ସାରଜା,୦୭/୧୨: ଭାରତୀୟ ଯୁବ କ୍ରିକେଟ୍ ଦଳ ନବମ ଥର ୧୯ ବର୍ଷରୁ କମ୍ ଏସିଆ କପ୍ କ୍ରିକେଟ୍ (ଦିନିକିଆ) ଫାଇନାଲ୍ରେ ପ୍ରବେଶ କରିଛି । ଶୁକ୍ରବାର ଅନୁଷ୍ଠିତ ଦ୍ୱିତୀୟ ସେମି ଫାଇନାଲ୍ରେ ଭାରତ ୭ ୱିକେଟ୍ରେ ଶ୍ରୀଲଙ୍କାକୁ ପରାସ୍ତ କରିଥିଲା । ଏହି ମ୍ୟାଚ୍ରେ ୧୩ ବର୍ଷୀୟ ବ୍ୟାଟିଂ ବିସ୍ମୟ ବୈଭବ ସୂର୍ଯ୍ୟବଂଶୀ ଧୂଆଁଧାର ଅର୍ଦ୍ଧଶତକୀୟ ଇନିଂସ୍ ଖେଳି ଦଳକୁ ବିଜୟୀ କରାଇଥିଲେ । ଆସନ୍ତା ୮ ତାରିଖରେ ୮ ଥର ଚାମ୍ପିଅନ୍ ଭାରତ ଫାଇନାଲ୍ ମୁକାବିଲାରେ ବାଂଲାଦେଶକୁ ଭେଟିବ । ଅନ୍ୟ ସେମିରେ ଡିଫେଣ୍ଡିଂ ଚାମ୍ପିଅନ୍ ବାଂଲାଦେଶ ୭ ୱିକେଟ୍ରେ ପାକିସ୍ତାନକୁ ପରାଜିତ କରିଥିଲା ।
ସାରଜା କ୍ରିକେଟ୍ ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍ରେ ଟସ୍ ଜିତି ଶ୍ରୀଲଙ୍କା ବ୍ୟାଟିଂ କରି ୪୬.୨ ଓଭରରେ ସମସ୍ତ ୱିକେଟ୍ ହରାଇ ୧୭୩ ରନ୍ ସଂଗ୍ରହ କରିଥିଲା । ଦଳ ପକ୍ଷରୁ ଏସ୍. ଶନମୁଗନାଥନ ୪୨, ଲକ୍ଭିନ ଆବେସିଂହେ ୬୯ (୩ଚୌକା, ୨ଛକା) ରନ୍ କରିଥିଲେ । ଭାରତ ପକ୍ଷରୁ ଚେତନ ଶର୍ମା ୩ଟି, କିରଣ ଚୋରମଲେ ଓ ଆୟୂଷ ମାହତ୍ରେ ପ୍ରତ୍ୟେକ ୨ଟି ଲେଖାଏଁ ୱିକେଟ୍ ନେଇଥିଲେ ।
୧୭୪ ରନ୍ ଟାର୍ଗେଟର ପିଛା କରି ଭାରତ ୨୧.୪ ଓଭର ମଧ୍ୟରେ ୩ ୱିକେଟ୍ ବିନିମୟରେ ବିଜୟ ହାସଲ କରିଥିଲା । ଓପନିଂ ଯୋଡ଼ି ମାହତ୍ରେ ଓ ସୂର୍ଯ୍ୟବଂଶୀ ୫୧ଟି ବଲ୍ରୁ ୯୧ରନ୍ ସଂଗ୍ରହ କରିଥିଲେ । ମାହତ୍ରେ ୩୪ (୭ଚୌକା) ରନ୍ କରି ଆଉଟ୍ ହୋଇଥିଲେ । ଏହାପରେ ସି ଆନ୍ଦ୍ରେ ସିଦ୍ଧାର୍ଥ ଅପରାଜିତ ସୂର୍ଯ୍ୟବଂଶୀଙ୍କ ସହ ମିଶି ସ୍କୋରକୁ ୧୩୨ରେ ପହଞ୍ଚାଇଥିଲେ । ସୂର୍ଯ୍ୟବଂଶୀ ୩୬ବଲ୍ରୁ ୬୭ (୬ଚୌକା, ୫ଛକା) ରନ୍ କରି ପାଭିଲିୟନ ଫେରିଥିଲେ । ପରେ ପରେ ସିଦ୍ଧାର୍ଥ (୨୨)ଙ୍କ ୱିକେଟ୍ର ପତନ ଘଟିଥିଲା । ମାତ୍ର ମହମ୍ମଦ ଅମନ (୨୫) ଓ କେପି କାର୍ତ୍ତିକେୟ (୧୧) ଅପରାଜିତ ରହି ଦଳକୁ ଫାଇନାଲ୍ରେ ପହଞ୍ଚାଇଥିଲେ ।
ପାକିସ୍ତାନକୁ ହରାଇଲା ବାଂଲାଦେଶ: ପ୍ରଥମ ସେମିରେ ବାଂଲାଦେଶ ୭ ୱିକେଟ୍ରେ ପାକିସ୍ତାନକୁ ପରାଜିତ କରିଥିଲା । ପାକିସ୍ତାନର ୧୧୬ରନ୍ ଜବାବରେ ବାଂଲାଦେଶ ୨୨.୧ ଓଭରରେ ୩ ୱିକେଟ୍ ହରାଇ ଆବଶ୍ୟକ ରନ୍ ସଂଗ୍ରହ କରି ନେଇଥିଲା । ବିଜୟୀ ଦଳ ପକ୍ଷରୁ ଆଜିଜୁଲ ହାକିମ୍ ଅପରାଜିତ ୬୧ରନ୍ କରିଥିବାବେଳେ ଇକ୍ବାଲ ହୋସେନ ଇମୋନ ୪ ୱିକେଟ୍ ହାସଲ କରିଥିଲେ ।
