ନୂଆଦିଲ୍ଲୀ, ୨୯।୮: ବିହାରର ଭୋଟର ତାଲିକାର ଚାଲିଥିବା SIR ସମୟରେ ଭୋଟର ପରିଚୟ ପତ୍ରରେ ଗଡ଼ବଡ଼ । ଯାହା ପରେ ପ୍ରାୟ ୩ ଲକ୍ଷ ଭୋଟରଙ୍କୁ ନୋଟିସ୍ ଜାରି କରିଛି ନିର୍ବାଚନ ଆୟୋଗ । ନିର୍ବାଚନ କମିଶନଙ୍କ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଅନେକ ମାମଲାରେ, ବାଂଲାଦେଶ ଏବଂ ନେପାଳ ସମେତ ପଡ଼ୋଶୀ ଦେଶ ଏବଂ ମିଆଁମାର ଏବଂ ଆଫଗାନିସ୍ତାନର କେତେକ ନାଗରିକଙ୍କ ପାଖରେ ଭାରତୀୟ ଭୋଟର ପରିଚୟପତ୍ର ଥିବାର ଜଣାପଡ଼ିଥିଲା । ନିର୍ବାଚନ ପଞ୍ଜୀକରଣ ଅଧିକାରୀ (ERO) ଦ୍ୱାରା କରାଯାଇଥିବା ଡକ୍ୟୁମେଣ୍ଟ ଯାଞ୍ଚ ସମୟରେ ଭୋଟରଙ୍କ ପାଖରେ ବୈଧ ପ୍ରମାଣପତ୍ର ନଥିବା ଜଣାପଡ଼ିଥିଲା । ଏନେଇ ସେମାନଙ୍କୁ ନିର୍ବାଚନ ଆୟୋଗ ନୋଟିସ୍ ଜାରି କରିଛନ୍ତି ।
"ଅଗଷ୍ଟ ୧ ରୁ ୩୦ ତାରିଖ ମଧ୍ୟରେ ଏକ ସମ୍ପୂର୍ଣ୍ଣ ଯାଞ୍ଚ କରାଯିବ ଏବଂ ସେପ୍ଟେମ୍ବର ୩୦ ତାରିଖରେ ପ୍ରକାଶିତ ହେବାକୁ ଥିବା ଚୂଡ଼ାନ୍ତ ଭୋଟର ତାଲିକାରୁ ଯୋଗ୍ୟ ନ ଥିବା ନାମଗୁଡ଼ିକୁ ବାଦ୍ ଦିଆଯିବ," ବୋଲି ନିର୍ବାଚନ ଆୟୋଗ କହିଛି। "ବିହାରରେ ଏସ୍ଆଇଆର ପାଇଁ ଗୃହ ପରିଦର୍ଶନ ସମୟରେ, ବିଏଲ୍ଓ ଦ୍ୱାରା ନେପାଳ, ବାଂଲାଦେଶ ଏବଂ ମିଆଁମାରର ବହୁ ସଂଖ୍ୟକ ଲୋକ ଧରାପଡ଼ିଛନ୍ତି । ସେମାନଙ୍କ ଆଧାର, ବାସସ୍ଥାନ ପ୍ରମାଣପତ୍ର, ରାସନ କାର୍ଡ ଓ ଡକ୍ୟୁମେଣ୍ଟ ସଂଗ୍ରହ କରଯାଇଛି ।
ପରବର୍ତ୍ତୀ ସମୟରେ ସେମାନଙ୍କୁ ନୋଟିସ୍ ଜାରି କରାଯାଇଥିଲା । ପ୍ରତ୍ୟେକ ଭୋଟରଙ୍କୁ ୭ ଦିନ ମଧ୍ୟରେ କର୍ତ୍ତୃପକ୍ଷଙ୍କୁ ସେମାନଙ୍କର ରେକର୍ଡ ସ୍ପଷ୍ଟ କିମ୍ବା ସଂଶୋଧନ କରିବାକୁ ନିର୍ଦ୍ଦେଶ ଦିଆଯାଇଛି । ନିର୍ବାଚନ ଆୟୋଗ ନିଶ୍ଚିତ କରିଛି ଯେ, ଗୁରୁବାର ସୁଦ୍ଧା ଡ୍ରାଫ୍ଟ ତାଲିକାରୁ ନାଁ ଅନ୍ତର୍ଭୁକ୍ତ କିମ୍ବା ବାଦ୍ ଦେବା ପାଇଁ ବ୍ୟକ୍ତିଗତ ଭୋଟରଙ୍କଠାରୁ ମୋଟ୍ ୧ ଲକ୍ଷ ୯୫ ହଜାର ୮୦୨ ଆବେଦନ ମିଳିଛି । ଏଥିମଧ୍ୟରୁ ୨୪ ହଜାର ୯୯୧ ଆବେଦନ ଇଆର୍ଓ ଦ୍ୱାରା ପୂର୍ବରୁ ସମାଧାନ କରାଯାଇଛି । ଡ୍ରାଫ୍ଟ ଭୋଟର ତାଲିକା ଅଗଷ୍ଟ ୧ ତାରିଖରେ ପ୍ରକାଶିତ ହୋଇଥିଲା ଏବଂ ଜୁନ୍ ୨୪ ତାରିଖରେ ଏସ୍ଆଇଆର କାର୍ଯ୍ୟ ଆରମ୍ଭ କରିଥିଲା । ନିର୍ବାଚନ ସଂସ୍ଥା ଅନୁଯାୟୀ, ବିହାରର ୭.୨୪ କୋଟି ଭୋଟରଙ୍କ ମଧ୍ୟରୁ ୯୯.୧୧ ପ୍ରତିଶତଙ୍କ ଡକ୍ୟୁମେଣ୍ଟ ଯାଞ୍ଚ ହୋଇସାରିଛି । ଜୁନ୍ ୨୪ ରୁ ଅଗଷ୍ଟ ୨୪ ମଧ୍ୟରେ ପ୍ରାୟ ୯୮.୨ ପ୍ରତିଶତ ଭୋଟର ସେମାନଙ୍କର ଡକ୍ୟୁମେଣ୍ଟ ଦାଖଲ କରିଥିଲେ ।
