କୋଣାର୍କ,୧୦/୧୧: ଅଲିଭ ରିଡେଲ କଇଁଛଙ୍କ ସୁରକ୍ଷା ପାଇଁ ନଭେମ୍ବର ୧ରୁ ସମୁଦ୍ର ନିଷିଦ୍ଧାଞ୍ଚଳରେ ମାଛଧରା ଉପରେ କଟକଣା ଲାଗୁ ହୋଇଛି । ପୁରୀ ଜିଲ୍ଲା ଅସ୍ତରଙ୍ଗ ବନବିଭାଗ ଦ୍ବାରା ନିଷିଦ୍ଧାଞ୍ଚଳରୁ ଅଲଗା ଅଲଗା ସମୟରେ ଦୁଇଟି ଟ୍ରଲର ଜବତ କରିଛି । ଉଭୟ ଟ୍ରଲରରୁ ୧୦୦ କ୍ୱିଣ୍ଟାଲରୁ ଉର୍ଦ୍ଧ୍ୱ ମାଛ ଜବତ କରାଯାଇଥିବା ବେଳେ ଏହି ଘଟଣାରେ ୨୦ ଜଣଙ୍କୁ ଅଟକ ରଖା ଯାଇଛି । 

ଅଲିଭି ରିଡେଲ କଇଁଛଙ୍କ ସୁରକ୍ଷା ପାଇଁ ନଭେମ୍ବର ୧ରୁ ସମୁଦ୍ର ନିଷିଦ୍ଧାଞ୍ଚଳରେ ମାଛଧରା ଉପରେ କଟକଣା ଲାଗୁ ହୋଇଥିବା ବେଳେ କିଛି ଅମାନିଆ ଏହାକୁ ଅବମାନନା କରିଛନ୍ତି । ଅସ୍ତରଙ୍ଗ ବନବିଭାଗ ଦ୍ବାରା ନିଷିଦ୍ଧାଞ୍ଚଳରୁ ଅଲଗା ଅଲଗା ସମୟରେ ଦୁଇଟି ଟ୍ରଲର ଜବତ କରିଥିଲା ।  ତନ୍ମଧ୍ୟରୁ ପ୍ରଥମ ଟ୍ରଲର ମା ଶାରଳା-୨ ବୋଲି ଜଣାପଡ଼ିଛି । ଟ୍ରଲରର ମାଲିକ ପାରାଦ୍ବୀପ ଅଞ୍ଚଳର ହୋଇଥିବା ବେଳେ ଏହି ଟ୍ରଲରରୁ ୭ଜଣ ମତ୍ସ୍ୟଜୀବୀଙ୍କୁ ଅଟକ ରଖିବା ସହ ୬୦୭କିଗ୍ରା ମାଛ ଜବତ କରାଯାଇଛି । ଉକ୍ତ ମାଛକୁ ବନବିଭାଗ ପକ୍ଷରୁ ନିଲାମ କରଯାଇଛି । 

ସେହିପରି ଦେବୀ ନଦୀ ମୁହାଣ ନିଷିଦ୍ଧାଞ୍ଚଳରୁ ମା ସର୍ବ ମଙ୍ଗଳା ଟ୍ରଲରଟି ମାଛ ଧରୁଥିବା ବେଳେ ବନ ବିଭାଗ ଟିମ୍ ଏବଂ ଟର୍ଟଲ ସ୍କ୍ୱାର୍ଡ ଉକ୍ତ ଟ୍ରଲରକୁ ଜବତ କରି ୧୩ ଜଣକୁ ଅଟକ ରଖିଛି । ଟ୍ରଲରରୁ ୫୫୦କିଲୋଗ୍ରାମ ମାଛ ଜବତ ହୋଇଛି । ସେଥିମଧ୍ୟରୁ ଏ କ୍ଲାସ ୬୦ କିଲୋଗ୍ରାମ, ବି କ୍ଳାସ ୪୧୦ କିଲୋଗ୍ରାମ, ସି କ୍ଲାସ ୬୦ କିଲୋଗ୍ରାମ, କଙ୍କଡା ୨୦ କିଲୋଗ୍ରାମ ରହିଥିଲା । ଜବତ ଟ୍ରଲର ସର୍ବ ମା ମଙ୍ଗଳା ଟ୍ରଲର ବୋଲି ଅସ୍ତରଙ୍ଗ ବନାଞ୍ଚଳ ଅଧିକାରିଣୀ ମୋନାଲିଶା ମହାପାତ୍ର ସୂଚନା ଦେଇଛନ୍ତି । 

ପେଟ୍ରୋଲିଙ୍ଗ ସମୟରେ ବନପାଳ ବବୁଲ ମଲ୍ଲିକ, କାର୍ତ୍ତିକ ମୁଣ୍ଡା, ବନରକ୍ଷୀ ନିର୍ମଳ ଚାଟାର୍ଯ୍ୟଙ୍କ ସହ ୫ଜଣ କଇଁଛ ସୁରକ୍ଷା ଟିମ୍, ଏପିଆର ଫୋର୍ସ ଏହି ଦୁଇଟି ଟ୍ରଲର ସମୁଦ୍ର ଭିତରୁ ଧରିଥିଲେ । ସର୍ବ ମା ମଙ୍ଗଳା ଜବତ ଟ୍ରଲରକୁ ନୂଆଗଡ ଜେଠି ନିକଟକୁ ଆଣିବା ପରେ ଉକ୍ତ ଟ୍ରଲରରୁ ଜବତ ମାଛକୁ ନିଲାମ କରାଯାଇଥିଲା । ଅଲିଭି ରିଡେଲ କଇଁଛଙ୍କ ଆଗମନ ଯୋଗୁଁ ସାମୁଦ୍ରିକ ମାଛଧରା ଉପରେ ବନବିଭାଗ ଓ ସାମୁଦ୍ରିକ ମତ୍ସ୍ୟ ବିଭାଗ ପକ୍ଷରୁ ନଭେମ୍ବର ପହିଲାରୁ କଟକଣା ଜାରି କରାଯାଇଛି।