ମୁମ୍ବାଇ ୧୮/୦୧: ପ୍ରୟାଗରାଜରେ ହେଉଥିବା ମହାକୁମ୍ଭମେଳାରେ ଲୋକଙ୍କ ମହସମାଗମ ମଧ୍ୟରେ ବ୍ରାଣ୍ଡ୍ଗୁଡ଼ିକ ହୋଇଯାଇଛନ୍ତି ତତ୍ପର । କୋଟି କୋଟି ଗ୍ରାହକଙ୍କୁ ଟାଣିବା ପାଇଁ ଏଭଳି ଏକ ସୁଯୋଗକୁ ହାତଛଡ଼ା କରିବାକୁ ଚାହାନ୍ତିନି ଏମାନେ । ନିଜ ନିଜର ବ୍ରାଣ୍ଡ୍କୁ ଲୋକଙ୍କ ଆଗରେ ପ୍ରଦର୍ଶିତ କରିବା ପାଇଁ ଜୋରଦାର ଉଦ୍ୟମ ଚଳାଇଛନ୍ତି । ମହାକୁମ୍ଭ ସମୟରେ ବିଜ୍ଞାପନ ଏବଂ ମାର୍କେଟିଂରେ ମୋଟା ଅର୍ଥ ବୁହାଉଛନ୍ତି ।
ସମ୍ପ୍ରତି ଅର୍ଥନୀତି ଚାହିଦା ହ୍ରାସ ସମସ୍ୟା ଦେଇ ଗତି କରୁଛି । ମଧ୍ୟବିତ୍ତ ଦେଖିଚାହିଁ ଖର୍ଚ୍ଚ କରୁଛି । ଏପରି ସ୍ଥିତିରେ ୧୨ ବର୍ଷ ପରେ ଆୟୋଜିତ ମହାକୁମ୍ଭମେଳାକୁ ସୁବର୍ଣ୍ଣ ସୁଯୋଗ ଭାବେ ଗ୍ରହଣ କରିଛନ୍ତି କମ୍ପାନି । ଏଥର କୁମ୍ଭମେଳାରେ ୪୦ କୋଟି ଲୋକଙ୍କ ସମାଗମ ହେବା ନେଇ ଅନୁମାନ ରହିଛି । ଏହା କମ୍ପାନିଗୁଡ଼ିକୁ ନିଜ ନିଜ ବ୍ରାଣ୍ଡ୍ର ପ୍ରଚାର ଲାଗି ସୁଯୋଗ ଦେଇଛି । ୪୦ କୋଟି ଲୋକଙ୍କ ଆଗରେ ବ୍ରାଣ୍ଡ୍ର ପ୍ରଚାର କରିବା ନିଶ୍ଚିତ ଭାବେ ସେମାନଙ୍କ ପାଇଁ ସକାରାତ୍ମକ ଫଳ ଆଣିବ ବୋଲି କମ୍ପାନିଗୁଡ଼ିକ ଦୃଢ଼ ଆଶା ରଖିଛନ୍ତି । ତେଣୁ ମହାକୁମ୍ଭମେଳାରେ ଏବେ ବ୍ରାଣ୍ଡ୍ଗୁଡ଼ିକର ଆସର ।
ଏଫ୍ଏମ୍ସିଜି କମ୍ପାନିଗୁଡ଼ିକଠାରୁ ଆରମ୍ଭ କରି ବ୍ୟାଙ୍କ, ଷ୍ଟାର୍ଟଅପ୍ ଏବଂ ଅନ୍ୟାନ୍ୟ କମ୍ପାନିଗୁଡ଼ିକ କୁମ୍ଭମେଳାରେ ସେମାନଙ୍କ ବ୍ରାଣ୍ଡଗୁଡ଼ିକର ବିପଣନ ପାଇଁ ବିଭିନ୍ନ ପ୍ରକାର