ଆସ୍କା, ୨୦/୦୬ : ସାଙ୍ଗର ଜନ୍ମଦିନ ପାଳିବାକୁ ଡାକିନେଇ ଯୁବକଙ୍କୁ ପଥରରେ ଛେଚି ହତ୍ୟା। ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଜରଡ ଛକରେ ଏଭଳି ଅଭାବନୀୟ ଘଟଣା ଘଟିଛି। ମୃତ ଯୁବକ ଜଣଙ୍କ ହେଲେ କବିସୂର୍ଯ୍ୟନଗର ଆଠଗଡ଼ ପାଟଣା ହରିଜନ ସାହିର ସାଗର ନାହାକ। 

ସୂଚନାନୁଯାୟୀ, ଗୁରୁବାର ସନ୍ଧ୍ୟାରେ କବିସୂର୍ଯ୍ୟନଗର ଆଠଗଡ଼ ପାଟଣା ହରିଜନ ସାହିର ସାଗର ନାହାକଙ୍କୁ ସାଙ୍ଗର ଜନ୍ମଦିନ ପାଳନ କରିବା ପାଇଁ ଦୁଇ ଜଣ ସାଙ୍ଗ ଆସି ଘରୁ ଡାକି ନେଇଥିଲେ। ରାତି ପ୍ରାୟ ସାଢେ ୧୨ଟା ବେଳକୁ ସାଗର ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଜରଡ ଛକ ବରଗଛ ମୂଳେ ପଡ଼ିଥିବା ନେଇ ପରିବାର ଲୋକଙ୍କୁ କଲ୍ ଆସିଥିଲା। ପରିବାର ଲୋକେ ଘଟଣାସ୍ଥଳରେ ପହଞ୍ଚି ସାଗରଙ୍କୁ ଉଦ୍ଧାର କରି ଅଟୋରେ କବିସୂର୍ଯ୍ୟନଗର ମେଡ଼ିକାଲକୁ ନେଉଥିଲେ। ହେଲେ ବାଟରେ ସାଗରଙ୍କ ମୃତ୍ୟୁ ହୋଇଥିଲା। ତାଙ୍କ ମୁଣ୍ଡ ଓ ଛାତିରେ ଗଭୀର ଆଘାତ ଲାଗିଥିଲା। ଘଟଣାସ୍ଥଳରେ କବିସୂର୍ଯ୍ୟନଗର ପୁଲିସ ପହଞ୍ଚି ଶବକୁ ଜବତ କରିବା ସହ ଘଟଣାରେ ଦୁଇ ଜଣଙ୍କୁ ଅଟକ ରଖି ତଦନ୍ତ କରୁଛି। କେଉଁ କାରଣରୁ ସାଗରଙ୍କୁ ଏଭଳି ହତ୍ୟା କରାଯାଇଛି ତାହା ଜଣାପଡ଼ି ନାହିଁ।