କଟକ,୦୩/୦୩: ବିଭିନ୍ନ ସମସ୍ୟା ପାଇଁ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠକୁ ଯାଇ ଫେରାଦ୍ ହେଉଛନ୍ତି ସାଧାରଣ ଲୋକେ । କାର୍ଯ୍ୟାନୁଷ୍ଠାନ ପାଇଁ ପିଟିସନ୍ ଦେଉଛନ୍ତି । ଅଭିଯୋଗ ଆଧାରରେ ଆବଶ୍ୟକ ପଦକ୍ଷେପ ନେବାକୁ ଜିଲ୍ଲାସ୍ତରୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଉଛି । କିନ୍ତୁ ନିର୍ଦ୍ଦେଶ ଅନୁସାରେ ପଦକ୍ଷେପ ନିଆଯାଉନାହିଁ । ଅଭିଯୋଗ ପ୍ରକୋଷ୍ଠରେ ଦାଖଲ ପିଟିସନ୍କୁ ଅଣଦେଖା କରିବା ଏବେ କଟକ ଜିଲ୍ଲା ପ୍ରଶାସନ ଅଧୀନରେ କାର୍ଯ୍ୟରତ ସରକାରୀ ବାବୁଙ୍କୁ ମହଙ୍ଗା ପଡ଼ିଛି । ନିର୍ଦ୍ଦେଶ ଆଧାରରେ ପଦକ୍ଷେପ ନେଇନଥିବାରୁ କଟକ ଜିଲ୍ଲାର ୪୮ ଜଣ ସରକାରୀ ଅଫିସରଙ୍କ ଦରମା ବନ୍ଦ କରାଯାଇଛି । କେବଳ ସରକାରୀ ଅଧିକାରୀ ନୁହନ୍ତି, ସେମାନଙ୍କ ଅଧୀନରେ କାମ କରୁଥିବା ପ୍ରାୟ ୧୫ ଶହ କର୍ମଚାରୀ ବି ଫେବ୍ରୁଆରୀ ମାସର ଦରମା ଉଠାଇ ପାରିନାହାନ୍ତି । ଅଧିକାରୀ ଓ କର୍ମଚାରୀଙ୍କ ଦରମା ବନ୍ଦ କରିବା ପାଇଁ ଜିଲ୍ଲାର ଟ୍ରେଜେରୀ ଅଫିସର ଓ ସମସ୍ତ ସବ୍-ଟ୍ରେଜେରୀ ଅଫିସରଙ୍କୁ ଚିଠି ଲେଖି ନିର୍ଦ୍ଦେଶ ଦେଇଛନ୍ତି ଅତିରିକ୍ତ ଜିଲ୍ଲାପାଳ ଶିବ ଟପୋ ।
ଦରମା ବନ୍ଦ ଥିବା ଅଫିସରଙ୍କ ତାଲିକାରେ ରହିଛନ୍ତି ୧୦ ବିଡିଓ, ୬ ତହସିଲଦାର, କଟକ ସିଡିଏମ୍ଓ, ବାଙ୍କୀ ଉପଜିଲ୍ଲାପାଳ ପ୍ରମୁଖ । ଏହାସହ ଡିସିପିଓ, ଓମ୍ଫେଡ୍ ଏମ୍ଡି, ଇଡ୍କୋ ଜିଏମ୍ଙ୍କ ସମେତ ବହୁ ଅଧିକାରୀ ଓ ତାଙ୍କ କାର୍ଯ୍ୟାଳୟର କର୍ମଚାରୀ ବି ଅଛନ୍ତି । ନିର୍ଦ୍ଦେଶ ଦିଆଯିବାର କିଛି ଘଣ୍ଟା ଭିତରେ କିଛି ଅଧିକାରୀଙ୍କ କାର୍ଯ୍ୟାଳୟ ତରଫରୁ ତରବରିଆ ଢଙ୍ଗରେ ବାକି ଥିବା କାମ ତୁଟାଇ ଦିଆଯାଇଛି । ଯାହାଫଳରେ ପ୍ରାୟ ୧୫ ଅଧିକାରୀ ଓ ତାଙ୍କ କାର୍ଯ୍ୟାଳୟର କିଛି କର୍ମଚାରୀଙ୍କୁ ଦରମା ବିଳମ୍ବରେ ପ୍ରଦାନ କରାଯାଇଛି । ଆହୁରି ୩୦ରୁ ଅଧିକ ଅଧିକାରୀ ଓ ଅନେକ କର୍ମଚାରୀଙ୍କ ଦରମା ଏବେ ସୁଦ୍ଧା ବନ୍ଦ ରହିଛି ।
