ନୂଆଦିଲ୍ଲୀ,୮/୦୪: ତହୱର ରାଣାକୁ ବଡ଼ ଝଟକା । ୨୬/୧୧ ମୁମ୍ବାଇ ଆତଙ୍କୀ ହମଲାର ଅନ୍ୟତମ ଅଭିଯୁକ୍ତ ତହୱର ରାଣାର ଭାରତ ଫେରିବା ବାଟ ସଫା ହୋଇଛି । ଭାରତକୁ ପ୍ରତ୍ୟାର୍ପଣ କରିବା ବିରୋଧରେ ତହୱର କରିଥିବା ଆବେଦନକୁ ଖାରଚ କରିଛନ୍ତି ଆମେରିକା ସୁପ୍ରିମକୋର୍ଟ । ଭାରତକୁ ପ୍ରତ୍ୟାର୍ପଣରେ ସ୍ଥଗିତାଦେଶ ଦେବାକୁ ମନା କରିଛନ୍ତି ୟୁଏସ୍ ସର୍ବୋଚ୍ଚ ଅଦାଲତ । ଫଳରେ ସେ ଭାରତ ଫେରିବା ଏକ ପ୍ରକାର ନିଶ୍ଚିନ୍ତ ହୋଇଛି ।
ଏହା ପୂର୍ବରୁ ଗତ ଫେବୃଆରୀରେ ତହୱର ପକ୍ଷରୁ ଆମେରିକା ସୁପ୍ରିମକୋର୍ଟର ଆସୋସିଏଟ୍ ଜଷ୍ଟିସ ଏଲିନା କାଗନଙ୍କୁ ଆବେଦନ କରାଯାଇଥିଲା । ସେ ଏହି ଆବଦନ ଗ୍ରହଣ ନକରିବାରୁ ଆମେରିକା ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇ ଜରୁରୀ ଆବେଦନ କରିଥିଲା ତହୱର । ହେଲେ ଏଥର ମଧ୍ୟ ତହୱରର ଆବେଦନକୁ ଖାରଚ କରି ଦିଆଯାଇଛି । ଯାହା ତାକୁ ଏକ ବଡ଼ ଝଟକା ଦେଇଛି । କାନାଡ଼ା ନାଗରିକ ଏବଂ ପାକିସ୍ତାନ ମୂଳ ୬୪ବର୍ଷୀୟ ତହୱର ରାଣାକୁ ଲସଏଞ୍ଜେଲସ୍ର ମେଟ୍ରୋପୋଲିଟିଆନ୍ ଡ଼ିଟେନସନ୍ ସେଣ୍ଟରରେ ରଖାଯାଇଛି ।
ଭାରତର ଜିତ୍- ୨୦୧୧ରେ ତହୱର ରାଣା ଆମେରିକାରେ ଦୋଷୀ ସାବ୍ୟସ୍ତ ହୋଇଥିଲା । ୧୩ ବର୍ଷ ହେବ ସଜା କାଟୁଛି । ୨୦୦୮ ମୁମ୍ବାଇ ଆତଙ୍କୀ ହମଲାରେ ତହୱରର ସମ୍ପୃକ୍ତି ରହିଛି । ପାକିସ୍ତାନୀ ଆତଙ୍କୀ ଡ଼େଭିଡ ହେଡ଼ିଲି ସହ ମିଶି ଷଡ଼ଯନ୍ତ୍ରରେ ସାମିଲ ଥିବା ଭାରତ ଦାବି କରିଛି । ଭାରତରେ ତାକୁ ଜେରା କରିବା ସହ ବିଚାର ପାଇଁ ପ୍ରତ୍ୟାର୍ପଣରେ ରାଜି ହୋଇଛି ଆମେରିକା । ତହୱରର ପ୍ରତ୍ୟାର୍ପଣ ବିରୋଧରେ ହୋଇଥିବା ଆବେଦନ ଖାରଚ ହେବା ଭାରତ ପାଇଁ ଏକ ବଡ଼ ଜିତ୍ ବୋଲି କୁହାଯାଉଛି । ଭାରତ ସରକାରଙ୍କ ଏହା କୂଟନୈତିକ ବିଜୟ ବୋଲି କହିଛନ୍ତି ବରିଷ୍ଠ ଆଇନଜୀବୀ ଉଜ୍ଜଳ ନିଗମ ।