ପ୍ରଚାର କାର୍ଯ୍ୟକ୍ରମ ଚଳାଇଛନ୍ତି । ନୂଆ ପ୍ରଡ଼କ୍ଟ ଲଞ୍ଚ୍ କରୁଛନ୍ତି । ମହାକୁମ୍ଭରେ ବ୍ରାଣ୍ଡ୍ଗୁଡ଼ିକର ବିଜ୍ଞାପନ ଏବଂ ବିପଣନ ପାଇଁ କମ୍ପାନିଗୁଡ଼ିକ ପ୍ରାୟ ୩୬୦୦ କୋଟି ଟଙ୍କା ଖର୍ଚ୍ଚ କରିବେ ବୋଲି ଆକଳନ କରିଛନ୍ତି । ଏଥିମଧ୍ୟରୁ ପ୍ରାୟ ୨୫% ଅର୍ଥ ଆଉଟ୍ଡୋର୍ ଆଡ୍ଭର୍ଟାଇଜିଂରେ ଖର୍ଚ୍ଚ ହେବ ବୋଲି କୁହନ୍ତ ବିଜ୍ନେସ୍ ଏବଂ ବ୍ରାଣ୍ଡ୍ ଷ୍ଟ୍ରାଟେଜି ବିଶେଷଜ୍ଞ ହରୀଶ ବିଜୁର । କେଡିଫ୍ଫ୍ୟୁଜନ୍ର ଅଧ୍ୟକ୍ଷ ସନ୍ଦୀପ ଗୋୟଲ କୁହନ୍ତି, ମହାକୁମ୍ଭରେ ପ୍ରଚାର କରିବା ଦ୍ୱାରା ବ୍ରାଣ୍ଡଗୁଡ଼ିକ ଉପରେ ଲୋକଙ୍କ ନଜର ପଡ଼ିଥାଏ । ଅଧିକାଂଶ ବ୍ରାଣ୍ଡ ଏହାକୁ ସୁଯୋଗ ଭାବେ ଗ୍ରହଣ କରିଥାନ୍ତି ।
ବ୍ରାଣ୍ଡଗୁଡ଼ିକ ପାଇଁ ମହାକୁମ୍ଭ ମଧ୍ୟ ଏକ ଭଲ ଟେଷ୍ଟିଂ ଗ୍ରାଉଣ୍ଡ୍ ହୋଇପାରିବ । ନୂଆ ଉତ୍ପାଦ ପାଇଁ କମ୍ପାନିଗୁଡ଼ିକ ଗ୍ରାହକଙ୍କ ଅନ୍ ସ୍ପଟ୍ ଫିଡ୍ବ୍ୟାକ୍ ନେଇପାରିବେ । ତଦନୁସାରେ ସେମାନେ ବଜାର ରଣନୀତି ପ୍ରସ୍ତୁତ କରିପାରିବେ ବୋଲି ଶ୍ରୀ ଗୋୟଲ ପ୍ରକାଶ କରିଛନ୍ତି । ନିଜ ନିଜ ପ୍ରଡକ୍ଟକୁ ଦେଖାଇ ଗ୍ରାହକଙ୍କ ଦୃଷ୍ଟି ଆକର୍ଷଣ କରିବା ପାଇଁ ଡାବର, ରିଲାଏନ୍ସ କଞ୍ଜ୍ୟୁମର ପ୍ରଡକ୍ଟ୍ସ, ପେପ୍ସିକୋ, କୋକାକୋଲା ଏବଂ ଆଇଟିସି ଭଳି ଏଫ୍ଏମ୍ସିଜି କମ୍ପାନିଗୁଡ଼ିକ କୁମ୍ଭମେଳାରେ ରୁଣ୍ଡ ହୋଇଛନ୍ତି । କିଛି କମ୍ପାନି ସେମାନଙ୍କ ବ୍ରାଣ୍ଡ୍ଗୁଡ଼ିକର ବଡ଼ ବଡ଼ ହୋର୍ଡିଂ ଇନ୍ଷ୍ଟଲ୍ କରିଛନ୍ତି । କେତେକ କମ୍ପାନି ପ୍ରଡକ୍ଟ ବୁଥ୍ ନିର୍ମାଣ କରିଛନ୍ତି । ପ୍ରଡକ୍ଟ ଯୋଗାଣରେ ଯେପରି କୌଣସି ସମସ୍ୟା ସୃଷ୍ଟି ନ ହୁଏ ସେଥିପାଇଁ କମ୍ପାନିଗୁଡ଼ିକ ଯତ୍ନବାନ ରହିଛନ୍ତି ।
