ସିନ୍ଧେକେଲା, ୨୮/୦୯: ସିନ୍ଧେକେଲା ଅଞ୍ଚଳରେ ଲଗାଣ ବର୍ଷା ଓ ଇନ୍ଦ୍ର ଜଳ ସେଚନ ତିଖାଳିଡ୍ୟାମ୍ ପାଣି ପ୍ରବାହିତ ହେବା ଫଳରେ ତଳମୁଣ୍ଡରେ ବନ୍ୟା ପରିସ୍ଥିତି ଦେଖା ଦେଇଛି । ଉନ୍ଦେର ନଦୀର ଦୁଇ ମୁଣ୍ଡରେ ପାଣି ପ୍ରବାହିତ ହେଉଛି । ଯାହା ଫଳରେ କୌଣସି କାରଣ ବଶତଃ ଉନ୍ଦେର ନଦୀରେ ଗୋଟିଏ ଷଣ୍ଢ ଭାସି ଯାଇଥିଲା । ଅଗ୍ନିଶମ ବାହିନୀ ପ୍ରୟାସ କରି ବିଫଳ ହେବା ପରେ ଜଣେ ସ୍ଥାନୀୟ ଯୁବକ ଷଣ୍ଢଟିକୁ ଉଦ୍ଧାର କରିଛନ୍ତି । ସାହସୀ ଯୁବକ ହେଉଛନ୍ତି ସିନ୍ଧେକେଲା ଗାଁର ଡମ୍ବରୁ ଧର ଥାପା ।
ସୂଚନା ମୁତାବକ, ଉନ୍ଦେର ନଦୀରେ ଗୋଟିଏ ଷଣ୍ଢ ଭାସି ଯାଇଥିଲା । ନଦୀ ମଝିରେ ଥିବା ପଥର ଚଟାଣ ଉପରେ ବହୁ ସମୟ ଧରି ଅପେକ୍ଷା କରି ଥିବା ବେଳେ ସ୍ଥାନୀୟ ଲୋକ ଦେଖି ବଙ୍ଗୋମୁଣ୍ଡା ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ପହଞ୍ଚି ପ୍ରୟାସ କରିଥିବା ବେଳେ ସାହସ ଜୁଟାଇ ନପାରି ଫେରି ଯାଇଥିଲେ। ସିନ୍ଧେକେଲା ଗାଁର ଡମ୍ବରୁ ଧର ଥାପା ନଦୀକୁ ଶୌଚ ପାଇଁ ଯାଇଥିବା ବେଳେ ଏହି ଷଣ୍ଢକୁ ନଦୀ ଗର୍ଭରେ ଥିବା ଦେଖିଥିଲେ । ପରେ ଘରକୁ ଆସି ପୁଣି ଦୁଇ ଘଣ୍ଟା ପରେ ଉକ୍ତ ସ୍ଥାନରେ ପହଞ୍ଚି ଥିଲେ । ନିଜ ଜୀବକୁ ବାଜି ଲଗାଇ ନଦୀ ଭିତରୁ ଡେଇଁ ଷଣ୍ଢକୁ ଉଦ୍ଧାର କରିଥିଲେ । ଏଭଳି ସାହସିକତା ଯୋଗୁଁ ଷଣ୍ଢଟିର ଜୀବନ ବଞ୍ଚି ଯାଇଛି । ଦିନକୁ ଦିନ ଅଧିକ ପାଣି ପ୍ରବାହିତ ହେଉଛି । ଯଦି ଶନିବାର ଷଣ୍ଢଟିକୁ ଉଦ୍ଧାର କରାଯାଇ ନଥାନ୍ତା ତାହେଲେ ଷଣ୍ଢର ମୃତ୍ୟୁ ହୋଇଥାନ୍ତା । ଏଭଳି ସାହାସିକତା ଦେଖାଇ ଷଣ୍ଢକୁ ଉଦ୍ଧାର କରିଥିବା ଯୋଗୁଁ ଅଞ୍ଚଳରେ ଡମ୍ବରୁ ଥପାଙ୍କୁ ଶୁଭେଚ୍ଛାର ସୁଅ ଛୁଟୁଛି।
