ଲକ୍ଷ୍ନୌ,୨୦।୫: ସମାଜବାଦୀ ପାର୍ଟିର ବରିଷ୍ଠ ନେତା ଓ ବିଧାୟକ ଆଜମ ଖାନ୍ ୨୭ ମାସ ପରେ ଶୁକ୍ରବାର ସୀତାପୁର ଜେଲ୍ରୁ ମୁକୁଳିଛନ୍ତି। ଆଜମ ଜେଲ୍ରୁ ବାହାରିବା ପରେ ଶିବପାଲ ଯାଦବ ତାଙ୍କୁ ସ୍ବାଗତ କରିଥିଲେ, ହେଲେ ଏହି ସମୟରେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କୁ ଦେଖିବାକୁ ମିଳିନଥିଲା। ଆଜମ ସୀତାରପୁର ଜେଲରୁ ଯେତେବେଳେ ବାହାରିକି ରାମପୁର ନିଜ ଘରକୁ ଆସିଥିଲେ, ସେ ସମୟରେ ଅଖିଳେଶ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥଙ୍କ ସହିତ ବୈଠକ କରୁଥିଲେ। ଏହି ସମୟରେ ଫଟୋ ମଧ୍ୟ ଦେଖିବାକୁ ମିଳିଛି, ଯାହାକି ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି।
ଯୋଗୀ ଆଦିତ୍ୟନାଥ ଓ ଅଖିଳେଶ ଯାଦବଙ୍କ ଫଟୋରେ ଲୋକସଭା ଅଧ୍ୟକ୍ଷ ଓମ ବିର୍ଲା, ୟୁପିର ବିଧାନସଭା ଅଧ୍ୟକ୍ଷ ସତୀଶ ମହାନା ଓ ଉପ ମୁଖ୍ୟମନ୍ତ୍ରୀ ବୃଜେଶ ପାଠକ ଏକାଠି ବସିଥିବାର ଦେଖିବାକୁ ମିଳୁଛନ୍ତି। ୟୁପି ବିଧାନସଭାରେ ଇ-ବିଧାନସଭା ସିଷ୍ଟମ ଲାଗୁ କରାଯାଇଛି। ଏହି କାର୍ଯ୍ୟକ୍ରମ ପରେ ବିଧାନସଭା ବାଚସ୍ପତିଙ୍କ କାର୍ଯ୍ୟାଳୟରେ ଓମ୍ ବିର୍ଲାଙ୍କ ସହିତ ଯୋଗୀ, ଅଖିଳେଶ ଯାଦବ, ବୃଜେଶ ପାଠକ ଏକାଠି ବସି ଜଳଖିଆ ଖାଇବା ସମୟରେ ଫଟୋ ମଧ୍ୟ ଭାଇରାଲ ହୋଇଛି।
ଲୋକସଭା ସ୍ପିକର ଓମ୍ ବିର୍ଲା ଶୁକ୍ରବାର ୟୁପି ବିଧାନସଭାକୁ ପେପରଲେସ୍ କରିବା ପାଇଁ ଲାଗୁ କରାଯାଇଥିବା ଟେକ୍ନୋଲୋଜି ‘ଇ ବିଧାନ’କୁ ଔପଚାରିକ ଭାବରେ ଶୁଭାରମ୍ଭ କରିଛନ୍ତି। ଏହି ସମୟରେ ଶାସକ ଦଳକୁ ନେଇ ବିରୋଧୀଙ୍କ ଦଳର ନେତା ସାମିଲ ଥିଲେ।