ଚାନ୍ଦବାଲି, ୧।୬: ଭଦ୍ରକ ଜିଲା ଚାନ୍ଦବାଲି ବ୍ଲକ ଅନ୍ତର୍ଗତ ଉତୁକୁଡା ପଞ୍ଚାୟତର ଉତୁକୁଡା ଗାଁର ସତ୍ୟଜିତ ରାଉତଙ୍କ ଘରେ ଶନିବାର ରାତିରେ ଦୁର୍ବୃତ୍ତ ବାହାର ପଟରୁ କବାଟ ଦେଇ ପେଟ୍ରୋଲ ପକାଇ ନିଆଁ ଲଗେଇ ଦେଇଛି। ଅଗ୍ନି କାଣ୍ଡରେ ସତ୍ୟଜିତ ରାଉତଙ୍କ ଆଜବେଷ୍ଟ ଘରେ ଥିବା ଦୁଇଟି ବାଇକ ସହ ଘରେ ଥିବା ଆସବା ପତ୍ର ସମ୍ପୂର୍ଣ ଜଳି ପାଉଁଶ ହୋଇଯାଇଛି । ତେବେ ଅଳ୍ପକେ ବର୍ତ୍ତିଯାଇଛନ୍ତି ପରିବାର ଲୋକ l ଏ ନେଇ ସତ୍ୟଜିତ ଥାନାରେ ଅଭିଯୋଗ କରିଛନ୍ତି ।
ଥାନାରେ ହୋଇଥିବା ଅଭିଯୋଗ ମୁତାବକ ସତ୍ୟଜିତ ରାଉତଙ୍କ ପରବାର ଲୋକ ଘରେ ଶୋଇଥିବା ବେଳେ ଧୂଆଁ ହେବାରୁ ନିଦ ଭାଙ୍ଗିଯାଇଥିଲା । ପରେ ଜାଣିବାକୁ ପାଇଥିଲେ ଘରେ ନିଆଁ ଲାଗିଛି। ସେମାନେ ଘରର ଆଗ ପଟ କବାଟ ଖୋଲିବା ପାଇଁ ଚେଷ୍ଟା କଲା ବେଳେ ଜାଣିବାକୁ ପାଇଥିଲେ କବାଟ ବାହାର ପଟରୁ ଦିଆଯାଇଛି l ସେମାନେ ଜୀବନ ବଞ୍ଚାଇ ବାଡ଼ି ପଟ କବାଟ ବାଟେ ବାହାରକୁ ଚାଲିଆସିଥିଲେ l ଗାଁ ଲୋକ ପାଖ ପଡୋଶୀ ଆସି ନିଆଁକୁ ଆୟତ୍ତ କରିବାକୁ ଚେଷ୍ଟା କରି ବିଫଳ ହୋଇଥିଲେ। ଖବର ପାଇ ଦମକଳ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା। ତେବେ ଘରେ ଥିବା ବାଇକ ଓ ଆସବା ପତ୍ର ସମ୍ପୂର୍ଣ ଜଳିପାଉଁଶ ହୋଇଯାଇଛି l ଆଜବେଷ୍ଟ ଘର ଥିବାରୁ ଘରେ ବିଶେଷ କ୍ଷତି ହୋଇନି l ପୋଲିସ ପହଞ୍ଚି ଘଟଣାର ତଦନ୍ତ କରୁଛି।
