ନୂଆଦିଲ୍ଲୀ,୧୫।୨: ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବଙ୍କ ବୟାନକୁ ନେଇ ବିବାଦ। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଟାର୍ଗେଟ କରି ଅଖିଳେଶ ତାଙ୍କ ଧାର୍ମିକ ପରିଚୟ ଏବଂ ଯୋଗୀ ହେବା ଉପରେ ପ୍ରଶ୍ନ ଉଠାଇଛନ୍ତି। ଅଖିଳେଶଙ୍କ ଏହି ବୟାନକୁ ନେଇ ରାଜ୍ୟର ରାଜନୈତିକ ଦୁନିଆ ସହ ସାଧୁ ସନ୍ଥମାନେ ମଧ୍ୟ ଅସନ୍ତୋଷ ପ୍ରକାଶ କରିଛନ୍ତି। ଉନ୍ନାଓରେ ଏକ କାର୍ଯ୍ୟକ୍ରମ ସମୟରେ, ଅଖିଳେଶ ଯାଦବ ସିଧାସଳଖ ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରିଥିଲେ। ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦଙ୍କ ପ୍ରସଙ୍ଗ ଉଠାଇଥିଲେ। ସେ କହିଥିଲେ ହିନ୍ଦୁ ଧର୍ମରେ ଗେରୁଆ ପୋଷାକକୁ ଅତ୍ୟନ୍ତ ସମ୍ମାନ କରାଯାଏ, କିନ୍ତୁ କେବଳ ଗେରୁଆ ପିନ୍ଧିବା କିମ୍ବା କାନ ଫୋଡିଦେଲେ ଜଣେ ଯୋଗୀ ହୋଇଯାଏ ନାହିଁ।
ଗୀତା ଏବଂ ଗୁରୁ ନାନକ ଦେବ ଜୀଙ୍କ ଶିକ୍ଷାକୁ ଦର୍ଶାଇ ଅଖିଳେଶ ଯୁକ୍ତି ଦେଇଥିଲେ, ଯେଉଁ ବ୍ୟକ୍ତିର ଏବେ ବି ସାଂସାରିକ ଇଚ୍ଛା ରହିଛି ସେ ଯୋଗୀ ବୋଲି କହିବାକୁ ଯୋଗ୍ୟ ନୁହେଁ। ସେ ବ୍ୟଙ୍ଗାତ୍ମକ ଭାବରେ କହିଥିଲେ ଯେ ଯେଉଁ ସରକାର ପୂଜନୀୟ ଶଙ୍କରାଚାର୍ଯ୍ୟଙ୍କୁ ଗଙ୍ଗାରେ ସ୍ନାନ କରିବାରୁ ବାଧା ଦିଏ, ସେ ପାପର ଭାଗିଦାର।
ଅଖିଳେଶଙ୍କ ଏହି ମନ୍ତବ୍ୟ ଉପରେ ଅଖିଳ ଭାରତୀୟ ସନ୍ଥ ସମିତି ଦୃଢ଼ ପ୍ରତିବାଦ କରିଛି। ସମିତିର ରାଷ୍ଟ୍ରୀୟ ସାଧାରଣ ସମ୍ପାଦକ ସ୍ୱାମୀ ଜିତେନ୍ଦ୍ରାନନ୍ଦ ସରସ୍ୱତୀ ସ୍ପଷ୍ଟ ଭାବରେ କହିଛନ୍ତି ଯେ ଅଖିଳେଶ ଯାଦବ ଭାଷାଗତ ସୀମା ଲଙ୍ଘନ କରିବା ଉଚିତ୍ ନୁହେଁ। ସେ ପାଲଟା ଜବାବ ଦେଇଥିଲେ, ‘ଯୋଗୀ ଆଦିତ୍ୟନାଥଙ୍କୁ ଅଖିଳେଶ ଯାଦବଙ୍କ ପ୍ରମାଣପତ୍ରର ଆବଶ୍ୟକତା ନାହିଁ। ଅଖିଳେଶ ତାଙ୍କ ବାପାଙ୍କ ଉତ୍ତରାଧିକାରୀ ଭାବରେ ରାଜନୀତି କରୁଛନ୍ତି। ଯୋଗୀ ଜୀ ଗୋରଖପୀଠର ତିନି ପିଢ଼ିର ତପସ୍ୟାର ପ୍ରତୀକ।"
