ରାୟପୁର ୨୩/୦୬: ପ୍ରତିବର୍ଷ ବର୍ଷାଋତୁରେ ନକ୍ସଲ ବିରୋଧୀ ଅଭିଯାନ ବନ୍ଦ ରହିଥାଏ । ଯାହାଫଳରେ ନକ୍ସଲମାନେ ଶାନ୍ତିରେ ଶୋଇଥାନ୍ତି । କିନ୍ତୁ ଚଳିତବର୍ଷ ନକ୍ସଲ ଦମନ ଅଭିଯାନ ଜାରି ରହିବ । ନକ୍ସଲମାନଙ୍କୁ ଏଥର ବର୍ଷାଋତୁରେ ଶୁଆଇ ଦେବୁନାହିଁ । ୨୦୨୬ ମାର୍ଚ୍ଚ ୩୧ ସୁଦ୍ଧା ଦେଶକୁ ନକ୍ସଲମୁକ୍ତ କରାଯିବ ବୋଲି ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହ ଦୃଢ଼ୋକ୍ତି ପ୍ରକାଶ କରିଛନ୍ତି ।
ଛତିଶଗଡର ରାୟପୁର ଠାରେ ଶାହ ରବିବାର ଏକ ଉଚ୍ଚସ୍ତରୀୟ ବୈଠକରେ ନକ୍ସଲ ବିରୋଧୀ ଅପରେସନର ସମୀକ୍ଷା କରିଥିଲେ । ବୈଠକରେ ଛତିଶଗଡ ସମେତ ଓଡ଼ିଶା, ତେଲଙ୍ଗାନା, ମହାରାଷ୍ଟ୍ର ଓ ଆନ୍ଧ୍ରପ୍ରଦେଶରେ ପୁଲିସ ଡିଜି ଓ ଅତିରିକ୍ତ ଡିଜି ସ୍ତରୀୟ ବରିଷ୍ଠ ଅଧିକାରୀ ଯୋଗଦେଇଥିଲେ । ବୈଠକରେ ନକ୍ସଲ ଦମନର ବର୍ତ୍ତମାନ ସ୍ଥିତି, ରାଜ୍ୟମାନଙ୍କ ମଧ୍ୟରେ ସମନ୍ୱୟ, ଗୁଇନ୍ଦା ବ୍ୟବସ୍ଥାକୁ ମଜଭୁତ କରିବା ଏବଂ ଅତ୍ୟାଧୁନିକ ଟେକ୍ନୋଲୋଜିର ବ୍ୟବହାର ନେଇ ବିସ୍ତୃତ ଆଲୋଚନା ହୋଇଥିଲା । ଏହି ଅବସରରେ ଶାହ କହିଥିଲେ ନକ୍ସଲଙ୍କ ସହିତ ଆଉ କଥାବାର୍ତ୍ତା କରିବାର ପ୍ରଶ୍ନ ଉଠୁନାହିଁ । ସେମାନେ ଅସ୍ତ୍ରଶସ୍ତ୍ର ସହ ଆତ୍ମସମର୍ପଣ କରି ଦେଶର ବିକାଶ ପ୍ରକ୍ରିୟାରେ ସାମିଲ ହେବା ଉଚିତ । ଯେଉଁମାନେ ଆତ୍ମସମର୍ପଣ କରାଯିବ ସେମାନଙ୍କୁ ସ୍ୱାଗତ କରାଯିବ । ରାଜ୍ୟ ସରକାରଙ୍କ ପକ୍ଷରୁ ସବୁଠାରୁ ଶ୍ରେଷ୍ଠ ଆତ୍ମସମର୍ପଣ ନୀତି କରାଯାଇଛି । ସେମାନଙ୍କୁ ଏହି ନୀତି ଅନୁସାରେ ସବୁ ପ୍ରକାର ସହାୟତା କରାଯିବ । ରାଜ୍ୟ ଓ କେନ୍ଦ୍ର ସରକାର ନକ୍ସଲଙ୍କୁ ଯେଉଁ ପ୍ରତିଶ୍ରୁତି ଦେଇଛନ୍ତି ତାକୁ ପୂରଣ କରିବେ ।
ଗସ୍ତ ଅବସରରେ ଶାହ ନୟା ରାୟପୁରର ଅଟଳ ନଗର ଠାରେ ନ୍ୟାସନାଲ ଫରେନ୍ସିକ ସାଇନ୍ସ ୟୁନିଭର୍ସିଟି କ୍ୟାମ୍ପସ ଏବଂ ସେଣ୍ଟ୍ରାଲ ଫରେନ୍ସିକ ସାଇନ୍ସ ଲାବରେଟୋରୀର ଶିଳାନ୍ୟାସ କରିଥିଲେ । କହିଥିଲେ ଏହି ୟୁନିଭର୍ସିଟିରୁ ସ୍ନାତକ ଡିଗ୍ରୀ ହାସଲ କରିବା ଅର୍ଥ ଚାକିରି ସୁନିଶ୍ଚିତ । ଛତିଶଗଡରେ ଅପରାଧ ନ୍ୟାୟ ବ୍ୟବସ୍ଥାକୁ ଆଧୁନିକୀକରଣ କରିବାରେ ଏହି ପ୍ରତିଷ୍ଠାନର ପ୍ରମୁଖ ଭୂମିକା ରହିବ ବୋଲି ଶାହ କହିଥିଲେ ।
ସୋମବାର ଶାହ ଅବୁଝମାଡ ଅଞ୍ଚଳର ଗ୍ରାମୀଣ ଲୋକଙ୍କୁ ଭେଟି ସେମାନଙ୍କ ସହ ଆଲୋଚନା କରିବେ । ଏହା ପରେ ବିଏସ୍ଏଫ କ୍ୟାମ୍ପ ପରିଦର୍ଶନ କରିବା ସହ ସେଠାରେ ଯବାନଙ୍କ ସହିତ ଭାବ ବିନିମୟ ମଧ୍ୟ କରିବେ ।
