କୋଲକାତା,୨୦/୦୩: ପଶ୍ଚିମବଙ୍ଗର ଦୁଇଟି ପୃଥକ ସ୍ଥାନରେ ଡ୍ରୋନ ଜବତ କରାଯାଇଛି । ଏହି ଦୁଇଟି ବିମାନ ଆକୃତିର ଡ୍ରୋନ ଉଦ୍ଧାର ହେବା ପରେ ଚାଞ୍ଚଲ୍ୟ ଖେଳିଯାଇଛି । ଦକ୍ଷିଣ ୨୪ ପ୍ରଗଣାର ବକଖାଲିର ଫ୍ରେଜରଗଞ୍ଜ ବେଳାଭୂମିରେ ଗୋଟିଏ ଡ୍ରୋନ୍ ମିଳିଥିଲା । ଅନ୍ୟଟି ପଶ୍ଚିମ ମେଦିନୀପୁରର ଏକ ଧାନ କ୍ଷେତରୁ ଜବତ କରାଯାଇଥିଲା । ଏହି ଦୁଇଟି ଡ୍ରୋନ କେଉଁଠାରୁ ଆସିଥିଲା ସେ ବିଷୟରେ ପୁଲିସ ତଦନ୍ତ କରୁଛି ।
ବୁଧବାର ଅପରାହ୍ନରେ, ପଶ୍ଚିମ ଅମରାବତୀ ଗ୍ରାମର କାରଗିଲ ସମୁଦ୍ର ବେଳାଭୂମିରେ ଏକ ଡ୍ରୋନ୍ ପଡ଼ିଥିଲା । ମତ୍ସ୍ୟଜୀବୀମାନେ ଡ୍ରୋନ୍ ଉଦ୍ଧାର କରିଥିଲେ, ଯାହା ଲାଲ ଏବଂ ହଳଦିଆ ଚିହ୍ନ ସହିତ ଏକ ଛୋଟ ବିମାନ ସଦୃଶ ଥିଲା । ପରେ ଫ୍ରେଜରଗଞ୍ଜ କୋଷ୍ଟାଲ ଥାନା ପୁଲିସ ଘଟଣାସ୍ଥଳରେ ପହଞ୍ଚିଥିଲେ । ଡ୍ରୋନର କିଛି ଅଂଶ କ୍ଷତିଗ୍ରସ୍ତ ହୋଇଛି । ଡ୍ରୋନର ଡେଣାରେ "ଶିକ୍ରା ଡ୍ରୋନ୍’ ଶବ୍ଦ ଲେଖାଯାଇଥିଲା । ଏହି ଡ୍ରୋନ୍ ଭାରତୀୟ ନୌସେନା ଏବଂ ବାୟୁସେନା ଅଭ୍ୟାସ ସମୟରେ ଏବଂ ପ୍ରତିରକ୍ଷା ତାଲିମ ପାଇଁ ବ୍ୟବହାର କରନ୍ତି । ଏହି ଡ୍ରୋନଗୁଡ଼ିକୁ ବିଭିନ୍ନ ପାର୍ବତ୍ୟ ଏବଂ ସାମୁଦ୍ରିକ ଅଞ୍ଚଳରେ ମିଶନ ପାଇଁ ମଧ୍ୟ ନିୟୋଜିତ କରାଯାଏ । ସାଗର ଏସ୍ଡିପିଓ ସୁମନ କାନ୍ତି ଘୋଷ କହିଛନ୍ତି ଯେ ଏହି ଡ୍ରୋନ୍ ହେଉଛି ଭାରତୀୟ ସେନାର ଏକ ତାଲିମ ଡ୍ରୋନ୍ । ସେନାକୁ ଏ ବିଷୟରେ ବିଧିବଦ୍ଧ ସୂଚନା ଦିଆଯାଇଛି ।
ଅନ୍ୟପକ୍ଷରେ, ପଶ୍ଚିମ ମେଦିନୀପୁରର ଦାନ୍ତନ ୧ ନମ୍ୱର ବ୍ଲକରେ ଏକ ଡ୍ରୋନ ମଧ୍ୟ ଉଦ୍ଧାର କରାଯାଇଛି । ବୁଧବାର ସକାଳେ ଶରଶଙ୍କା ନିକଟ ବକୁଳତାଲାର କାଜୁଚକ ଅଞ୍ଚଳର ଏକ ଧାନ କ୍ଷେତରେ ଏହା ପଡ଼ିଥିବା ଦେଖାଯାଇଥିଲା । ଏହି ଡିଭାଇସଟି ଏକ ବିମାନ ଅନୁରୂପ ଥିଲା । ପୁଲିସ ଡ୍ରୋନକୁ ଉଦ୍ଧାର କରି ଏହାକୁ ହେପାଜତକୁ ନେଇଛି । ପରେ ପୁଲିସ ସୂତ୍ରରୁ ଜଣାପଡିଛି ଯେ ଡ୍ରୋନଟି ଇଣ୍ଡିଆନ ଅଏଲର ଥିଲା । କମ୍ପାନୀ ଏହାର ପାଇପଲାଇନରେ କାମ କରୁଥିଲା ଏବଂ ଅପରେସନ ସମୟରେ ଡ୍ରୋନକୁ ସ୍ୱତନ୍ତ୍ର ଭାବରେ ନିରୀକ୍ଷଣ ପାଇଁ ନିୟୋଜିତ କରାଯାଇଥିଲା ।
