ଭଦ୍ରକ,୭।୧ ଡକାୟତି ପାଇଁ ପ୍ଳାନିଂ ବେଳେ ଧରାହେଲେ ୫ ଡକାୟତ । ରାତି ଅଧ ରେ ଗୋଡ଼ାଇ ଗୋଡ଼ାଇ ଧରିଲା ପୋଲିସ । ଭଦ୍ରକ ଜିଲ୍ଲା ତିହିଡି ପୋଲିସ ଏହି ଡକାୟତ ଗ୍ୟାଙ୍ଗ କୁ ଧରିଛି । ଗିରଫ ଡକାୟତମାନେ ହେଲେ ଦୋଳସାହିର ଦୁଇ ଭାଇ ଅଜୟ ଦାସ , ସଦାନନ୍ଦ ଦାସ , ସିବରାମ ଜେନା , ଗଞ୍ଜାମ ଜିଲ୍ଲା ଭଞ୍ଜନଗର ଥାନା ଅଞ୍ଚଳ ର ରାଜା ନାୟକ ଓ ଖୋର୍ଦ୍ଧା ଥାନା ଅଞ୍ଚଳ ର ଚନ୍ଦନ ସାହୁ । ସେମାନଙ୍କ ପାଖରୁ ଦୁଇଟି ଖଣ୍ଡା, ଏକ ଲୁହା ରଡ , ଏକ ଛୁରୀ, ହାତୁଡି ପୋଲିସ ଜବତ କରିଛି।
ବିଳମ୍ବିତ ରାତି ରେ ବିଶେଷ ସୂତ୍ରରୁ ଖବର ମିଳିଥିଲା ଯେ ଦୋଳସାହି ଗୋରୁହାଟ ପଡିଆରେ ପାଞ୍ଚରୁ ଛ ଜଣ ଲୋକ ଅସ୍ତ୍ର ଶସ୍ତ୍ର ଧରି ଡକାୟତି କରିବାପାଇଁ ସଜବାଜ ହେଉଛନ୍ତି । ତିହିଡି ଏଏସଆଇ ପୋଲିସ ଗାଡିରେ ଥାନା ଷ୍ଟାଫ ସହିତ ଦୋଳସାହି, ଗାଜିପୁର ଓ ଅଭିନଗର ଏରିଆରେ ରାତ୍ର ପେଟ୍ରୋଲିଙ୍ଗ କରୁଥିବା ବେଳେ ତାଙ୍କୁ ଏ ବିଷୟରେ ଜଣେଇ ଦିଆଗଲା । ପେଟ୍ରୋଲିଂ ଟିମ ରାତି ଗୋଟାଏ ବେଳେ ଉକ୍ତ ସ୍ଥାନରେ ଚଢାଉ କରିବା ବେଳେ ଅଭିଯୁକ୍ତମାନେ ପୋଲିସ ଟିମ କୁ ଦେଖି ସେଠାରୁ ଦୌଡି ପଳାଇଥିବା ସମୟରେ ପୋଲିସ ପାଞ୍ଚଜଣଙ୍କୁ ଧରିବାରେ ସକ୍ଷମ ହୋଇଥିଲେ । ସେମାନେ ଗୁଆମାଳ ଗାଁରେ ଏକ ଘରେ ଡକାୟତି କରିବାପାଇଁ ଏକଜୁଟ ହୋଇଛନ୍ତି ବୋଲି ପୋଲିସକୁ କହିଥିବା ବେଳେ ଗିରଫ ଅପରାଧୀ ମାନେ ଆଗରୁ ବହୁ ଅପରାଧରେ ସମ୍ପୃକ୍ତ ଥିବାର ଜଣା ଯାଇଛି । ଭଦ୍ରକ ଚାନ୍ଦବାଲି ରାଜ୍ୟ ରାଜପଥରେ ଯାଅ ଆସ କରୁଥିବା ଯାତ୍ରୀ, କିମ୍ବା ରାସ୍ତା କଡ଼ରେ ଥିବା ଘରୁ ଡକାଯତ କରିବାକୁ ସେମାନଙ୍କର ଯୋଜନା ଥିବା ତଦନ୍ତରୁ ଜଣା ଯାଇଛି ।
