ନୂଆଦିଲ୍ଲୀ,୨୦/୦୧: ବିଭିନ୍ନ ଫ୍ୟାକ୍ଟ୍ରିର ଛାତ ଉପରେ ଆପଣ ଏକ ବଡ଼ ପାତ୍ର ଭଳି ଥିବା ଜିନିଷଟି ନିଶ୍ଚିତ ଦେଖିଥିବେ। ଯାହା ସିଲଭର ରଙ୍ଗର ହୋଇଥାଏ। ଏଥିସହ ଏହା ଗୋଲ ଗୋଲ ହୋଇ ଘୁରୁଥାଏ ମଧ୍ୟ । ସାଧାରଣ ଲୋକଟିଏ ଏହାକୁ ଦେଖିଲେ ଏହି ଜିନିଷଟି କଣ ବୋଲି ମନରେ ପ୍ରଶ୍ନ ଆସେ । ଆଉ କାହିଁକି ଏହା ଫ୍ୟାକ୍ଟ୍ରିର ଛାତ ଉପରେ ଏପରି ଲାଗିଥାଏ । ତେବେ ଏହା କଣ ଓ ଏହାର କାମ କଣ ଆସନ୍ତୁ ଜାଣିବା।ଏହି ଗୋଲାକାର ପାତ୍ରଗୁଡିକ କାରଖାନାର ଛାତ ଉପରେ ଅଳ୍ପ ଦୂରରେ ଲଗାଯାଇଥାଏ । କାରଖାନାର ଛାତ ଉପରେ ଲାଗିଥିବା ଏହି ଇସ୍ପାତ ପାତ୍ରଗୁଡ଼ିକର ନାମ ହେଉଛି ଟର୍ବୋ ଭେଣ୍ଟିଲେଟର । ଏହା କେବଳ ପବନରେ ହିଁ ଘୁରିବାରେ ଲାଗେ । ଏହା ଅତ୍ୟନ୍ତ ଲାଭଦାୟକ ଉପକରଣ । କାରଣ ଫ୍ୟାକ୍ଟ୍ରିଗୁଡିକରେ ଅନ୍ୟ କାର୍ଯ୍ୟାଳୟ ଅପେକ୍ଷା ଅଧିକ ଗରମ ହୁଏ ।
ଏହି ଗରମ ପବନ ବା ଉତ୍ତପ୍ତ ଉତ୍ତାପ ଓ ରାସାୟନିକ ନିର୍ଗମନକୁ କାରଖାନାରୁ ବାହାର କରିବା ପାଇଁ ବ୍ୟବହୃତ ହୁଏ । ଯାହାଦ୍ବାରା ଶ୍ରମିକମାନଙ୍କ ପାଇଁ ଏକ ସୁସ୍ଥ ପରିବେଶ ସୁନିଶ୍ଚିତ ହୋଇଥାଏ । ଏହା କେବଳ କାରଖାନାରେ ନୁହେଁ, ବରଂ ଜନବହୁଳ ସ୍ଥାନରେ ମଧ୍ୟ ବ୍ୟବହାର କରାଯାଏ । ଏହା ସାଧାରଣତଃ କାରଖାନା, ଗୋଦାମ, ରେଳ ଷ୍ଟେସନ୍ ଏବଂ ଅନ୍ୟାନ୍ୟ ବଡ଼ ପରିସରରେ ଦେଖାଯାଏ । ଏହି ଟର୍ବୋ ଭେଣ୍ଟିଲେଟର ଫ୍ୟାନ୍ ଗୁଡିକ ଆମ ଘରମାନଙ୍କରେ ଲାଗିଥିବା ଫ୍ୟାନ ଠାରୁ ପୁରା ବିପରିତ ଢଙ୍ଗରେ କାମ କରେ । ଅର୍ଥାତ୍ ଘରେ ଫ୍ୟାନ ବୁଲିବା ଦ୍ୱାରା ଥଣ୍ଡା ପବନ ତଳକୁ ଆସୁଥିବା ବେଳେ ଭେଣ୍ଟିଲେଟର ଫ୍ୟାନ କିନ୍ତୁ ପବନକୁ ଉପରକୁ ଠେଲିଥାଏ । ଅର୍ଥ ଏହା ବୁଲିବା ଦ୍ୱାରା ପବନ ଉଦ୍ଧ୍ୱର୍ଗାମୀ ହୋଇଥାଏ । ଫଳରେ ଭିତରର ତାପମାତ୍ରା ଥଣ୍ଡା ରହେ। ଏହା ରେଳ ଷ୍ଟେସନ ଏବଂ ଅନ୍ୟାନ୍ୟ ବୃହତ କମ୍ପ୍ଲେକ୍ସରେ ବାୟୁ ପ୍ରବାହରେ ଉନ୍ନତି ଆଣିବା ଲାଗି ଅତ୍ୟନ୍ତ ଉପଯୋଗୀ ।
