ନୂଆଦିଲ୍ଲୀ: ଇଣ୍ଡୋନେସିଆରେ ଜଣେ ଚୀନ୍ ମହିଳାଙ୍କ ସହ ଏକ ଯନ୍ତ୍ରଣାଦାୟକ ଦୁର୍ଘଟଣା ଘଟିଛି । ଚୀନ୍ର ଜଣେ ମହିଳା ଜ୍ବାଳାମୁଖୀରେ ପଡ଼ି ମୃତ୍ୟୁ ବରଣ କରିଛନ୍ତି । ମହିଳା ଜଣକ ଫଟୋ ଉଠାଇବା ସମୟରେ ଜ୍ବାଳାମୁଖୀରେ ଖସିପଡିଥିଲେ । ମହିଳାଙ୍କ ବୟସ ୩୧ ବର୍ଷ ବୋଲି କୁହାଯାଉଛି । ନ୍ୟୁୟର୍କ ପୋଷ୍ଟ ଅନୁଯାୟୀ, ହୁଆଙ୍ଗ ଲିହୋଙ୍ଗ ନାମକ ଏହି ମହିଳା ତାଙ୍କ ସ୍ୱାମୀଙ୍କ ସହ ବୁଲିବାକୁ ଆସିଥିଲେ । ଏହି ଦୁର୍ଘଟଣା ସମ୍ପର୍କରେ ପୋଲିସ କହିଛି ଯେ, ଏହି ଦମ୍ପତି ସୂର୍ଯ୍ୟୋଦୟ ଦେଖିବା ପାଇଁ ଜ୍ବାଳାମୁଖୀ ଟୁରିଜିମ୍ ପାର୍କକୁ ଯାଇଥିଲେ । ଆଉ ଏଠାରେ ତାଙ୍କର ଦୁର୍ଘଟଣା ଘଟିଛି ।
ପୋଲିସର ସୂଚନାନୁସାରେ, ମହିଳା ଜଣକ ୭୫ ମିଟର ଉଚ୍ଚତାରୁ ଖସିପଡିବାରୁ ତାଙ୍କର ମୃତ୍ୟୁ ଘଟିଛି । ଏନେଇ ଟୁର ଗାଇଡ୍ କର୍ତ୍ତୃପକ୍ଷଙ୍କୁ କହିଛନ୍ତି ଯେ ଫଟୋ ଉଠାଇବା ସମୟରେ ବିପଦ ବିଷୟରେ ତାଙ୍କୁ ବାରମ୍ବାର ଚେତାବନୀ ଦିଆଯାଇଥିଲା, ହେଲେ ସେ ଏହାକୁ ମାନି ନଥିଲେ । ସେ ପଛକୁ ଚାଲିବା ଆରମ୍ଭ କରିଥିଲେ ଏବଂ ହଠାତ୍ ତାଙ୍କ ପାଦରେ ପୋଷାକ ଲାଗିଯାଇଥିଲା ।ଯାହା ଫଳରେ ସେ ଜ୍ବାଳାମୁଖୀରେ ଖସି ପଡିଥିଲେ । ତେବେ ମହିଳାଙ୍କ ମୃତଦେହକୁ ବାହାର କରିବାକୁ ପ୍ରାୟ ଦୁଇ ଘଣ୍ଟା ସମୟ ଲାଗିଛି ।
ସୂଚନାଥାଉକି, ଯେ ଏହି ଦୁର୍ଘଟଣା ଇଜେନ ଜ୍ବାଳାମୁଖୀରେ ଘଟିଛି। ଇଜେନ୍ ଜ୍ବାଳାମୂଖୀ ଏହାର ନୀଳ ଆଲୋକ ଏବଂ ସଲଫୁରିକ୍ ଗ୍ୟାସ୍ ରୁ ବାହାରୁଥିବା ନୀଳ ଅଗ୍ନି ପାଇଁ ଜଣାଶୁଣା । ୨୦୧୮ରେ ଏଠାରୁ ବିଷାକ୍ତ ଗ୍ୟାସ୍ ବାହାରିବା ପରେ ବହୁ ସଂଖ୍ୟକ ଲୋକ ନିଜ ଘର ଛାଡିବାକୁ ବାଧ୍ୟ ହୋଇଥିଲେ । ଏହି ସମୟରେ ଅତି କମରେ ୩୦ ଜଣଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।