ପାକିସ୍ତାନରେ ଜନ୍ମିତ ତହୱର ରାଣା ଆର୍ମି ମେଡ଼ିକାଲ କଲେଜରୁ ସ୍କୁଲ ପାଠପଢା ସାରିଥିଲା । ସେ ୧୦ ବର୍ଷ ପାକିସ୍ତାନ ସେନାରେ ଡ଼ାକ୍ତର ଭାବେ ଚାକିରି ଥିଲା । ଏହା ପରେ ଚାକିରି ଛାଡ଼ି ଭାରତ ବିରୋଧରେ ଆତଙ୍କୀ ଷଡ଼ଯନ୍ତ୍ରରେ ସାମିଲ ହୋଇଥିଲା । ୨୦୦୬ରୁ ୨୦୦୮ ଯାଏ ଡେଭିଡ଼ ହେଡ଼ଲି ଏବଂ ପାକିସ୍ତାନର ଅନ୍ୟ ଲୋକଙ୍କ ସହ ମିଶି ମୁମ୍ବାଇ ହମଲାର ଷଡ଼ଯନ୍ତ୍ର ରଚିଥିଲା । ଆତଙ୍କୀ ସଂଗଠନ ଲସ୍କର-ଏ-ତୌଏବା ଏବଂ ଅଲ-ହିଜାବ-ଏ-ଇସ୍ଲାମିକୁ ସାହାଯ୍ୟ କରିଥିଲା ।
ଅଧିକ ପଢନ୍ତୁ...‘ମୁସଲମାନଙ୍କ ମୌଳିକ ଅଧିକାରର ଉଲଂଘନ’, ୱାକଫ ଆଇନକୁ ସୁପ୍ରିମକୋର୍ଟରେ ଡିଏମକେର ଚ୍ୟାଲେଞ୍ଜ
୨୬/୧୧ ମୁମ୍ବାଇ ଆତଙ୍କୀ ହମଲା- ୨୦୦୮ ମସିହା ନଭେମ୍ବର ୨୬ ତାରିଖ ଥିଲା । ଯେବେ ମୁମ୍ବାଇ ଦେଖିଥିଲା ଆତଙ୍କୀ ଆକ୍ରମଣ । ଆତଙ୍କୀଙ୍କ ଗୁଳିରେ ଆଖି ବୁଜିଥିଲେ ନୀରିହ ଲୋକ । ସବୁଦିନ ପରି ଚଳଚଞ୍ଚଳ ଥିଲା ମୁମ୍ବାଇ ସହର । ଏହାରି ଭିତରେ ହଠାତ୍ ଶୁଭିଥିଲା ଆତଙ୍କବାଦୀଙ୍କ ଗୁଳିର ଗର୍ଜନ । ତାଜ ହୋଟେଲ, ଲିୟୋପୋର୍ଲ୍ଡ କାଫେ, କାମା ହସ୍ପିଟାଲ ଓ ରେଳ ଷ୍ଟେସନରେ ଆତଙ୍କୀ ଖେଳିଥିଲେ ରକ୍ତର ହୋଲି । ଯେଉଁଥିରେ ୧୬୪ ଜଣ ଆଖି ବୁଜିଥିଲେ । ଛତ୍ରପତି ଶିବାଜୀ ଟର୍ମିନାଲରେ ଆଖିବୁଜା ଗୁଳିମାଡ଼ କରିଥିଲେ ଆତଙ୍କବାଦୀ । ଆତଙ୍କୀ ଅଜମଲ ଆମିର କସାବ ସହ ଇସମାଇଲ ଖାନ ମିଶି ଏହି ଆତଙ୍କବାଦୀ ଆକ୍ରମଣ କରିଥିଲେ । ଏହାର ଅନ୍ୟତମ ଅଭିଯୁକ୍ତ ଥିଲା ତହୱର ରାଣା ।
