ଭୁବନେଶ୍ବର, ୩୦।୩ : ବେଙ୍ଗାଲୁରୁ-ଗୌହାଟୀ କାମାକ୍ଷା ଏକ୍ସପ୍ରେସ୍ ଲାଇନଚ୍ୟୁତ ପରେ ୩ ଟ୍ରେନର ଗତିପଥ ପରିବର୍ତ୍ତନ କରାଯାଇଛି। ଧଉଳି ଏକ୍ସପ୍ରେସ, ନୀଳାଚଳ ଏକ୍ସପ୍ରେସ ଓ ପୁରୁଲିଆ ସୁପରଫାଷ୍ଟର ଗତିପଥ ପରିବର୍ତ୍ତନ କରାଯାଇଛି। ଦୁର୍ଘଟଣାର ତଦନ୍ତ ପାଇଁ ଉଚ୍ଚସ୍ତରୀୟ କମିଟି ଗଠନ କରାଯାଇଛି। ତଦନ୍ତ ପରେ ଦୁର୍ଘଟଣାର କାରଣ ଜଣାପଡିବ। ଖୁବ ଶୀଘ୍ର ଆରମ୍ଭ ହେବ ଟ୍ରାକ୍ ପୁନରୁଦ୍ଧାର କାର୍ଯ୍ୟ । ଅଫଲାଇନରେ ଟ୍ରେନ ଚଳାଚଳ ଚାଲିଛି ବୋଲି ପୂର୍ବତଟ ରେଳପଥ ସିପିଆରଓ ସୂଚନା ଦେଇଛନ୍ତି।
କଟକ ମଙ୍ଗୁଳି ଚୌଦ୍ବାର ନିର୍ଗୁଣ୍ତି ନିକଟରେ ବେଙ୍ଗାଲୁରୁ-ଗୌହାଟୀ କାମାକ୍ଷା ଏକ୍ସପ୍ରେସ୍ ଲାଇନଚ୍ୟୁତ ହୋଇଥିଲା । ଫଳରେ ଧରଣାରୁ ୧୧ ଟି ବଗି ଖସି ଯାଇଥିଲା । ଦୁର୍ଘଟଣା ହେବା ଫଳରେ ଟ୍ରେନ୍ରେ ଥିବା ଯାତ୍ରୀମାନେ ଡରି ଯାଇଥିଲେ । ସେମାନଙ୍କ ମଧ୍ୟରୁ ଜଣେ ଯାତ୍ରୀଙ୍କ ମୃତ୍ୟୁ ଘଟିଛି। ମୃତ ଯାତ୍ରୀ ଜଣକ ପଶ୍ଚିମବଙ୍ଗର ଶୁଭଙ୍କର। ସେହିପରି ୧୨ ଜଣ ଆହତଙ୍କୁ ଉଦ୍ଧାର କରାଯାଇ ଏସସିବିରେ ଭର୍ତ୍ତି କରାଯାଇଛି। ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି। ଉଦ୍ଧାର କାର୍ଯ୍ୟରେ ଏନଡିଆରଏଫ ଓ ଅଗ୍ନିଶମ ବାହିନୀ ନିୟୋଜିତ ହୋଇଛନ୍ତି। ଅଧାବାଟରେ ଫସିରହିଥିବା ଯାତ୍ରୀଙ୍କ ପାଇଁ ସ୍ବତନ୍ତ୍ର ଟ୍ରେନର ବ୍ୟବସ୍ଥା କରାଯାଇଛି। ଡାଉନଲାଇନରେ ବର୍ତ୍ତମାନ ଟ୍ରେନ ଚଳାଚଳ ବନ୍ଦ ରହିଛି।
ଅନ୍ୟପକ୍ଷରେ ଦୁର୍ଘଟଣା ପରେ ଇଷ୍ଟକୋଷ୍ଟ ରେଳଓ୍ବେ ପକ୍ଷରୁ ହେଲ୍ପ ନଂ ଜାରି କରାଯାଇଛି। ଭୁବନେଶ୍ୱର ପ୍ଲାଟଫର୍ମ ନଂ ୧ ରେ ହେଲ୍ପଡେସ୍କ ନମ୍ବର ୮୧୧୪୩୮୨୩୭୧ ଜାରି କରାଯାଇଛି । ଭୁବନେଶ୍ୱରରେ ୮୪୫୫୮୮୫୯୯୯ ଏବଂ କଟକରେ ୮୯୯୧୧୨୪୨୩୮, ୮୯୯୧୧୨୪୨୩୮ ହେଲ୍ପଲାଇନ୍ ନମ୍ୱର ଜାରି ହୋଇଛି । ସେହିଭଳି ଭଦ୍ରକ ପାଇଁ ହେଲ୍ପଲାଇନ୍ ନମ୍ୱର ୯୪୩୭୪୪୩୪୬୯ ଜାରି କରାଯାଇଛି।
