁରୁତର ରୋଗୀ ମୃତ୍ୟୁମୁଖରେ ପଡିବା ଭଳି ନଜିର ରହିଛି।
ତେବେ ସୋମବାର ଟିକରପଡା ପଂଚାୟତରେ ଜନଶୁଣାଣୀ ଥିବାରୁ ଆଜି ତଳି ରୋଇ ପ୍ରତିବାଦ କରିଛନ୍ତି। ହେଲେ ମଧ୍ୟ ଜିଲ୍ଲାପାଳଙ୍କ କାନକୁ ଏକଥା ପହଂଚି ନପାରିବାରୁ ଶେଷରେ ଗ୍ରାମବାସୀ ଜନଶୁଣାଣୀରେ ରାସ୍ତା ମରାମତି ପାଇଁ ଅଭିଯୋଗ କରିଛନ୍ତି। ଏନେଇ ପିଇଓ ହିମାଂଶୁ ପ୍ରଧାନଙ୍କୁ ପଚାରିବାରୁ ରାସ୍ତା ଉନ୍ନତି କରଣ ପାଇଁ ଅନୁଦାନ ଦିଆଯାଇଛି। କିନ୍ତୁ ଗ୍ରାମବାସୀଙ୍କ ମଧ୍ୟରେ ସମନ୍ୱୟ ଅଭାବରୁ କାର୍ଯ୍ୟ ଆଗେଇ ପାରୁନାହିଁ ବୋଲି ସୂଚନା ପ୍ରଦାନ କରିଛନ୍ତି।
