ନୂଆଦିଲ୍ଲୀ ୧୬/୦୩: ଉତ୍ତରାଖଣ୍ଡରେ ହିମସ୍ଖଳନ। ଗାଙ୍ଗୋତ୍ରୀ ରାଜପଥର ଚାଙ୍ଗଥାଙ୍ଗ ନିକଟରେ ପୁଣି ହିମସ୍ଖଳନ। ଏହି ହିମସ୍ଖଳନ ଧରାଳି ଏବଂ ଜାଙ୍ଗଲା ସେତୁ ମଧ୍ୟରେ ହେବା ଫଳରେ ରାଜପଥରେ ଯାତାୟାତ ସଂପୂର୍ଣ୍ଣ ବାଧାପ୍ରାପ୍ତ ହୋଇଛି। ମଝି ରାସ୍ତାରେ ଅନେକ ଯାତ୍ରୀ,ଏବଂ ଶ୍ରଦ୍ଧାଳୁ ଫସି ରହିଛନ୍ତି। ଗଙ୍ଗୋତ୍ରୀ ଧାମ ସମେତ ଅନେକ ଅଞ୍ଚଳ ଜିଲ୍ଲା ମୁଖ୍ୟାଳୟ ସହିତ ଯୋଗାଯୋଗ ବିଚ୍ଛିନ୍ନ ହୋଇଯାଇଛି।ରାସ୍ତା ଖୋଲିବା ପାଇଁ ପ୍ରୟାସ ଆରମ୍ଭ ହୋଇଛି। ରାଜପଥ ସଫା କରିବା ପାଇଁ ସୀମା ସଡ଼କ ସଂଗଠନ (BRO) ଦଳକୁ ନିୟୋଜିତ କରାଯାଇଛି। ପ୍ରବଳ ବରଫପାତ ଯୋଗୁଁ ରିଲିଫ୍ କାର୍ଯ୍ୟ ବାଧାପାପ୍ତ ହୋଇଛି।

ସୂଚନା ଅନୁଯାଇ, ଗତ କିଛି ଦିନ ହେବ ଉତ୍ତରାଖଣ୍ଡର ଉଚ୍ଚ ଅଞ୍ଚଳରେ ପ୍ରବଳ ବରଫପାତ ହେଉଥିଲା ଯାହା ଫଳରେ ଉଚ୍ଚ ଅଞ୍ଚଳରେ ହିମସ୍ଖଳନ ନେଇ ପୂର୍ବରୁ ପାଣିପାଗ ବିଭାଗ ପକ୍ଷରୁ ସତର୍କ କରାଯାଇଥିଲା। ଗାଙ୍ଗୋତ୍ରୀ ରାଜପଥ ଚାଙ୍ଗଥାଙ୍ଗ ନିକଟରେ ହିମସ୍ଖଳନ ଘଟିଛି।ଏହି ହିମସ୍ଖଳନ ରାଜପଥରୁ ପ୍ରାୟ ୧୦୦ ମିଟର ତଳେ ଭାଗୀରଥି ନଦୀ ପର୍ଯ୍ୟନ୍ତ ହୋଇଛି। ଯାହା ଫଳରେ ବିପଦକୁ ଆହୁରି ବଢ଼ି ଯାଇଛି।ଜିଲ୍ଲା ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଉଦ୍ଧାର କାର୍ଯ୍ୟ ଆରମ୍ଭ ହୋଇଛି। ରାସ୍ତାରୁ ବରଫ ହଟାଇବା ସହ ଯାତାୟତ ସ୍ବାଭାବିକ କରିବା ପାଇଁ ଉଦ୍ୟମ ଜାରି ରଖିଛି ବିଆର୍‌ଓ। ଏବେ ବରଫପାତ ହେଉଥିବାରୁ ରିଲିଫ୍ କାର୍ଯ୍ୟରେ ଅସୁବିଧା ହୋଉଛି। 

ପୂର୍ବରୁ ଫେବୃଆରୀ ୨୮ ତାରିଖରେ ଡାବରାଣୀ, ଝାଲା ନିକଟରେ ଏବଂ ଧରାଳି ଏବଂ ଭୈରୋଘାଟି ମଧ୍ୟରେ ଏକ ବଡ଼ ହିମସ୍ଖଳନ ହୋଇଥିଲା ଯାହା ଫଳରେ ରାଜପଥ ଅବରୋଧିତ ହୋଇଥିଲା।