ୱାଶିଂଟନ ଡିସି, ୧୫/୦୨: ଇରାନ ସହ ବିବାଦ ମଧ୍ୟରେ ଆମେରିକା ମଧ୍ୟପ୍ରାଚ୍ୟରେ ଏହାର ସୈନ୍ୟ ଶକ୍ତି ଲଗାତର ଭାବେ ବଢ଼ାଇବାରେ ଲାଗିଛି । ଏବେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ମଧ୍ୟପ୍ରାଚ୍ୟକୁ ସବୁଠୁ ବଡ଼ ବିମାନବାହୀ ଯୁଦ୍ଧଜାହାଜ ‘ୟୁଏସ୍ଏସ୍ ଜେରାଲ୍ଡ ଆର୍ ଫୋର୍ଡ’ ପଠାଇଛନ୍ତି । ଏହା ଏକ ଆଣବିକ ଶକ୍ତିସମ୍ପନ୍ନ ବିମାନବାହୀ ଜାହାଜ । ଆମେରିକାର ଦୁଇଜଣ ବରିଷ୍ଠ ଅଧିକାରୀଙ୍କ ସୂତ୍ରରୁ ଏହା ଜଣାପଡ଼ିଛି ।
ଆମେରିକା ଓ ଇରାନ ମଧ୍ୟରେ ବିବାଦ ବଢ଼ିବାରେ ଲାଗିଛି । ଏମିତିକି ଇରାନ ଉପରେ କେଉଁ ମୁହୂର୍ତ୍ତରେ ଆକ୍ରମଣ ହେବା ଭୟ ବି ଘାରିଛି । ଟ୍ରମ୍ପ୍ ପଠାଇଥିବା ବିଶାଳ ଯୁଦ୍ଧ ଜାହାଜ ମଧ୍ୟପ୍ରାଚ୍ୟରେ ପହଞ୍ଚିବା ଲାଗି ଆଉ ପ୍ରାୟ ସପ୍ତାହେ ଲାଗିବ । କିନ୍ତୁ ତାହା ପୂର୍ବରୁ ସେଠାରେ ‘ଆବ୍ରାହମ ଲିଙ୍କନ୍ ବିମାନବାହୀ ଯୁଦ୍ଧଜାହାଜ’ ଏବଂ ଆଉ ଏକ ଜାହାଜ ମୁତୟନ ହୋଇରହିଛି । ଇରାନକୁ ଘେରିବା ଲାଗି ଏହା ସମର୍ଥ ହେବ । ଏବେ ଜେରାଲ୍ଡ ଆର୍ ଫୋର୍ଡ ପଠାଇ ଇରାନକୁ ଡରାଇଛି ଆମେରିକା ।
ଜେରାଲ୍ଡ ଆର୍ ଫୋର୍ଡ ନିଜ ସାଥୀ ଜାହାଜଗୁଡ଼ିକ ସହ କ୍ୟାରିବିୟାନ ସାଗରରେ ମୁତୟନ ଥିଲା । ଚଳିତବର୍ଷ ପ୍ରାରମ୍ଭରେ ଭେନେଜୁଏଲା ବିରୋଧରେ ହୋଇଥିବା ଆମେରିକୀୟ ଅପରେସନରେ ଏହା ସାମିଲ ଥିଲା । ତେବେ କିଛି ସପ୍ତାହ ତଳେ ଅନେକ ଗାଇଡେଡ-ମିସାଇଲ ବିଧଂସକ, ଯୁଦ୍ଧ ବିମାନ ଏବଂ ନିରୀକ୍ଷଣକାରୀ ବିମାନ ମଧ୍ୟ ମଧ୍ୟପ୍ରାଚ୍ୟକୁ ପଠାଯାଇଥିଲା ।
ଆହୁରି ପଢ଼ନ୍ତୁ :- ରୁଷ୍-ୟୁକ୍ରେନ୍ ଯୁଦ୍ଧରେ ଲାଗିବ କି ବ୍ରେକ୍ ? ୧୭-୧୮ରେ ଆମେରିକା ମଧ୍ୟସ୍ଥତାରେ ହେବ ଶାନ୍ତି ଆଲୋଚନା