ହାଜ୍ମୋଲାର ପ୍ରଚାର ପାଇଁ ଡାବର ସହର ଏବଂ ଜାତୀୟ ରାଜପଥରେ ଢାବା ଏବଂ ରେଷ୍ଟୁରାଣ୍ଟଗୁଡ଼ିକ ସହ ଅନୁବନ୍ଧିତ ହୋଇଛି । ବ୍ରାଣ୍ଡ-ଆକ୍ଟିଭେସନ ପାଇଁ କମ୍ପାନି ଖର୍ଚ୍ଚ କରୁଛି । ଘାଟରେ ମହିଳା ଭକ୍ତମାନଙ୍କ ପାଇଁ ଚେଞ୍ଜିଂ ରୁମ୍ ବ୍ୟବସ୍ଥା କରିଛି କମ୍ପାନି । ବେବି କେୟାର୍ ରୁମ୍ ହୋଇଛି, ଯାହାକୁ କମ୍ପାନି ହେୟାର୍ କେୟାର୍ ଏବଂ ବେବି କେୟାର ବ୍ରାଣ୍ଡ୍ ସହିତ ବ୍ରାଣ୍ଡିଂ କରିଛି । ଗ୍ରାହକଙ୍କ ସହ ଯୋଡ଼ି ହେବା ପାଇଁ ଏହା ଏକ ଉତ୍ତମ ଅବସର ବୋଲି କୁହନ୍ତି ଡାବର ଇଣ୍ଡିଆ ସିଇଓ ମୋହିତ ମଲ୍ହୋତ୍ରା । ଆଗକୁ କମ୍ପାନିର ବିକ୍ରିରେ ଏହାର ଭଲ ପ୍ରଭାବ ଦେଖିବାକୁ ମିଳିବ ବୋଲି ସେ କହିଛନ୍ତି ।
ସେହିଭଳି ରିଲାଏନ୍ସ କଞ୍ଜ୍ୟୁମର ପ୍ରଡକ୍ଟ୍ସ ଏହାର କାମ୍ପା ବ୍ରାଣ୍ଡ୍ର ପ୍ରଚାର ଜୋରସୋର କରୁଛି । ପ୍ରଡକ୍ଟ ନମୂନା ଏମଂ ସ୍ନାକ୍ସ ଆଇଟମ୍ଗୁଡ଼ିକର ମାର୍କେଟିଂରେ ଏହା ମୋଟା ଅର୍ଥ ବ୍ୟୟ କରୁଛି । ଆଇଟିସି ଏବଂ କୋକାକୋଲା ମଧ୍ୟ ସମାନ ରଣନୀତି ନେଇ ପ୍ରଚାର କାର୍ଯ୍ୟକ୍ରମରେ ମାତିଛନ୍ତି । ବ୍ୟାଙ୍କିଙ୍ଗ୍ ସେଗ୍ମେଣ୍ଟରେ ବ୍ୟାଙ୍କ୍ ଅଫ୍ ବରୋଦା ଏହାର ନୂଆ ୟୁପିଆଇ ପେମେଣ୍ଟ ପିଏସ୍ପି ଆପ୍ ବିଓବି ଇପେ’ର ପ୍ରଚାର କରୁଥିବା ଜଣାପଡ଼ିଛି ।
