କୁଚିଙ୍ଗ୍, ୨୧/୦୧: ମାଲେସିଆରେ ଚାଲିଥିବା ୧୯ବର୍ଷରୁ କମ୍ ମହିଳା ଟି-ଟ୍ୱେଣ୍ଟି ବିଶ୍ୱକପ୍ରେ ଆଜି ନାଇଜେରିଆ ବଡ଼ ବିପର୍ଯ୍ୟୟ ଘଟାଇଛି । ଗ୍ରୁପ୍-ସି’ର ଏକ ମ୍ୟାଚ୍ରେ ଦଳ ୨ରନ୍ରେ ଆଇସିସିର ପୂର୍ଣ୍ଣ ସଦସ୍ୟ ଦେଶ ନ୍ୟୁଜିଲାଣ୍ଡକୁ ପରାସ୍ତ କରିଥିଲା ।
ବର୍ଷା ବାଧାପ୍ରାପ୍ତ ଏହି ମ୍ୟାଚ୍ ୧୩ ଓଭର ବିଶିଷ୍ଟ ଖେଳାଯାଇଥିଲା । ବ୍ୟାଟିଂ ଆମନ୍ତ୍ରଣ ପାଇ ନାଇଜେରିଆ ୬ ୱିକେଟ୍ ହରାଇ ୬୫ରନ୍ କରିଥିଲା । ଲିଲିଆନ ଉଡେହ ୧୮, ଲକି ପିଟି ୧୯ରନ୍ କରିଥିଲେ । ଜବାବରେ ନ୍ୟୁଜିଲାଣ୍ଡ ୬ ୱିକେଟ୍ ବିନିମୟରେ ୬୩ ରନ୍ କରିବାକୁ ସକ୍ଷମ ହୋଇଥିଲା । ୧୨ ଓଭର ଶେଷ ସୁଦ୍ଧା ନ୍ୟୁଜିଲାଣ୍ଡ ୫/୫୭ରନ୍ ସଂଗ୍ରହ କରି ସାରିଥିଲା । ଅନ୍ତିମ ଓଭରରେ ବିଜୟ ପାଇଁ ୯ରନ୍ ଆବଶ୍ୟକ କରୁଥିଲା । ନାଇଜେରିଆ ପକ୍ଷରୁ ଉଡେହ ଏହି ଓଭର ବୋଲିଂ କରିଥିଲେ ଏବଂ ୬ରନ୍ ଦେଇ ଗୋଟିଏ ୱିକେଟ୍ ନେବା ସହ ଦଳକୁ ଐତିହାସିକ ବିଜୟ ଭେଟି ଦେଇଥିଲେ । ସେ ୩ଓଭରରେ ମାତ୍ର ୮ରନ୍ ବ୍ୟୟ କରି ଗୋଟିଏ ୱିକେଟ୍ ନେଇଥିଲେ ।
ଅନ୍ୟ ଗ୍ରୁପ୍-ଡି’ ମ୍ୟାଚ୍ରେ ଅଷ୍ଟ୍ରେଲିଆ ୨ ୱିକେଟ୍ରେ ବାଂଲାଦେଶକୁ, ସ୍କଟଲାଣ୍ଡ ୧ ୱିକେଟ୍ରେ ନେପାଳକୁ ହରାଇ ଥିବାବେଳେ ଗ୍ରୁପ୍-ବି’ରେ ୟୁଏସ୍ଏ ୯ ୱିକେଟ୍ରେ ଆୟର୍ଲାଣ୍ଡକୁ, ଇଂଲଣ୍ଡ ୬ ୱିକେଟ୍ରେ ପାକିସ୍ତାନକୁ ଏବଂ ଗ୍ରୁପ୍-ସି’ରେ ଦକ୍ଷିଣ ଆଫ୍ରିକା ୧୦ ୱିକେଟ୍ରେ ସାମୁଆକୁ ପରାଜିତ କରିଥିଲା ।
