ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ହମାସକୁ ଶାନ୍ତି ପ୍ରସ୍ତାବ ଗ୍ରହଣ କରିବା ପାଇଁ ଏକ ଡେଡଲାଇନ୍ ଦେଇଛନ୍ତି। ଟ୍ରମ୍ପ କହିଛନ୍ତି ଯେ, ହମାସକୁ ରବିବାର (୫ ଅକ୍ଟୋବର, ୨୦୨୫) ସନ୍ଧ୍ୟା ୬ଟା ପର୍ଯ୍ୟନ୍ତ ଶାନ୍ତି ପ୍ରସ୍ତାବ ଗ୍ରହଣ କରିବାକୁ ସମୟ ଦିଆଯାଇଛି। ସେ ଧମକ ଦେଇଛନ୍ତି ଯେ, ଯଦି ହମାସ ରାଜି ନହୁଏ, ତେବେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଆମେରିକା ରାଷ୍ଟ୍ରପତି ଟ୍ରମ୍ପ ଟ୍ରୁଥ୍ ସୋସିଆଲରେ ପୋଷ୍ଟ କରି କହିଛନ୍ତି, ‘ମଧ୍ୟପ୍ରାଚ୍ୟରେ ହମାସ୍ ବହୁ ବର୍ଷ ଧରି ଏକ ବିପଦ ହୋଇ ରହିଛି। ଅକ୍ଟୋବର ୭ରେ ଏହା ଇସ୍ରାଏଲରେ ଏକ ନରସଂହାର କରିଥିଲା, ଯେଉଁଥିରେ ଶିଶୁ ଏବଂ ମହିଳା ସମେତ ଅନେକ ଲୋକ ପ୍ରାଣ ହରାଇଥିଲେ । ପ୍ରତିଶୋଧ ସ୍ୱରୂପ, ୨୫୦୦୦ ହମାସ୍ ସୈନିକଙ୍କୁ ନିପାତ କରାଯାଇଛି।’
ଟ୍ରମ୍ପ ଲେଖିଛନ୍ତି, ହମାସ୍ ସଦସ୍ୟମାନେ ସେନା ଦ୍ୱାରା ଘେରି ରହିଛନ୍ତି। ସେମାନେ କେବଳ ମୋର ନିର୍ଦ୍ଦେଶ ପାଇଁ ଅପେକ୍ଷା କରିଛନ୍ତି। ଆମେ ଜାଣୁ ଯେ, ତୁମେ (ହମାସ୍) କିଏ ଏବଂ ତୁମେ କେଉଁଠି ଅଛ। ତୁମକୁ ଖୋଜି ବାହାର କରାଯିବ ଏବଂ ହତ୍ୟା କରାଯିବ।’ ଆମେରିକା ରାଷ୍ଟ୍ରପତି ପାଲେଷ୍ଟାଇନ ଲୋକଙ୍କୁ ଗାଜାରୁ ସୁରକ୍ଷିତ ସ୍ଥାନକୁ ଯିବାକୁ ଅନୁରୋଧ କରିଛନ୍ତି। ସେ କହିଛନ୍ତି, ‘ମୁଁ ସମସ୍ତ ନିରୀହ ପାଲେଷ୍ଟାଇନ ନାଗରିକଙ୍କୁ ସୁରକ୍ଷିତ ଅଞ୍ଚଳକୁ ଯିବାକୁ ଅନୁରୋଧ କରୁଛି। ସେଠାରେ ସେମାନଙ୍କର ଭଲ ଯତ୍ନ ନିଆଯିବ। ହମାସକୁ ଶେଷ ସୁଯୋଗ ଦିଆଯିବ।’
ଟ୍ରମ୍ପ କହିଛନ୍ତି, ‘ମଧ୍ୟପ୍ରାଚ୍ୟ ଏବଂ ଆଖପାଖ ଅଞ୍ଚଳର ଦେଶଗୁଡ଼ିକ ଏହି ଅଞ୍ଚଳରେ ଶାନ୍ତି ପ୍ରତିଷ୍ଠା ପାଇଁ ଆମେରିକା ସହିତ ସହମତ ହୋଇଛନ୍ତି, ଯାହାକୁ ଇସ୍ରାଏଲ ମଧ୍ୟ ସ୍ବୀକାର କରିଛି। ଏହି ଚୁକ୍ତିନାମା ସମସ୍ତ ବାକି ଥିବା ହମାସ ଲଢ଼ୁଆଙ୍କ ଜୀବନ ମଧ୍ୟ ରକ୍ଷା କରିବ। ସମଗ୍ର ବିଶ୍ୱ ଏହି ପ୍ରସ୍ତାବ ବିଷୟରେ ଜାଣେ ଏବଂ ଏହା ସମସ୍ତଙ୍କ ପାଇଁ ଭଲ। ଯେକୌଣସି ପ୍ରକାର ମଧ୍ୟପ୍ରାଚ୍ୟରେ ଶାନ୍ତି ପ୍ରତିଷ୍ଠା ହେବ। ହିଂସା ଏବଂ ପ୍ରବାସ ବନ୍ଦ ହେବ।’
