ବେଲବାହାଳୀ, ୫/୮ : ଭୁବନେଶ୍ୱର ପଲ୍ୟୁସନ କଣ୍ଟ୍ରୋଲ କାର୍ଯ୍ୟାଳୟକୁ ଯାଉଥିବା ବେଳେ ଶତାଧିକ ଗ୍ରାମବାସୀ ପୁଲିସ ଦ୍ୱାରା ଅଟକ। ଘଟଣା ସ୍ଥଳରେ ଉତ୍ତେଜନା। କେନ୍ଦୁଝର ଜିଲ୍ଲା ମହାଦେଇଯୋଡ଼ା ପଞ୍ଚାୟତ ଟିକରପଡା ଓ ଧାତିକା ଏହି ଦୁଇଟି ଗାଁର ଗ୍ରାମବାସୀଙ୍କୁ ରାମଚନ୍ଦ୍ରପୁର ଥାନା ହସନପୁର ଟୋଲ ପ୍ଲାଜ଼ା ନିକଟରେ ପୁଲିସ ଅଟକ ରଖିଥିଲା। ଘଟଣା ସ୍ଥଳରେ ଗଣମାଧ୍ୟମ ପ୍ରତିନିଧି ପହଞ୍ଚିବା ପରେ ପୁଲିସ ପଳାଇଥିଲା।
ସୂଚନାନୁଯାୟୀ, ମହାଦେଇଯୋଡ଼ା ପଞ୍ଚାୟତ ଟିକରପଡା ଓ ଧାତିକା ଗାଁରେ ଏସଆର ମିନିମେଟ ନାମକ କମ୍ପାନୀ ନିଜର ଫ୍ୟାକ୍ଟ୍ରି ବସାଇବାକୁ ନେଇ ଜନଶୁଣାଣି କରିଥିଲା। ତେବେ ଏହି ଜନଶୁଣାଣି ମିଛ ବୋଲି ଅଭିଯୋଗ କରି ଶତାଧିକ ଗ୍ରାମବାସୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟଙ୍କ ନିର୍ଦ୍ଦେଶକୁ ନେଇ ଆଜି ଦୁଇଟି ବସ୍ରେ ୧୫୦ରୁ ଉର୍ଦ୍ଧ୍ଵ ଗ୍ରାମବାସୀ ଭୁବନେଶ୍ୱର ପଲ୍ୟୁସନ କଣ୍ଟ୍ରୋଲ କାର୍ଯ୍ୟାଳୟକୁ ଯାଉଥିଲେ। ଏହି ସମୟରେ ସେମାନଙ୍କୁ ୨୦ନଂ ଜାତୀୟ ରାଜପଥ ରାମଚନ୍ଦ୍ରପୁର ଥାନା ହସନପୁର ଟୋଲ ପ୍ଲାଜ଼ା ନିକଟରେ ପୁଲିସ ଅଟକାଇ ଥିଲା। ଯାହାକୁ ନେଇ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ଖବର ପାଇ ଘଟଣା ସ୍ଥଳରେ ଗଣମାଧ୍ୟମ ପ୍ରତିନିଧି ପହଞ୍ଚିବା ପରେ ପୁଲିସ ପଳାଇଥିଲା। ତେବେ ଗ୍ରାମବାସୀଙ୍କୁ ଅଟକ ରଖିବାକୁ କିଏ କହିଥିଲା ନା ପୁଲିସ ଆପେ ଅଟକାଇଥିଲା ତାର କୌଣସି ସ୍ପଷ୍ଟତା ମିଳି ପାରିନାହିଁ।
