ନୂଆଦିଲ୍ଲୀ,୨୩/୧୦: ଥମୁନି ଆମେରିକା ଏବଂ ଋଷ ବିବାଦ। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବେ ରୁଷ ବିରୁଦ୍ଧରେ ଗୁରୁତ୍ୱପୂର୍ଣ୍ଣ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ବୁଧବାର ରୁଷୀୟର ପ୍ରମୁଖ ଦୁଇଟି ତୈଳ କମ୍ପାନୀ ଉପରେ କଟକଣା ଲଗାଇଛନ୍ତି। ଏହି ପଦକ୍ଷେପ ନେଇ ଟ୍ରମ୍ପ ସିଧାସଳଖ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଚ୍ୟାଲେଞ୍ଜ କରିଛନ୍ତି।
ଆମେରିକା ରୁଷିଆର ରୋସନେଫ୍ଟ ଏବଂ ଲୁକୋଇଲ୍ ଉପରେ ପ୍ରତିବନ୍ଧକ ଲଗାଇଛି। ଗୁରୁତ୍ୱପୂର୍ଣ୍ଣ କଥା ହେଉଛି ଭାରତ ଉଭୟ କମ୍ପାନୀରୁ ତେଲ କିଣୁଛି। ଏବେ ଏହି ପ୍ରତିବନ୍ଧକ ଭାରତ ଉପରେ ମଧ୍ୟ ଏକ ଗୁରୁତ୍ୱପୂର୍ଣ୍ଣ ପ୍ରଭାବ ପକାଇପାରେ। ରଏଟର୍ସର ଏକ ରିପୋର୍ଟ ଅନୁଯାୟୀ, ଟ୍ରମ୍ପ କହିଛନ୍ତି, "ଯେତେବେଳେ ମୁଁ ଭ୍ଲାଦିମିର ପୁଟିନଙ୍କ ସହ କଥା ହୁଏ, ଆଲୋଚନା ଭଲ ହୁଏ, କିନ୍ତୁ ଏହା ଆଗକୁ ବଢ଼େ ନାହିଁ । "ରାଷ୍ଟ୍ରପତି ଟ୍ରମ୍ପ ହ୍ୱାଇଟ୍ ହାଉସରେ ପୁଟିନଙ୍କୁ କଡ଼ା ସମାଲୋଚନା କରିଥିଲେ। ସେ କହିଥିଲେ, "ସେ ଶାନ୍ତି ପ୍ରତି ଆଦୌ ଗମ୍ଭୀର ନୁହନ୍ତି। ତଥାପି ନୂତନ ପ୍ରତିବନ୍ଧକ ଏକ ସମାଧାନ ପ୍ରଦାନ କରିବ। ଆମେ ବହୁତ ସମୟ ଅପେକ୍ଷା କରିଛୁ, କିନ୍ତୁ ସମୟ ଆସିଯାଇଛି।" ଟ୍ରମ୍ପ ଦୀର୍ଘ ଦିନ ଧରି ରୁଷ ବିରୁଦ୍ଧରେ ବୟାନ ଦେଇ ଆସୁଛନ୍ତି। ସେ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିଥିଲେ। ଟ୍ରମ୍ପ ଚାହାଁନ୍ତି ନାହିଁ ଯେ ଭାରତ ରୁଷଠାରୁ ତେଲ କିଣିବ। ସେ କହିଥିଲେ ଯେ ରୁଷ ୟୁକ୍ରେନ ଯୁଦ୍ଧରେ ନିଜର ରୋଜଗାର ଖର୍ଚ୍ଚ କରୁଛି।
ଭାରତ ଚଳିତ ବର୍ଷ ଜାନୁଆରୀରୁ ଜୁଲାଇ ମଧ୍ୟରେ ଦୈନିକ ପ୍ରାୟ ୧.୭୩ ନିୟୁତ ବ୍ୟାରେଲ ରୁଷିଆନ ଅଶୋଧିତ ତୈଳ ଆମଦାନୀ କରିଛି। ଏହା ଭାରତର ମୋଟ୍ ତୈଳ ଆମଦାନୀର ଏକ ତୃତୀୟାଂଶ ଅଟେ, ଯାହା ପୂର୍ବ ତୁଳନାରେ କମ୍ ଥିଲା। ଭାରତ ରୁଷିଆ ତୈଳ କ୍ରୟ ଉପରେ ଏକ ସ୍ପଷ୍ଟ ଦୃଷ୍ଟିକୋଣ ବଜାୟ ରଖିଛି। ତଥାପି, ରୁଷିଆ କମ୍ପାନୀ ଉପରେ ପ୍ରତିବନ୍ଧକ ଭାରତକୁ ମଧ୍ୟ ପ୍ରଭାବିତ କରିପାରେ।
