ଚନ୍ଦ୍ରଶେଖରପୁର,୦୩/୧୧: ମଇଁଷି ଚରାଇବାକୁ ଯାଇଥିବା ଜଣେ ଯୁବକ ଚକେଇସିହାଣୀ ନିକଟ ଗଙ୍ଗୁଆ ନଦୀରେ ବୁଡ଼ି ଯିବାରୁ ମୃତ୍ୟୁ ହୋଇଛି । ମୃତ ଯୁବକ ହେଲେ ୱାର୍ଡ ୧୭ ପଥରବନ୍ଧ ବେହେରା ସାହିର ଦିପୁନା ବେହେରା(୨୫) । ଅଗ୍ନିଶମ ବାହିନୀ ପହଞ୍ଚି ନଦୀରେ ଖୋଜାଖୋଜି କରିବା ପରେ ମୃତଦେହକୁ ଉଦ୍ଧାର କରିଛି ।
ସୂଚନା ଅନୁଯାୟୀ ଦିପୁନା ପିଲାବେଳୁ କଥା କହି ପାରନ୍ତିନି କି ଶୁଣି ପାରନ୍ତିନି । ପ୍ରତିଦିନ ମଇଁଷିଙ୍କୁ ଧରି ଉକ୍ତ ନଦୀ କୂଳକୁ ଯାଆନ୍ତି । ସେଠାରେ ଚରାଇବା ପରେ ଅପରାହ୍ଣରେ ଘରକୁ ଫେରି ଆସନ୍ତି । ଶନିବାର ମଧ୍ୟ ପୂର୍ବାହ୍ନରେ ମଇଁଷିଙ୍କୁ ଧରି ଯାଇଥିଲେ । ନଦୀରେ ମଇଁଷିଙ୍କୁ ଗାଧୋଇ ଦେଉଥିଲେ । ତାଙ୍କର ଜଣେ ସାଙ୍ଗ ଏହାର ଭିଡିଓ ବନାଉଥିଲେ । ଏହା ପରେ ତାଙ୍କ ସାଙ୍ଗ ଘରକୁ ପଳାଇ ଆସିଥିଲେ । ଅପରାହ୍ଣରେ ମଇଁଷିଗୁଡ଼ିକ ଘରକୁ ଫେରି ଆସିଥିଲେ । ଦିପୁନା କିନ୍ତୁ ଫେରି ନଥିଲେ । ପରିବାର ଲୋକ ତାଙ୍କୁ ଫୋନ୍ କରିଥିଲେ । ସେ ଫୋନ୍ ଉଠାଇନଥିଲେ । ସାହିର କିଛି ଯୁବକ ନଦୀ କୂଳ ଆଖପାଖରେ ଖୋଜାଖୋଜି କରିଥିଲେ । ଦିପୁନାଙ୍କ ଡ୍ରେସ, ଚପଲ ଓ ମୋବାଇଲ ନଦୀ କୂଳରେ ମିଳିଥିଲା । ତେଣୁ ସେମାନେ ନଦୀରେ ବୁଡ଼ି ଯାଇଥିବା ସନ୍ଦେହ କରିଥିଲେ । ଅଗ୍ନିଶମ କେନ୍ଦ୍ରକୁ ଜଣାଇବା ପରେ କିଛି ସମୟ ପରେ ଆଗ୍ନିକମାନେ ଟର୍ଚ୍ଚ ଧରି, ଟ୍ୟୁବ୍ ଗଙ୍ଗୁଆରେ ପଶିଥିଲେ । ପ୍ରାୟ ୨ ଘଣ୍ଟା ଖୋଜାଖୋଜି କରିବା ପରେ ରାତି ୯ଟା ୪୫ରେ ମୃତଦେହ ମିଳିଥିଲା । ମଞ୍ଚେଶ୍ୱର ଥାନା ପୁଲିସ ପହଞ୍ଚି ମୃତଦେହକୁ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଇଛି । ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡ଼ିବ ବୋଲି ପୁଲିସ କହିଛି ।
