ଢେଙ୍କାନାଳ, ୪/୭: ବରଯାତ୍ରୀ ଶୋଭାଯାତ୍ରାରେ ଘଟିଲା ଅଘଟଣ। ଡିଜେ ଗାଡ଼ିରେ ୧୧ କେଭି ବିଦ୍ୟୁତ ତାର ଲାଗି ଜଣେ ବରଯାତ୍ରୀର ମୃତ୍ୟୁ ଘଟିଥିବା ବେଳେ ୫ ଜଣ ଗୁରୁତର ହୋଇଛନ୍ତି। ଢେଙ୍କାନାଳ ଜିଲ୍ଲା ତୁମୁସିଂହା ଥାନା କଦଳୀପାଳ ଗ୍ରାମରେ ଶୁକ୍ରବାର ଅପରାହ୍ନରେ ଏପରି ଅଘଟଣ ଘଟିଛି । ମୃତକ ଢେଙ୍କାନାଳ ସହର ଗୁଡିଆନାଳୀର ମଣ୍ଟୁ ଦେହୁରୀ (୨୯) । ଆହତମାନେ ଢେଙ୍କାନାଳ ସହର କଣ୍ଟାନାଳୀ ବାଇପାସର ସାୟାନ ନାଏକ, ତୁମୁସିଂହା ଥାନା କଡିଓକାଟେଣି ଗାଁର ନିଶିକାନ୍ତ ପଳେଇ, ଭୁବନ ଜିରାଳର ସାହିଲ ସାହୁ, କଦଳୀପାଳ ଗ୍ରାମର ସୁନୀଲ ପଳେଇ ବୋଲି ଜଣାପଡିଛି। ଆହତ ମାନଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
ସୂଚନା ଅନୁସାରେ, ଢେଙ୍କାନାଳ ସହର ଗୁଡ଼ିଆନାଳୀରୁ ବର ତୁମୁସିଂହା ଥାନା କଦଳୀପାଳ କନ୍ଧସାହିକୁ ଯାଇଥିଲା। ଅପରାହ୍ନ ପ୍ରାୟ ୪ଟା ବେଳେ ବରଯାତ୍ରୀ ଶୋଭାଯାତ୍ରା ଚାଲିଥିଲା। ରାସ୍ତା ପାର୍ଶ୍ଵରେ ଝୁଲି ରହିଥିବା ୧୧କେଭି ବିଦ୍ୟୁତ ତାରରେ ଡିଜେ ଗାଡିର ଉପର ଭାଗରେ ଲାଗିଯାଇଥିଲା। ଫଳରେ ଡିଜେ ଗାଡ଼ି ହାଇଭୋଲ୍ଟେଜ ବିଦ୍ୟୁତ କରେଣ୍ଟରେ ଚାର୍ଜ ହୋଇଯାଇଥିଲା। ଡିଜେ ଗାଡିରେ ଚଢି ଓ ନିକଟରେ ନାଚୁଥିବା ବରଯାତ୍ରୀଙ୍କୁ ବିଦ୍ୟୁତ୍ ଆଘାତ ଦେଇଥିଲା।
ସମସ୍ତଙ୍କୁ ପ୍ରଥମେ ସ୍ଥାନୀୟ ଅଁଳାବେରଣୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରାଯାଇଥିଲା। ହେଲେ ଅବସ୍ଥା ସଙ୍କଟାପନ୍ନ ଥିବାରୁ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା। ତେବେ ସେଠାରେ ମଣ୍ଟୁଙ୍କୁ ଡାକ୍ତର ମୃତ୍ୟୁ ଘୋଷଣା କରିଥିଲେ । ତୁମୁସିଂହା ଥାନା ପୁଲିସ ଡିଜେ ଗାଡିକୁ ଜବତ କରି ତଦନ୍ତ ଆରମ୍ଭ କରିଛି।
