ଭୁବନେଶ୍ୱର,୧୩/୧୨: ଆଜି ଜାତୀୟ ଅଶ୍ୱ ଦିବସ । ଓୟୁଏଟିରେ ପାଳନ ହେଉଛି ଏହି ଦିବସ । ଆଜିକାଲି ନୁହେଁ, ୫୬ ବର୍ଷ ହେଲାଣି ଏଠି ଘୋଡା ଚାଳନା ପ୍ରଶିକ୍ଷଣ ଦିଆଯାଉଛି । ଘୋଡା ଚଢ଼ୁଥିବା ପ୍ରତ୍ୟେକ ଯୁବକ ଯୁବତୀଙ୍କ ଲକ୍ଷ୍ୟ କିଭଳି ସେନାରେ ଯୋଗଦେବେ । ଦେଶ ସେବା କରିବେ । ଶତ୍ରୁଙ୍କ ସହ ଲଢ଼ିବେ । ସେଥିପାଇଁ ପ୍ରତିଦିନ ସକାଳୁ ସକାଳୁ ଓୟୁଏଟି ଏନ୍ସିସି ପଡ଼ିଆରେ ପ୍ରଶିକ୍ଷକଙ୍କ ଲମ୍ବା ଲାଇନ୍ ଲାଗୁଛି । ଯୁବପିଢ଼ିଙ୍କ ମଧ୍ୟରେ ଦେଶପ୍ରେମ ଜାଗ୍ରତ କରିବା ପାଇଁ ଘୋଡ଼ା ସାଜିଛି ଏକ ମାଧ୍ୟମ । ଭୁବନେଶ୍ୱରର ‘୧ ଓଡ଼ିଶା ଆର ଆଣ୍ଡ୍ ଭି (ରିମୋଟ ଭେଟେରିନାରୀ)ସ୍କ୍ୱାର୍ଡନ୍ ଏନସିସି’ ଜରିଆରେ ଦକ୍ଷ ଘୋଡା ଚାଳକ(ଅଶ୍ୱାରୋହୀ) ହେବାର ତାଲିମ ନେଇ ଦେଶସେବାର ସୁଯୋଗ ପାଉଛନ୍ତି ଯୁବଗୋଷ୍ଠୀ ।
ଓଡିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ (ଓୟୁଏଟି) ସ୍ଥିତ ଭେଟେରିନାରି ମହାବିଦ୍ୟାଳୟ କ୍ୟାମ୍ପସରେ ରହିଛି ‘୧ ଓଡ଼ିଶା ଆର ଆଣ୍ଡି ଭି ସ୍କ୍ୱାର୍ଡନ୍ ଏନସିସି’ର ମୁଖ୍ୟାଳୟ । ଏହି ଅଫିସ ୧୯୬୬-୬୭ରେ ସ୍ଥାପନ ହୋଇଥିଲା । ସେହିଦିନଠୁ ଭାରତୀୟ ସେନା ଏଠାରେ ଘୋଡ଼ା ସବାରୀ ପାଇଁ ତାଲିମ କେନ୍ଦ୍ର ଖୋଲିଛି । ଯାହା ସାରା ଓଡ଼ିଶାରେ ଏକମାତ୍ର ଓ ସାରା ଦେଶରେ ୧୫ତମ କେନ୍ଦ୍ର । ଯେଉଁମାନେ ଜାତୀୟ ସମର ଶିକ୍ଷାର୍ଥୀ ବାହିନୀ ସହ ଜଡ଼ିତ ସେମାନେ କେବଳ ଘୋଡ଼ା ଚାଳନା ପ୍ରଶିକ୍ଷଣ ନେଉଛନ୍ତି । ସେଥିପାଇଁ ସେନା ପକ୍ଷରୁ ବର୍ତ୍ତମାନ ଓୟୁଏଟି ଏନସିସିରେ ମୋଟ ୧୨ଟି ଘୋଡ଼ା ଅଛନ୍ତି । ସେମାନଙ୍କ ନାମ ହେଲା