ହରଭଙ୍ଗା, ୨୩।୯ : ବୌଦ୍ଧ ଜିଲ୍ଲା ପୁରୁଣାକଟକ ଥାନା ଜିଆଁକଟା ଗ୍ରାମରେ ବିସ୍ଫୋରଣ ଘଟଣା ରେ ମୁଖ୍ୟ ଅଭିଯୁକ୍ତ ଆଲୋକ କଣ୍ଟି ସମେତ ୫ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ଅନ୍ୟ ୪ ଅଭିଯୁକ୍ତ ହେଲେ ପୁରୁଣାକଟକ ଥାନା ଜିଆକଟା ଗ୍ରାମର ମାଗିରାମ ବେହେରା (୬୦), ଆଲୋକ କଣ୍ଟି, ପୁରୁଣାକଟକର କାହ୍ନୁ ପରିଡା (୨୫), ଲଷ୍ମୀଧର ପରିଡା ( ୬୦) ଓ ପ୍ରଶାନ୍ତ ସାହୁ (୩୮) ।
ମାଗିରାମ ବେହେରା ଘର ଭଡା ସୂତ୍ରରେ କାହ୍ନୁ ପରିଡା ଓ ଆଲୋକ କଣ୍ଟିକୁ ଦେଇଥିଲା l ଘରେ ବେଆଇନ ଭାବରେ ବାଣ ବ୍ୟବସାୟ ହେବା ସହ ବିପୁଳ ପରିମାଣରେ ବାଣ ଗଚ୍ଛିତ ହୋଇ ରଖାଯାଉଥିଲା l କଲେଜ ଛକ, ରୁଗୁଡ଼ିପାଲି, ଏସବିଆଇ କଲୋନୀ ସାମନା ଫଳ ଦୋକାନ ସହ ବ୍ୟବସାୟୀ ଆଲୋକ କଣ୍ଟି ଘରୁ ବିପୁଳ ପରିମାଣର ବାଣ ଜବତ କରିଛି ପୋଲିସ l ସମସ୍ତ ବାଣ କୁ ଦମକଳ ବାହିନୀ ଦ୍ୱାରା ପାଣି ମଡାଯାଇ ଜବତ କରାଯାଇଥିଲା l
ମଙ୍ଗଳବାର ଘଟଣା ସ୍ଥଳ ପରିଦର୍ଶନ କରିଛନ୍ତି ଦକ୍ଷିଣାଞ୍ଚଳ ଆଇଜି ନୀତି ଶେଖର l ବିସ୍ଫୋରଣ ରେ କ୍ଷୟକ୍ଷତି ହୋଇଥିବା ଘର ବୁଲି ଦେଖିବା ସହ ଘଟଣା ସମ୍ପର୍କରେ ଉଚ୍ଚ ଅଧିକାରୀ ଙ୍କ ସହ ଆଲୋଚନା କରିଥିଲେ l ପରେ ଜିଲ୍ଲା ପୋଲିସ ମୁଖ୍ୟାଳୟ ଠାରେ ଅନୁଷ୍ଠିତ ଏକ ସାମ୍ବାଦିକ ସମ୍ବିଳନୀରେ ଏ ନେଇ ସୂଚନା ଦେଇଥିଲେ ଦକ୍ଷିଣାଞ୍ଚଳ ଆଇଜି l ଏଥିରେ ବୌଦ୍ଧ ଆରକ୍ଷୀ ଅଧିକ୍ଷକ ରାହୁଲ ଗୋୟେଲ ଉପସ୍ଥିତ ଥିଲେ l
ସୂଚନାଯୋଗ୍ୟ ଯେ ,ଗତ ରବିବାର ଜିଆକଟା ଗ୍ରାମରେ ଥିବା ବାଣ ଗୋଦାମରେ ହଠାତ ବିସ୍ଫୋରଣ ହୋଇଥିଲା l ଏହି ବିସ୍ଫୋରଣ ଏତେ ଭୟଙ୍କର ଥିଲା ଯେ ବାଣ ଗୋଦାମ ସହ ପାଖରେ ଥିବା ଅନ୍ୟ ଘର ଗୁଡିକ ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା l ଏଥିସହ ଘଟଣା ସ୍ଥଳରେ ଜଣେ ଓ ଡାକ୍ତରଖାନାରେ ଜଣଙ୍କର ମୃତ୍ୟୁ ହୋଇଥିବା ବେଳେ ୭ ରୁ ଅଧିକ ଗୁରୁତର ଆହତ ହୋଇଛନ୍ତି l