ଆମେରିକୀୟ ସେନା ପାଖରେ ମୋଟ ୧୧ଟି ବିମାନବାହୀ ଯୁଦ୍ଧଜାହାଜ ରହିଛି । ଏହା ଦେଶ ପାଇଁ ଅତ୍ୟନ୍ତ ମୂଲ୍ୟବାନ ସମ୍ବଳ ହୋଇଥିବାରୁ ଏହାର ମୁତୟନ କାର୍ଯ୍ୟକ୍ରମ ବହୁ ପୂର୍ବରୁ ଧାର୍ଯ୍ୟ ହୋଇଥାଏ । ଗତବର୍ଷ ଜୁନରେ ଇରାନର ଆଣବିକ ସାଇଟ୍ଗୁଡ଼ିକ ଉପରେ ଆକ୍ରମଣ ବେଳେ ମଧ୍ୟ ଆମେରିକା ନିକଟରେ ଦୁଇଟି ବିମାନବାହୀ ଜାହାଜ ଥିଲା । ରାଷ୍ଟ୍ରପତି ଟ୍ରମ୍ପ୍ ଚଳିତ ସପ୍ତାହରେ କହିଥିଲେ କି ଯଦି ଇରାନ ସହ କୌଣସି ବୁଝାମଣା ନ ହୁଏ, ତେବେ ସେ ଆଉ ଏକ ବିମାନବାହୀ ଜାହାଜ ପଠାଇବାକୁ ବିଚାର କରିବେ । ଏବେ ତାହା ହିଁ କରିଛନ୍ତି । ଟ୍ରମ୍ପ୍ କହିଛନ୍ତି, ଇରାନ ସହ ଆସନ୍ତା ମାସକ ମଧ୍ୟରେ ବୁଝାମଣା ହୋଇପାରେ । ଯଦି ନ ହୁଏ, ତେବେ ସ୍ଥିତି ଅତ୍ୟନ୍ତ ଗମ୍ଭୀର ତଥା ଶୋଚନୀୟ ପାଲଟିବ ।
ଜେରାଲ୍ଡ ଆର୍ ଫୋର୍ଡ ଗତବର୍ଷ ଜୁନରୁ ଲଗାତର ସମୁଦ୍ରରେ ମୁତୟନ ହୋଇ ରହିଛି । ଏହା ପୂର୍ବରୁ ୟୁରୋପରେ ଏହାକୁ ମୁତୟନ କରାଯାଉଥିଲା । କିନ୍ତୁ ନଭେମ୍ବରରେ ଅଚାନକ ଏହାକୁ କ୍ୟାରିବିୟାନ ସାଗରକୁ ପଠାଇ ଦିଆଯାଇଥିଲା । ସ୍ୱାଭାବିକ ଭାବେ ବିମାନବାହୀ ଯୁଦ୍ଧଜାହାଜର ମୁତୟନ ୯ ମାସ ପାଇଁ ହୋଇଥାଏ । କିନ୍ତୁ ସୈନ୍ୟ ଗତିବିଧି ବଢ଼ିବାରେ ଏହି ଅବଧି ବୃଦ୍ଧି ପାଇଥାଏ । ଜେରାଲ୍ଡ ପରମାଣୁ ରିଆକ୍ଟର ଦ୍ୱାରା ସଞ୍ଚାଳିତ ହେଉଛି । ଏଥିରେ ୭୫ରୁ ଅଧିକ ସୈନ୍ୟ ବିମାନ ମୁତୟନ କରାଯାଇ ପାରିବ । ଏଥିରେ ଏଫ୍-୧୮ ସୁପର ହର୍ନେଟ ଯୁଦ୍ଧ ବିମାନ ଏବଂ ଇ-୨ ହକ୍ଆଇ ଭଳି ଆଗୁଆ ସତର୍କକାରୀ ବିମାନ ସାମିଲ ରହିଛି । ଏହାଛଡ଼ା ଅତ୍ୟାଧୁନିକ ରାଡାର ବ୍ୟବସ୍ଥା ବି ଅଛି ।
