ନୂଆଦିଲ୍ଲୀ,୨।୬: ତିନି ବର୍ଷ ହେବ ଜାରି ଯୁଦ୍ଧ ଓ ରୁଷ ମାଟିରେ ୟୁକ୍ରେନ୍ ଡ୍ରୋନ୍ ଆକ୍ରମଣ ଭିତରେ ଶାନ୍ତିର ନୂଆ ଚେଷ୍ଟା ଏକ ନୂଆ ସୁଯୋଗ ସୃଷ୍ଟି କରିଛି। ୟୁକ୍ରେନ୍ ଓ ରୁଷର ପ୍ରତିନିଧି ସୋମବାର ଇସ୍ତାନବୁଲରେ ସାମାନା ସାମନି ହେବେ। ଏହି ଆଲୋଚନା ଏଭଳି ସମୟରେ ହେଉଛି ଯେତେବେଳେ ଦିନକ ପୂର୍ବରୁ ରୁଷ ଭିତରେ ବହୁ ସାମରିକ ଆଡ୍ଡାରେ ପଶି ୟୁକ୍ରେନ୍ ଆକ୍ରମଣ କରିଥିଲା। ଏହାକୁ ଏପର୍ଯ୍ୟନ୍ତର ସବୁଠାରୁ ବଡ଼ ଡ୍ରୋନ ହମଲା ବୋଲି କୁହାଯାଉଛି। ଅତି କମ୍ରେ ୪୦ ରୁଷ ବିମାନକୁ ନଷ୍ଟ କରି ଦିଆଯାଇଥିଲା। କେବଳ ୟୁକ୍ରେନ୍ ନୁହେଁ ରୁଷ ମଧ୍ୟ ୟୁକ୍ରେନ୍ ଉପରେ ନିଜର ସବୁଠାରୁ ବଡ଼ ଡ୍ରୋନ୍ ହମଲା କରିଛି। ଯେଉଁଥିରେ ୩୪୦ରୁ ଅଧିକ ନାଗରିକ ନିହତ ହୋଇଥିଲେ। ଏଭଳି ସ୍ଥିତିରେ ଶାନ୍ତି ବାର୍ତ୍ତାର ପ୍ରସ୍ତାବ କେତେ ଠିକ୍, ତା ଉପରେ ଏବେ ପ୍ରଶ୍ନ ଉଠିଛି।
ୟୁକ୍ରେନ୍ର ରାଷ୍ଟ୍ରପତି ଭୋଲ୍ହିମିର ଜେଲେନସ୍କି ଘୋଷଣା କରିଛନ୍ତି ଯେ, ତାଙ୍କର ଏକ ପ୍ରତିନିଧିମଣ୍ଡଳୀ ଇସ୍ତାନବୁଲରେ ରୁଷ ସହ ସିଧା ଆଲୋଚନା କରିବେ। ବାର୍ତ୍ତାର ଉଦେଶ୍ୟ ଦୀର୍ଘକାଳୀନ ଶାନ୍ତି ପାଇଁ ଏକ ରୋଡମ୍ୟାପ୍ ଆଗତ କରିଛି, ଯେଉଁଥିରେ ପ୍ରାରମ୍ଭିକ ଭାବରେ ୩୦ ଦିନର ଅସ୍ତ୍ରବିରତି, କଏଦୀ ଅଦଳବଦଳ ଓ ରୁଷ ଅଧିକୃତ ଅଞ୍ଚଳରୁ ୟୁକ୍ରେନର ପିଲାଙ୍କୁ ଫେରାଇବା ଆଦି ସାମିଲ ରହିଛି।
ରଏଟର୍ସର ରିପୋର୍ଟ ଅନୁସାରେ, ଏହି ପ୍ରସ୍ତାବକୁ ଆଗାମୀ ପର୍ଯ୍ୟାୟରେ ରାଷ୍ଟ୍ରପତି ଜେଲେନସ୍କି ଓ ରାଷ୍ଟ୍ରପତି ପୁଟିନ୍ଙ୍କ ସିଧା ସଳଖ ବୈଠକର ମଧ୍ୟ ପ୍ରସ୍ତାବ ରହିଛି। ରୁଷ ବୈଦେଶିକ ମନ୍ତ୍ରୀ ସର୍ଗେଇ ଲାଭରୋଭ କହିଛନ୍ତି, ଆଗାମୀ ବାର୍ତ୍ତା ସୋମବାର ତୁର୍କୀର ଇସ୍ତାନବୁଲରେ ହେବ। ୟୁକ୍ରେନ୍ ମଧ୍ୟ ନିଜର ଟିମ୍ ପଠାଇବାର ଘୋଷଣା କରିଛି। ୟୁକ୍ରେନ୍ ପକ୍ଷରୁ ପୁଣିଥରେ ପ୍ରତିରକ୍ଷାମନ୍ତ୍ରୀ ରୁସ୍ତେମ ଉମେରୋଭ ଏହି ପ୍ରତିନିଧି ମଣ୍ଡଳୀର ନେତୃତ୍ବ ନେବେ। ସେପଟେ ୟୁକ୍ରେନ୍ ରାଷ୍ଟ୍ରପତି ଜେଲେନସ୍କି ମଧ୍ୟ ସ୍ପଷ୍ଟ କହିଛନ୍ତି ବିନା ସ୍ପଷ୍ଟ ଏଜେଣ୍ଡା ଓ ପ୍ରସ୍ତୁତିରେ ଏଭଳି ବୈଠକ କେବଳ ମାତ୍ର ଲୋକ ଦେଖାଣିବ। ସେ ତୁର୍କୀର ବୈଦେଶିକ ମନ୍ତ୍ରୀ ଓ ରାଷ୍ଟ୍ରପତି ରେଚେପ ତୟେପ ଏର୍ଦୋଆନଙ୍କ ସହ ଏହି ପ୍ରସଙ୍ଗ ଉପରେ ବିସ୍ତାରିତ ଭାବରେ ଚର୍ଚ୍ଚା କରିଛନ୍ତି। ଜେଲେନସ୍କି ଅଭିଯୋଗ କରିଛନ୍ତି, ରୁଷ ଏପର୍ଯ୍ୟନ୍ତ ଅସ୍ତ୍ରବିରତି ପାଳନ କରିବାରେ ବିଫଳ ହୋଇଛି। ସେଭଳି ୟୁକ୍ରେନ୍ ଗତ ସପ୍ତାହରେ ନିଜର ପ୍ରସ୍ତାବ ଦେଇଥିଲା। ତେବେ ରୁଷ କିନ୍ତୁ କିଛି ଉତ୍ତର ନଦେଇ ଚୁପ୍ ରହିଥିଲା। ସେ ରୁଷର ଚୁପ୍ ରହିବାକୁ ‘ଆଉ ଏକ ଧୋକ୍କା’ ବୋଲି କହିଥିଲେ।
