କଟକ, ୨୦।୧୧: ରାଜ୍ୟରେ ପୁଣି ଲଜ୍ଜା । ମାତ୍ର, ୮ ବର୍ଷର ଝିଅକୁ ଦୁଷ୍କର୍ମ । କଟକ ବାରଙ୍ଗ ତ୍ରିଶୂଳିଆରୁ ଆସିଛି ଏଭଳି ଚାଞ୍ଚଲ୍ୟକର ଖବର । ତ୍ରିଶୂଳିଆ ବେଲଗଛିଆ ଅଞ୍ଚଳରେ ନାବାଳିକାଙ୍କୁ ଦୁଷ୍କର୍ମ ଘଟଣା ସାରା ରାଜ୍ୟରେ ଚହଳ ପକାଇଛି । ମଙ୍ଗଳବାର ରାତିରେ ଏହି ଘଟଣା ଘଟିଥିବା ବେଳେ ପୀଡ଼ିତାଙ୍କୁ ପୂର୍ବରୁ କଟକ ଶିଶୁଭବନରେ ଚିକିତ୍ସା ଲାଗି ଭର୍ତ୍ତି କରାଯାଇଥିଲା । ପରେ ସ୍ୱାସ୍ଥ୍ୟବସ୍ଥା ବିଗିଡ଼ିବାରୁ ତାଙ୍କୁ ଶିଶୁଭବନରୁ କଟକ ଏସ୍ସିବିକୁ ସ୍ଥାନାନ୍ତର କରାଗଲା ।
ପରିବାର ପ୍ରତିପୋଷଣ ପାଇଁ ପୀଡ଼ିତାଙ୍କ ବାପା-ମା’ ଇଟା ଭାଟିରେ କାମ କରନ୍ତି । ଅନ୍ୟପଟେ ଘଟଣା ପରେ ଦୁଷ୍କର୍ମକାରୀ ଗତକାଲିଠାରୁ ଫେରାର ଥିଲା । ଅଭିଯୁକ୍ତଙ୍କୁ ଧରିବା ପାଇଁ ବାରଙ୍ଗ ଥାନା ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିଲା । ଶେଷରେ ତ୍ରିଶୁଳିଆ ଅଞ୍ଚଳରୁ ଦୁଷ୍କର୍ମ ଘଟଣାର ମୁଖ୍ୟ ଅଭିଯୁକ୍ତକୁ ଗିରଫ କରିଛି ବାରଙ୍ଗ ପୋଲିସ । ଅଭିଯୁକ୍ତ ଜଣକ ପୀଡ଼ିତାଙ୍କ ପରିବାରର ସମ୍ପର୍କୀୟ ବୋଲି ଜଣାପଡ଼ିଛି । ଏନେଇ ସୂଚନା ଦେଇଛନ୍ତି ଡିସିପି ଜଗମୋହନ ମୀନା ।
