ଉଦଳା, ୨୮।୪ : କାଳ ହେଲା କାଳବୈଶାଖୀ। କାମ ସାରି ଘରକୁ ଫେରୁଥିବା ବେଳେ ବର୍ଷା ପବନ ହେବାରୁ ରାସ୍ତା ପାର୍ଶ୍ଵରେ ଥିବା ଏକ ଚାଳ ଘରେ ନେଇଥିଲେ ଆଶ୍ରୟ। ସେହି ଘର ଉପରେ ଏକ ବିରାଟ ଗଛ ପଡିବା ପରେ ଭାଙ୍ଗିଗଲା ଚାଳ ଘର। ଆଉ ଘର ତଳେ ଚାପି ହୋଇ ଚାଲିଗଲା ଯୁବକଙ୍କ ଜୀବନ। ଏଭଳି ଘଟଣା ଘଟିଛି ଉଦଳା ଥାନା ଗୋଧିମରା ଗ୍ରାମ ନିକଟରେ। ମୃତକ ଜଣକ ହେଲେ ବହୁବନ୍ଧ ଗ୍ରାମର ଚୈତନ୍ୟ ଶଙ୍ଖୁଆଳ।
ସୋମବାର ସନ୍ଧ୍ୟାରେ ଉଦଳାରେ କାଳବୈଶାଖୀ ହୋଇଥିବା ବେଳେ ତାହାର ପ୍ରଭାବରେ ଅନେକ ଗଛ ଉପୁଡି ରାସ୍ତାରେ ପଡିବା ସହିତ ରାସ୍ତା ଅବରୋଧ ହୋଇଛି। ହେଲେ ଗୋଧିମରା ଛକ ନିକଟରେ କାମ ସାରି ଘରକୁ ଫେରୁଥିବା ବହୁବନ୍ଧ ଗ୍ରାମର ଚୈତନ୍ୟ ଶଙ୍ଖୁଆଳ କାଳବୈଶାଖୀ ସମୟରେ ଏକ ଚାଳ ଘର ତଳେ ଆଶ୍ରୟ ନେଇଥିଲେ। ପବନର ବେଗ ଏତେ ଅଧିକ ଥିଲା ଯେ ଘର ନିକଟରେ ଥିବା ଏକ ବିଶାଳ ଗଛ ଉପୁଡି ଘର ଉପରେ ପଡିଥିଲା ଏବଂ ଘର ଭିତରେ ଚାପି ହୋଇ ରହିଯାଇଥିଲେ ଚୈତନ୍ୟ। ସ୍ଥାନୀୟ ଲୋକେ ଆସି ଅଗ୍ନିଶମ ବିଭାଗ ସହାୟତାରେ ଗଛ କାଟି ଚୈତନ୍ୟଙ୍କୁ ଉଦ୍ଧାର କରିଥିଲେ। ସେତେବେଳେକୁ ତାଙ୍କର ମୃତ୍ୟୁ ହୋଇଥିଲା।