ଭୋଦକା, ତିତଲି, ଗେଲେକ୍ସି, ଟ୍ରଷ୍ଟମି, ତେହଲକା, ବିକ୍ରାନ୍ତ, ତାର୍ଜନ, ଗଗନ, ଆରଜୁ, ଭିକ୍ଟର, ବିଜୟ ଓ ଟିକଲା । ସବୁ ଘୋଡ଼ା ଭାରତୀୟ ଓ ଥୋରୋ ପ୍ରଜାତିର । ମୁଖ୍ୟାଳୟ ପରିସରରେ ଏକ ଘୋଡ଼ା ଶାଳ ରହିଛି । ଏଠି ସବୁ ଘୋଡ଼ା ସାଙ୍ଗ ହୋଇ ରହୁଛନ୍ତି । ସେଠାରେ ତାଙ୍କର ଖାଦ୍ୟ, ପାଣି, ଔଷଧର ବ୍ୟବସ୍ଥା ସେନା କରିଛି।
ପ୍ରତିବର୍ଷ ୨୦୦ ଛାତ୍ରଛାତ୍ରୀ ଏନସିସିରେ ଅଂଶଗ୍ରହଣ କରୁଛନ୍ତି । ସେମାନଙ୍କ ମଧ୍ୟରୁ ୧୫୦ ଏନସିସି କ୍ୟାଡେଟ୍ ଘୋଡ଼ା ଚାଳନା ତାଲିମ ନେଉଛନ୍ତି । ମୋଟ ୩ବର୍ଷ ଏମାନେ ତାଲିମ ନେଉଛନ୍ତି । ପ୍ରତିଦିନ ଭୋର ୫ଟାରୁ ୭ ପର୍ଯ୍ୟନ୍ତ ଘୋଡ଼ା ଚାଳନା ତାଲିମ ଦିଆଯାଉଛି ।
ପ୍ରତିବର୍ଷ ଭୁବନେଶ୍ୱରର ଏନସିସି ୟୁନିଟରୁ ମୋଟ ୫ ଜଣ କ୍ୟାଡେଟ୍(୩ ପୁଅ, ୨ଜଣ ଝିଅ) ରାଜଧାନୀ ଦିଲ୍ଲୀରେ ପାଳନ ହେଉଥିବା ଗଣତନ୍ତ୍ର ଦିବସର ପରେଡ୍ରେ ଭାଗ ନିଅନ୍ତି । ଅଦ୍ୟାବଧି ଏହି ୟୁନିଟ୍ ୨୭ ସ୍ୱର୍ଣ୍ଣ, ୨୧ ରୌପ୍ୟ ଓ ୧୫ ବ୍ରୋଞ୍ଜ ପଦକ ଜିତିଛି । ଆଜି ପର୍ଯ୍ୟନ୍ତ ୩୭ ଜଣ କ୍ୟାଡେଟ୍ ଭାରତୀୟ ସେନାରେ ଯୋଗଦେଇଛନ୍ତି । ସେମାନଙ୍କ ମଧ୍ୟରେ ଭେଟେରିନାରୀ ଡାକ୍ତର, ଆସିଷ୍ଟାଣ୍ଟ ସେକ୍ରେଟାରୀ ଅଫ୍ ଡିଫେନ୍ସ ଫର୍ ସ୍ପେଶାଲ ଅପରେସନ ଓ ଆରଟିଆଇ(ସୂଚନା) ଅଧିକାରୀ ରହିଛନ୍ତି । ସେହିପରି ଅଧିକାଂଶ କ୍ୟାଡେଟ୍ ଭାରତୀୟ ପ୍ରଶାସନିକ ସେବାରେ ଯୋଗଦେଇଛନ୍ତି । ମୁଖ୍ୟାଳୟର ମୁଖ୍ୟ କମାଣ୍ଡିଂ ଅଫିସର କର୍ଣ୍ଣେଲ ପି. ଦୀନାଥାୟାଲନ୍ କହିଛନ୍ତି, ଘୋଡ଼ାମାନେ ବହୁତ ଶାନ୍ତ ଓ ବନ୍ଧୁତ୍ୱ ସ୍ୱଭାବର । ଏମାନଙ୍କ ଖାଇବା, ପିଇବା ଓ ରକ୍ଷଣାବେକ୍ଷଣ ଖର୍ଚ୍ଚ ସେନା ବୁଝେ ।
