ହିନ୍ଦୁ ଧର୍ମରେ ତୁଳସୀ ଗଛକୁ ଦେବୀ ଭାବରେ ପୂଜା କରାଯାଏ । ତେଣୁ ତୁଳସୀ ଗଛକୁ ପ୍ରତ୍ୟେକ ଭାରତୀୟଙ୍କ ଘରେ ପୂଜା କରାଯାଉଥିବାର ଦେଖିବାକୁ ମିଳେ । ତୁଳସୀ ପତ୍ର ଭଗବାନ ବିଷ୍ଣୁଙ୍କ ଅତି ପ୍ରିୟ ହୋଇଥାଏ । ଘରେ ସୁଖ ସମୃଦ୍ଧି ବୃଦ୍ଧି ପାଇଁ ତୁଳସୀ ଗଛ ପୂଜା କରାଯାଏ ।ଯଦି ଘରେ ତୁଳସୀ ଗଛ ପୂଜା କରୁଛନ୍ତି ତେବେ କିଛି ଜିନିଷକୁ ଧ୍ୟାନରେ ରଖିବା ଉଚିତ । ଯଦି ଏହି ଜିନିଷକୁ ଧ୍ୟାନରେ ରଖାଯାଏ ତେବେ ଘର ଉପରେ ସମସ୍ତ ଦେବାଦେବୀଙ୍କ ଆଶୀର୍ବାଦ ରହିଥାଏ । ଘରୁ ନକରାତ୍ମକ ପ୍ରଭାବ ଦୂର ହୋଇ ସକରାତ୍ମକ ପରିବେଶ ସୃଷ୍ଟି ହୋଇଥାଏ । ଘରେ କଦାପୀ ଅର୍ଥର ସମସ୍ୟା ନ ରହିବା ସହ ପରିବାର ସଦସ୍ୟ ସୁସ୍ଥ ରହିଥାନ୍ତି । ତେବେ ଆସନ୍ତୁ ସେସବୁ ନିୟମ ବିଷୟରେ। 

ଏକାଦଶୀ, ରବିବାର, ସୂର୍ଯ୍ୟ ଓ ଚନ୍ଦ୍ର ଗ୍ରହଣ ସମୟରେ ତୁଳସୀ ଗଛରୁ ପତ୍ର ଛିଣ୍ଡାଇବା ଉଚିତ୍ ନୁହେଁ । ଏହି ଦିନ କିମ୍ବା ରାତିରେ ପତ୍ର ଛିଣ୍ଡାଇବା ଦ୍ବାରା ଘର ପ୍ରତି ଅଶୁଭ ହୋଇଥାଏ । ସେହିପରି ଆବଶ୍ୟକ ନ ଥିଲେ ତୁଳସୀ ପତ୍ରକୁ ଛିଣ୍ଡାନ୍ତୁ ନାହିଁ । ଏଭଳି କରିବାଦ୍ବାରା ଦୋଷ ଲାଗିଥାଏ । ସେହିପରି ଶିବପୂରାଣ ଅନୁସାରେ, ଶିବଲିଙ୍ଗ ଉପରେ ତୁଳସୀ ପତ୍ର ଚଢ଼ାଇବା ଉଚିତ ନୁହେଁ । ତୁଳସୀଙ୍କୁ ପ୍ରତିଦିନ ପୂଜା କରିବା ଉଚିତ । ସବୁଦିନ ସନ୍ଧ୍ୟା ସମୟରେ ତୁଳସୀ ଚଉରା ନିକଟରେ ଦୀପ ଜଳାଇବା ଉଚିତ । ଯେଉଁ ଲୋକ ପ୍ରତିଦିନ ସନ୍ଧ୍ୟାରେ ତୁଳସୀଙ୍କ ପାଖରେ ଦୀପ ଜାଳେ ସେମାନଙ୍କୁ ସର୍ବଦା ମା' ମହାଲକ୍ଷ୍ମୀଙ୍କ ଆଶୀର୍ବାଦ ପ୍ରାପ୍ତ ହୋଇଥାଏ ବୋଲି ମାନ୍ୟତା ରହିଛି । ଏହାସହ ଘର ଅଗଣାରେ ତୁଳସୀ ଗଛ ଥିଲେ ଘରୁ ଅନେକ ବାସ୍ତୁଦୋଷ ଦୂର ହୋଇଥାଏ । ପରିବାରର ଆର୍ଥିକ ସ୍ଥିତି ଉପରେ ମଧ୍ୟ ଏହା ଶୁଭ ପ୍ରଭାବ ପକାଇଥାଏ ବୋଲି ବିଶ୍ବାସ ରହିଛି।