ନୂଆଦିଲ୍ଲୀ: କେନ୍ଦ୍ର କ୍ୟାବିନେଟର ବଡ଼ ନିଷ୍ପତ୍ତି । ସାରାଦେଶରେ ଜାତି ଭିତିକ ଜନଗଣନା କରିବେ ମୋଦୀ ସରକାର । କ୍ୟାବିନେଟ ବୈଠକରେ ନିଆଯାଇଥିବା ନିଷ୍ପତ୍ତି ସମ୍ପର୍କରେ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ। ସେ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ମୋଦି ସରକାର ସାରା ଦେଶରେ ଜାତିଭିତିକ ଜନଗଣନା କରିବେ । ଏହା ବ୍ୟତୀତ ଚାଷୀଙ୍କ ହିତ ପାଇଁ ଅନେକ ନିଷ୍ପତ୍ତି ନିଆଯାଇଛି ଏବଂ ରାଜପଥ ସମ୍ପର୍କରେ ମଧ୍ୟ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି।

କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ମୋଦି ସରକାର ସାରା ଦେଶରେ ଜାତି ଭିତିକ ଜନଗଣନା କରିବେ। ଜନଗଣନା ସହିତ ଜାତି ଭିତିକ ଗଣନା ମଧ୍ୟ କରାଯିବ । ଜାତି ଜନଗଣନା ପ୍ରସଙ୍ଗରେ ସେ କଂଗ୍ରେସକୁ ଟାର୍ଗେଟ କରିଛନ୍ତି । ସେ କହିଛନ୍ତି ଯେ, ଜାତିଭିତିକ ଜନଗଣନାକୁ କଂଗ୍ରେସ ନିଜ ସ୍ୱାର୍ଥ ପାଇଁ ବ୍ୟବହାର କରିଥିଲା। ଶେଷ ଜାତି ଜନ ଗଣନା ୧୯୩୧ ମସିହାରେ କରାଯାଇଥିଲା। ଅର୍ଥାତ ଏବେ ୯୪ ବର୍ଷ ପରେ, ସମଗ୍ର ଦେଶରେ ଜାତି ଜନ ଗଣନା କରାଯିବ। ସ୍ୱାଧୀନ ଭାରତରେ ପ୍ରଥମ ଥର ପାଇଁ, କେନ୍ଦ୍ର ସରକାର ଜାତିଗତ ଜନଗଣନା କରିବେ।

ଅଶ୍ୱିନୀ ବୈଷ୍ଣବ ଆହୁରି ମଧ୍ୟ କହିଛନ୍ତି ଯେ, ଶିଲଂରୁ ସିଲଭର କରିଡରକୁ ମଞ୍ଜୁରୀ ଦିଆଯାଇଛି। ୧୬୬.୮ କିଲୋମିଟର ଲମ୍ବା ୪ ଲେନ୍ ରାଜପଥକୁ ଅନୁମୋଦନ କରାଯାଇଛି। ମେଘାଳୟରୁ ଆସାମକୁ ଏକ ନୂତନ ରାଜପଥ ମଞ୍ଜୁର ହୋଇଛି। ଏଥିପାଇଁ ୨୨୮୬୪ କୋଟି ଟଙ୍କା ଖର୍ଚ୍ଚ ହେବ । ଅନ୍ୟ ପକ୍ଷରେ ଆଖୁ ଚାଷୀ ମାନଙ୍କୁ ଏକ ବଡ଼ ଆଶ୍ୱସ୍ତି ଦିଆଯାଇଛି। ୨୦୨୫-୨୬ ଆଖୁ ଋତୁ ପାଇଁ କ୍ୱିଣ୍ଟାଲ ପ୍ରତି ୩୫୫ ଟଙ୍କା ସର୍ବନିମ୍ନ ସହାୟକ ମୂଲ୍ୟ (MSP) ମଧ୍ୟ ଅନୁମୋଦନ କରାଯାଇଛି।

ଏଠାରେ ଉଲ୍ଲେଖନୀୟ ଯେ, ବୁଧବାର ପ୍ରଧାନମନ୍ତ୍ରୀ ମୋଦୀଙ୍କ ଅଧ୍ୟକ୍ଷତାରେ ଏକ ସୁପର କ୍ୟାବିନେଟ୍ ବୈଠକ ଅନୁଷ୍ଠିତ ହୋଇଥିଲା, ଯେଉଁଥିରେ କେନ୍ଦ୍ର କ୍ୟାବିନେଟର କିଛି ଶୀର୍ଷ ମନ୍ତ୍ରୀ ଉପସ୍ଥିତ ଥିଲେ। ରାଜନୈତିକ ବ୍ୟାପାର କ୍ୟାବିନେଟ କମିଟିକୁ 'ସୁପର କ୍ୟାବିନେଟ' କୁହାଯାଏ ଏବଂ ଏଥିରେ କେନ୍ଦ୍ର କ୍ୟାବିନେଟର ସମସ୍ତ ଶୀର୍ଷ ମନ୍ତ୍ରୀ ସାମିଲ ଅଛନ୍ତି।

ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ସୁପର କ୍ୟାବିନେଟ୍ ହୋଇଛି। ଏହା ବ୍ୟତୀତ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ଗୃହମନ୍ତ୍ରୀ ଅମିତ ଶାହ, ସଡ଼କ ପରିବହନ ମନ୍ତ୍ରୀ ନୀତିନ ଗଡକରୀ, ଅର୍ଥମନ୍ତ୍ରୀ ନିର୍ମଳା ସୀତାରମଣ ଏବଂ ବାଣିଜ୍ୟ ମନ୍ତ୍ରୀ ପୀୟୁଷ ଗୋୟଲ ମଧ୍ୟ ଏହି କ୍ୟାବିନେଟରେ ସାମିଲ ଅଛନ୍ତି।