ଭୁବନେଶ୍ବର,୦୯/୦୮: ମାଲକାନଗିରି ଛତିଶଗଡ଼ ସିମାନ୍ତ ବିଜାପୁର ଜିଲ୍ଲାରେ ପୋଲିସକୁ ମିଳିଲା ବଡ଼ ସଫଳତା ।ବିଜାପୁର ଏସପିଙ୍କ ଆଗରେ ଆତ୍ମସମର୍ପଣ କଲେ ମାଓବାଦୀ ।  ୨୬ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା ହୋଇଥିବା ୪ ଜଣ ହାଡ଼କୋର ମାଓବାଦୀଙ୍କ ସହ ମୋଟ ୨୨ ଜଣ ମାଓବାଦୀ କରିଛନ୍ତି ଆତ୍ମସମର୍ପଣ  । ଏମାନଙ୍କ ମଧ୍ୟରୁ ଜଣେ PLGA ବାଟାଲିୟନର ସଦସ୍ୟ,  ଜଣେ ତେଲେଙ୍ଗାନା ରାଜ୍ୟ କମିଟି ଅଧୀନରେ ଥିବା CRC ସଦସ୍ୟ ଓ ୨ ଜଣ ACM ସଦସ୍ୟ ରହିଛନ୍ତି ।

ଏହା ମଧ୍ୟ ପଢନ୍ତୁ-କଂକ୍ରିଟ୍‌ରେ ଅବରୁଦ୍ଧ ରାଜଧାନୀର ଅନ୍ତିମ ପ୍ରାକୃତିକ ଜଳଉତ୍ସ, ଭାରତୀୟ ପ୍ରତ୍ନତତ୍ତ୍ୱ କହୁଛି ଆମକୁ କେହି ମାନୁନାହାନ୍ତି

ତେବେ ମାଓ ପ୍ରବଣ ଅଞ୍ଚଳରେ ନୂତନ ସୁରକ୍ଷା ଶିବିର ପ୍ରତିଷ୍ଠା ହୋଇଛି। ଏଥି ସହିତ ସରକାରଙ୍କ ବିକାଶମୁଖୀ କାର୍ଯ୍ୟ ଗାଁ ରାସ୍ତା, ପରିବହନ ସୁବିଧା, ପାଣି, ବିଦ୍ୟୁତ ସହ ସରକାରଙ୍କ ଜନ କଲ୍ୟାଣକାରୀ ଯୋଜନା ଦୁର୍ଗମ ଅଞ୍ଚଳର ଗରିବ  ଆଦିବାସୀ ଲୋକଙ୍କ ପାଖରେ ପହଞ୍ଚିବା ଆରମ୍ଭ କରିଛି । ତେଣୁ ଛତିଶଗଡ଼ ସରକାରଙ୍କ ଆତ୍ମସମର୍ପଣ ଏବଂ ପୁନର୍ବାସ ନୀତିରେ ଖୁସି ହୋଇ ଏହି ମାଓବାଦୀମାନେ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି । ସମାଜର ମୁଖ୍ୟ ସ୍ରୋତରେ ସାମିଲ ହୋଇଥିବା ମାଓବାଦୀମାନଙ୍କୁ ୫୦ ହଜାର ଟଙ୍କାର ପ୍ରୋତ୍ସାହନ ଚେକ୍ ପ୍ରଦାନ କରାଯାଇଛି । ପରେ ସରକାର ନିୟମ ଅନୁସାରେ ସେମାନଙ୍କୁ ଥଇଥାନ କରାଯିବ ବୋଲି ବିଜାପୁର ଏସପି କହିଛନ୍ତି  । ଚଳିତ ବର୍ଷ ଜାନୁଆରୀ ମାସରୁ ଆରମ୍ଭ କରି ବର୍ତ୍ତମାନ ସୁଦ୍ଧା ୧୭୨ ଜଣ ମାଓବାଦୀଙ୍କୁ ଗିରଫ କରାଯାଇଥିବା ବେଳେ ୧୭୯ ଜଣ ମାଓବାଦୀ ଆତ୍ମସମର୍ପଣ କରିଛନ୍ତି । ଏହା ସହ ସୁରକ୍ଷା କର୍ମୀଙ୍କ ଗୁଳିରେ ୮୩ ଜଣ ମାଓବାଦୀ ନିହତ ହୋଇଛନ୍ତି । ଖୁବଶୀଘ୍ର ଛତିଶଗଡ଼ ମାଓ ମୁକ୍ତ ହେବ ବୋଲି ବସ୍ତର ଆଇଜି କହିଛନ୍ତି ।