ନୟାଗଡ଼, ୩୦/୦୫: ଜଙ୍ଗଲରେ ଆମ୍ୱ ଗୋଟାଉଥିବା ବେଳେ ଅଭାବନୀୟ ଘଟଣା। ବାଣୁଆ ଗୁଳିରେ ଚାଲିଗଲା ଆମ୍ବ ଗୋଟାଳିଙ୍କ ଜୀବନ । ମୃତକ ନୟାଗଡ଼ ଜିଲ୍ଲା ଶରଣକୁଳ ଥାନା ଗୋଚ୍ଛା ଗାଁର ହିନ ବୋଲି ଜଣାପଡ଼ିଛି । ଏହି ଘଟଣା ପରେ ଶିକାରୀକୁ ଅଟକ ରଖିଛନ୍ତି ଗୋଚ୍ଛା ଗ୍ରାମବାସୀ । ଘଟଣା ସମ୍ପର୍କରେ ଖବର ପାଇ ଶରଣକୁଳ ଥାନା ପୁଲିସ୍ ଏବଂ ବନ ବିଭାଗ କର୍ମଚାରୀମାନେ ଘଟଣାସ୍ଥଳରେ ପହଞ୍ଚିଛନ୍ତି ।
ସୂଚନା ମୁତାବକ, ଶରଣକୁଳ ଥାନା ବଧି ଗାଁର ସନ୍ତୋଷ କୁମାର ସାହୁ (୪୦) ୩ଜଣ ବାଣୁଆଙ୍କୁ ସାଥିରେ ନେଇ ଗୁରୁବାର ରାତିରେ ପଞ୍ଚରିଡା ରେଞ୍ଜର ଗୋଚ୍ଛା ଜଙ୍ଗଲକୁ ଜନ୍ତୁ ଶିକାର କରିବାକୁ ଯାଇଥିଲେ । ଭୋର ସମୟରେ ହିନ ନାମକ ବ୍ୟକ୍ତି ଜଙ୍ଗଲରେ ଆମ୍ବ ଗୋଟାଉଥିଲେ । ହିନଙ୍କୁ ଜଙ୍ଗଲୀ ଜନ୍ତୁ ଭାବି ଗୁଳି କରିଦେଇଥିଲେ ସନ୍ତୋଷ କୁମାର ସାହୁ । ଫଳରେ ଘଟଣାସ୍ଥଳରେ ତାଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଗୋଚ୍ଛା ଗ୍ରାମବାସୀ ଶିକାରୀକୁ ଅଟକ ରଖି ସମାଧାନ କରୁଥିବା ସୂଚନା ମିଳିଛି । ଘଟଣା ସମ୍ପର୍କରେ ଖବର ପାଇ ଶରଣକୁଳ ଥାନା ପୁଲିସ୍ ଏବଂ ବନ ବିଭାଗ ତଦନ୍ତ କରୁଛି ।
