ରାଞ୍ଚି,୧୫/୧୧: ଆମେ ନରେନ୍ଦ୍ର ମୋଦିଙ୍କୁ ଡରୁ ନାହୁଁ । ୫୬ ଇଞ୍ଚର ଛାତି, ମନ କି ବାତ୍, ବିଜେପି ଏବଂ ମେଦିଜୀଙ୍କୁ ଆମର ଭୟ ନାହିଁ । ନରେନ୍ଦ୍ର ମୋଦିଙ୍କ କଥାରେ କୋଟିପତିମାନେ କାମ କରୁଛନ୍ତି ତାଙ୍କ କଥାରେ ସେ କାମ କରୁଛନ୍ତି । କୋଟିପତି ତୁମ ଜମି ଚାହୁଁଛନ୍ତି । ବିଜେପି ଓ ମୋଦିଜୀ ମୁମ୍ବାଇର ଧାରାବୀକୁ ଆଦାନୀକୁ ଦେବାକୁ ଚାହୁଁଛନ୍ତି । ମୋଦି କେବଳ ମନ କଥା କହିବେ ଲମ୍ବା ଲମ୍ବା ଭାଷଣ ମାରିବେ ପୁଣି ସଂନ୍ଧ୍ୟାରେ ଅମ୍ବାନିଜୀଙ୍କ ବାହାଘରରେ ସାମିଲ ହେବେ । ଭୋଜି ଖାଇବେ ନାଚଗୀତ ଉପଭୋଗ କରିବେ । ଝାଡଖଣ୍ଡ ଗୋଡାରେ ନିର୍ବାଚନୀ ରାଲି କରି ବିଜେପି ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଜୋରଦାର ଟାର୍ଗେଟ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ ।
ବିଜେପିକୁ ନିଶାନା କରି ରାହୁଲ କହିଛନ୍ତି,ଗୋଟିଏ ପଟେ ମୋଦିଜୀ ଭାଷଣ ଦେଉଛନ୍ତି ମୁଁ ପଛୁଆ ବର୍ଗଙ୍କର ହେଲେ ସେପଟେ ଝାଡଖଣ୍ଡରେ ବିଜେପି ପଛୁଆ ବର୍ଗଙ୍କ ସରକ୍ଷଣ ୨୭%ରୁ କମ କରି ୧୪% କରି ଦେଇଥିଲା । ସେଥିପାଇଁ ଆମେ ନିଷ୍ପତ୍ତି ନେଇଛୁ ଏସଟି ସଂରକ୍ଷଣ ୨୮% କରିବୁ । ଏସସି ୧୨% ଓ ଓବିସି ୨୭% କରିବୁ । ଗରିବଙ୍କର ୧୬ ଲକ୍ଷ କୋଟି ଟଙ୍କା ଛଡାଇ ନେଇ ମୋଦି କୋଟିପତିଙ୍କୁ କ୍ଷମା କରିଛନ୍ତି । ମୁମ୍ବାଇରେ ୧ଲକ୍ଷ କୋଟିର ଜମି ଅଛି । ତାହାକୁ ମୋଦିଜୀ ଏବଂ ବିଜେପି ଆଦାନୀକୁ ଦେବାକୁ ଚାହୁଁଛନ୍ତି ।
ରାହୁଲ ଗାନ୍ଧୀ ଆହୁରି କହିଛନ୍ତି, ଆମ ସମ୍ବିଧାନରେ ଆମ୍ବେଦକର, ବିର୍ସାମୁଣ୍ଡା, ଭଗବାନ ବୁଦ୍ଧ, ମହାତ୍ମା ଗାନ୍ଧୀ, ଫୁଲେଜୀଙ୍କ ଚିନ୍ତାଧାରା ରହିଛି । ଏହି ସମ୍ବିଧାନ ହିନ୍ଦୁସ୍ଥାନର ଆତ୍ମା । ଆଜି ଯେଉଁ ଜଳ,ଜଙ୍ଗଲ ଓ ଜମି ମିଳିଛି ତାହା ସମ୍ବିଧାନରୁ ମିଳିଛି । ମୋତେ ମୋଦିଜୀ ଲାଲ ବହି କହୁଛନ୍ତି । ସେ ଜାଣିବା ଦରକାର ବହିର ରଙ୍ଗ କଣ ତାହା ଗୁରୁତ୍ବ ପୂର୍ଣ୍ଣ ନୁହେଁ ବହିରେ କଣ ଲେଖା ଅଛି ତାହା ଅଧିର ଜୁରୁରୀ ।