ରାଜ୍ୟରେ ସରକାର ପରିବର୍ତ୍ତନ ହେବା ପରେ ପ୍ରଶାସନିକ କାର୍ଯ୍ୟଧାରାରେ ସଂସ୍କାର ଆଣିବାକୁ ସ୍ୱତନ୍ତ୍ର ପଦକ୍ଷେପ ନିଆଯାଉଛି । ଲୋକଙ୍କ ସମସ୍ୟାର ତୁରନ୍ତ ସମାଧାନ ବାଟ ବାହାର କରିବାକୁ ମୁଖ୍ୟମନ୍ତ୍ରୀଙ୍କ ସ୍ପଷ୍ଟ ନିର୍ଦ୍ଦେଶ ରହିଛି । କିନ୍ତୁ କିଛି ସରକାରୀ ଅଧିକାରୀ ଓ କର୍ମଚାରୀ ପୁରୁଣା ଢାଞ୍ଚାରେ ଚାଲିଛନ୍ତି ଓ ଏଭଳି ନିର୍ଦ୍ଦେଶକୁ ଅଣଦେଖା କରୁଛନ୍ତି ।
ଏମିତିକି ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରୁ ଆସୁଥିବା ଅଭିଯୋଗଗୁଡିକର ସମାଧାନ କରିବାକୁ ଟାଳଟୁଳ ନୀତି ଅବଲମ୍ବନ କରୁଛନ୍ତି । ଯାହାକୁ ନେଇ ସଂପୃକ୍ତ ଅଧିକାରୀ ଓ କର୍ମଚାରୀମାନେ ଅକଳରେ ପଡ଼ିଛନ୍ତି । ମୁଖ୍ୟମନ୍ତ୍ରୀଙ୍କ ଦପ୍ତରକୁ ଯାଉଥିବା ଅଭିଯୋଗ ପତ୍ରଗୁଡିକୁ ଅନୁଧ୍ୟାନ କରିବାକୁ ଜିଲ୍ଲା ପ୍ରଶାସନର ବିଭିନ୍ନ ଅଧିକାରୀଙ୍କ କାର୍ଯ୍ୟାଳୟକୁ ଆସିଥାଏ । ଏସବୁକୁ ଅନୁଧ୍ୟାନ କରି ଅଭିଯୋଗର ସମାଧାନ କରିବା, ବିବାଦୀୟ ଥିଲେ ଉଚ୍ଚପଦସ୍ଥ ଅଧିକାରୀଙ୍କୁ ଜଣାଇବା କିମ୍ବା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଉତ୍ତର ଫେରାଇବାର ବ୍ୟବସ୍ଥା ରହିଛି ।
କିନ୍ତୁ ଏ ପ୍ରକ୍ରିୟାକୁ କଟକରେ ସରକାରୀ ବାବୁମାନେ ଅଣଦେଖା କରିଥିଲେ । ଯାହାଫଳରେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଥିଲେ । ସେହି ଆଧାରରେ ଅତିରିକ୍ତ ଜିଲ୍ଲାପାଳ ଶିବ ଟପୋ ୪୮ଜଣ ସରକାରୀ ଅଧିକାରୀ ଓ ସେମାନଙ୍କ ଅଧୀନରେ କାର୍ଯ୍ୟରତ କର୍ମଚାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । କଟକ ଜିଲ୍ଲାରେ ପ୍ରଥମଥର ଏଭଳି ଘଟିନାହିଁ । ମନରେଗା ଯୋଜନାରେ ଜବ୍କାର୍ଡଧାରୀଙ୍କୁ କାର୍ଯ୍ୟଦିବସ ଯୋଗାଇ ପାରିନଥିବାରୁ ଗତ ଡିସେମ୍ବରରେ ୨ଶହରୁ ଅଧିକ କର୍ମଚାରୀଙ୍କ ଦରମା ବନ୍ଦ ନିର୍ଦ୍ଦେଶ ଦେଇଥିଲେ ଜିଲ୍ଲା ପ୍ରକଳ୍ପ ଅଧିକାରୀ । ଛାଟ ପଡ଼ିବାର ମାସକ ଭିତରେ ପ୍ରାୟ ବ୍ଲକ୍ରେ ସମସ୍ୟାର ସମାଧାନ ହୋଇଯାଇଥିଲା । ଏବେ ପୁଣି ଏଭଳି ଘଟଣା ସାମ୍ନାକୁ ଆସିଛି । ଯେପର୍ଯ୍ୟନ୍ତ ନିର୍ଦ୍ଦେଶ କାର୍ଯ୍ୟକାରିତା ରିପୋର୍ଟ ଦାଖଲ ନକରିଛନ୍ତି ସେ ପର୍ଯ୍ୟନ୍ତ ଅଧିକାରୀ ଓ କର୍ମଚାରୀଙ୍କ ଦରମା ବନ୍ଦ ରହିବ ବୋଲି ଏଡିଏମ୍ ଶ୍ରୀ ଟପୋ ପ୍ରକାଶ କରିଛନ୍ତି ।
