ବେଲାରୁଷରେ ପରମାଣୁ ଅସ୍ତ୍ର ମୁତୟନ କରିବ ଋଷ, ଚିନ୍ତା ପ୍ରକାଶ କଲେ ବାଇଡେନ୍
ମସ୍କୋ,୨୯।୩: କ’ଣ ୟୁକ୍ରେନ୍ରେ ଚାଲିଥିବା ଯୁଦ୍ଧରେ ଏବେ ପରମାଣୁ ହତିଆରର ବ୍ୟବହାର ଆହୁରି ବଢିଯାଇଛି ? ବ୍ଲାଦିମିର ପୁଟିନଙ୍କ ଏକ ପଦକ୍ଷେପ ପରେ ଏଭଳି ଅନୁମାନ କରାଯାଉଛି। ଋଷ ରାଷ୍ଟ୍ରପତି ବ୍ଲାଦିମିର ପୁଟିନ୍ ଘୋଷଣା କରିଛନ୍ତି ଯେ, ବେଲାରୁଷରେ ସେ ପରମାଣୁ ଅସ୍ତ୍ର ମୁତୟନ କରିବେ। ତାଙ୍କର ଏହି ଘୋଷଣା ପରେ ଯୁଦ୍ଧ ଆହୁରି ବଢିବ ବୋଲି ଆଶଙ୍କା କରାଯାଉଛି। କେବଳ ସେତିକି ନୁହେଁ ଆମେରିକା ରାଷ୍ଟ୍ରପତି ଜୋ ବାଇଡେନ୍ ମଧ୍ୟ ପୁଟିନ୍ଙ୍କ ଘୋଷଣାକୁ ନେଇ ଚିନ୍ତିତ ଥିବାର ଦେଖାଯାଉଛନ୍ତି। ସେ ଏହି ପଦକ୍ଷେପକୁ ବିପଦଜନକ ବୋଲି କହିଛନ୍ତି। ଏହା ପୂର୍ବରୁ ପୁଟିନ୍ କହିଥିଲେ, ମସ୍କୋ ନିଜ ଅଞ୍ଚଳର ରକ୍ଷା କରିବା ପାଇଁ ସମ୍ପୂର୍ଣ୍ଣ ଭାବରେ ତତ୍ପର ଅଛି ଓ ତାଙ୍କ ପାଇଁ ସବୁ ଜରୁରୀ ପଦକ୍ଷେପ ଗ୍ରହଣ କରିବ।
ପୁଟିନ୍ କହିଛନ୍ତି, ବେଲାରୁଷର ରାଷ୍ଟ୍ରପତି ଆଲେକଜାଣ୍ଡର ଲୁକାଶିନକୋ ମସ୍କୋକୁ ବହୁ ସମୟ ଧରି କହୁଛନ୍ତି ଯେ, ତାଙ୍କ ଦେଶ ପରମାଣୁ ଅସ୍ତ୍ର ମୁତୟନ କରୁ। ଏବେ ଆମେ ଏହାର ନିଷ୍ପତ୍ତି ନେଇଛୁ। ଉଲ୍ଲେଖନୀୟ ଯେ, ଗତ ବର୍ଷ ୨୪ ଫେବୃଆରୀରେ ୟୁକ୍ରେନ୍ ଉପରେ ହୋଇଥିବା ଋଷର ଆକ୍ରମଣ ପରେ ଲଗାତାର ବେଲାରୁଷର ସମର୍ଥନ ଋଷ କରୁଛି। ଋଷ ପୂର୍ବରୁ ହିଁ ବେଲାରୁଷର ସାହାଯ୍ୟ କରୁଛି। ସେ ବେଲାରୁଷକୁ ଆଧୁନିକ ଯୁଦ୍ଧ ବିମାନ ପ୍ରଦାନ କରୁଛି, ଯାହାକି ପରମାଣୁ ଅସ୍ତ୍ରକୁ ମଧ୍ୟ ନେଇକି ଯାଇପାରେ।
